Skip to content

Skip to table of contents

Landakana Kifwani ki Yave ki Kumonisa Mamboti ayi Kuvwa Batu Nkinza

Landakana Kifwani ki Yave ki Kumonisa Mamboti ayi Kuvwa Batu Nkinza

‘Mayangi kwidi mutu wowo wumvwanga nkinza mutu wulebakana.’​—MINKUNGA 41:1

MINKUNGA: 130, 107

1. Bwidi bisadi bi Yave bammonisanga ti bayizolasananga bawu yi bawu?

BISADI byoso bi Yave mu nza yimvimba badi dikanda dimweka. Bawu badi zikhomba zi bakyeto ayi zi babakala banzolasananga bawu yi bawu. (1 Yoane 4:16, 21) Khumbu zinkaka bamvanganga mambu mawombo mwingi kusadisa zikhomba ziawu, vayi bammonisanga luzolo beni mu mambu malwelu ba kuba vangilanga. Dedi, bawu bantubanga mambu mamboti kwidi zikhomba ziawu ayi ba kuba kyebilanga mu luzolo. Bo tumvwa bankaka nkinza tunlandakana kifwani ki Tat’itu yi Diyilu.​—Efeso 5:1.

2. Bwidi Yesu kalandikinina kifwani ki Tat’andi ki kumonisa luzolo?

2 Yesu wulandakana buboti kifwani ki Tat’andi. Nandi wuba kyebilanga batu mu luzolo thangu zyoso. Diawu katubila: ‘Yizanu kuidi minu benu boso luvongidi ayi luneti mimfuna, minu yala ku lukindisa.’ (Matai 11:28, 29) Befu landakana kifwani ki Yesu mu ‘kuvwanga nkinza mutu wulebakana,’ twala yangidika Yave ayi befu mvitu twala baka mayangi mawombo. (Minkunga  41:1.) Mu dilongi adidi, tunkwiza mona bwidi tulenda monisina ti tumvwa bankaka nkinza va dikanda, kwidi zikhomba zitu zyoso mu kimvuka, kwidi batu tundengana mu kisalu ki kusamuna.

VWA NKINZA BATU BA DIKANDA DYAKU

3. Bwidi nnuni kalenda monisina ti wumvwanga nkinza nkyeto’andi? (Tala foto yidi va thononu.)

3 Banuni bafweti vana kifwani ayi kumonisa ti bankyebanga dikanda diawu. (Efeso 5:25; 6:4) Kibibila kintuba ti banuni bafweti vwanga nkinza ayi kuvisa bakyeto bawu. (1 Petelo 3:7; tala matangu madi va wanda mu nwt-TPO.). Nnuni wumvwanga nkinza, zebi ti nkyeto’andi widi diswasana ayi nandi mu mambu mawombo, vayi kheti bobo nkinza kadi. (Ngenesi 2:18) Nandi wumvwanga nkinza mabanza mandi, wukunkyebanga mu lukinzu ayi wu kunzitisanga. Nkyeto mweka ku Canadá wutuba matedi nnuni’andi: “Nandi kalenzanga ko mabanza mami, kakhambanga ko ‘ngye wulendi kukimwena ko phila ayiyi.’ Nandi zebi kukhuwa. Bo kakutsadisanga kubalula phila yintadila mambu, nandi wumvangilanga mawu mu luzolo.”

Nnuni wuntatamana wukwikama mu nkazi’andi mu kibila ki luzolo kadi mu nandi ayi mu kumona khenene mambu mambi

4. Bwidi nnuni kalenda monisina ti wumvwa nkinza nkazi’andi mu phila kantadila bakyeto bankaka?

4 Nnuni wumvwanga nkinza nkazi’andi wunkinzikanga mabanza mandi mu phila kankolukilanga na bakyeto bankaka, kuba mu internet voti ndamba. (Yobi 31:1) Kasadilanga ko zikhondi zi mayo mwingi kubaka makangu ayi kumona mambu makhambu fwana. Ngete, nnuni wuntatamana kukwikama mu nkazi’andi mu kibila ki luzolo kadi mu nandi, mu Yave ayi mu kumona khenene mambu mambi.​—Tanga Minkunga 19:14; 97:10.

5. Bwidi nkazi kalenda monisina ti wumvwanga nkinza nnuni’andi?

5 Boti nnuni wunlandakana kifwani ki mfumu’andi Yesu Klisto, nandi wela sadisa nkazi ‘kankinzika.’ (Efeso 5:22-25, 33) Ayi bo nkazi kankinzika nnuni, nandi wela vanga mangolo kuvisa mvandi mabanza ma nnuni ayi wukunkyebila mu luzolo bo kansadila beni thangu mwingi kukyeba biyeku mu kimvuka voti mu thangu kafweti baka makani maphasi. Nnuni mweka ku Grã-Bretanha wutuba: “Khumbu zinkaka, nkazi’ami wummonanga mu mavanga mami ti vadi dyambu di kuthatisa. Bosi nandi wunsadilanga nswa widi mu Zingana 20:5, kheti mawu mansundula ti kafweti vingila thangu yifwana mwingi kuzaba mabanza mami boti madi mambu yilenda kunkamba.’

6. Bwidi befu boso tulenda kindisila bana balezi bavwa bankaka nkinza, ayi ndandu mbi bela baka?

6 Bo matata bammonisa ti bakivwa nkinza bawu yi bawu, balenda vana kifwani kimboti kwidi bana bawu. Matata mvandi bafweti longisa bana bawu kuvwa bankaka nkinza ayi kuba monisa mamboti. Dedi, matata balenda longisa bana bawu kubika dumanga ku khati Nzo Kintinu. Voti bo bamvyokisa thangu ayi bankaka, matata balenda kamba bana bawu mwingi babika bakulutu bavyoka kuntwala mu thangu yi kubonga bidya. Vayi, baboso mu kimvuka balenda sadisa matata  kuvanga mawu. Balenda vangila mawu mu kutonda mwana kilezi bo kamvanga dyambu dimboti, dedi bo ka kuzibudila mwelu mwingi wuvyoka. Kuvanga mawu kulenda kindisa mwana beni, ayi kunsadisa kumona ti ‘mayangi ma kuvana, malutidi mayangi madi mu kutambula.’​—Mavanga 20:35.

VWA BATU NKINZA MU KIMVUKA

7. Bwidi Yesu kamonisina ti wuvwa nkinza dibakala difwa matu ayi mesu, ayi malongi mbi tulenda longuka mu kifwani kyandi?

7 Kilumbu kimweka bo Yesu kaba ku divula di Dekapoli, batu ‘bannatina mutu wumweka wufwa matu ayi wuba yolukilanga mu phasi.’ (Malako 7:31-35) Yesu wumbelusa, vayi kasa vangila ko mawu vaba batu boso. Kibila mbi? Bila dibakala beni wufwa matu, ayi kabasa zola ko kukala va khati nkangu wu batu. Yesu wuvisa mabanza mandi, diawu ‘kannatina va khonzo,’ kukhambu ba batu bosi wumbelusa. Tuzebi ti twisi ko mangolo ma kubelusa batu, vayi tufweti vwa nkinza zitsatu ayi mabanza ma zikhomba zitu ayi kuba monisa mamboti. Mvwala Polo wusonika: ‘Tumonasananu nkinza befu na befu mwingi tuyikindasana mu luzolo ayi mavanga mamboti.’ (Ebeleo 10:24) Yesu wuvisa mabanza ma dibakala beni ayi wumvwa nkinza. Bukyedika, kifwani kimboti beni tufweti landakana!

Luzolo lu tunatanga kuvanga mamoso tunnunga mwingi kusadisa zikhomba zitu beka biboba ayi babela binama bi nyitu

8, 9. Bwidi tulenda monisa ti tumvwa nkinza biboba ayi batu bambela? (Vana bifwani.)

8 Monisa ti wumvwa nkinza biboba ayi batu bambela. Luzolo, yawu khadulu yilutidi nkinza mu kimvuka ki Baklisto, bika to mambu bamvanganga. (Yoane 13:34, 35) Luzolo lu tunatanga kuvanga mamoso tunnunga mwingi kusadisa zikhomba zitu beka biboba ayi babela binama bi nyitu kukwenda mu zikhutukunu ayi mu kisalu ki kusamuna. Tufweti kuba sadisa kheti dilenda ba dyambu diphasi kwidi befu voti bo tummona ti bawu balendi nunga ko kuvanga mambu mawombo. (Matai 13:23) Michael, wundyatilanga mu kikundu ki batu babela malu, wumvutulanga beni matondo mu lusalusu kantambulanga kwidi dikanda dyandi ayi zikhomba mu kimvuka. Nandi wutuba: “Mu kibila ki lusalusu zikhomba zyoso ba kuphananga, minu yinnunga kwenda mu zikhutukunu ayi mu kisalu ki kusamuna. Yinluta zolanga kuvana kimbangi ki baboso.”

9 Mu zi Beteli ziwombo, mwidi zikhomba ziwombo zikwikama beka biboba voti bambela. Minsungi mi kizunga ba kuba monisanga luzolo bo ba kuba sadisa kusamuna mu nzila yi minkanda ayi mu telefoni. Yaya Bill, widi 86 di mimvu ayi wunsonikanga minkanda kwidi batu bankalanga mu bibwangu bidi kinanu wutuba: “Tunzolanga beni lwaku twidi lu kusonika minkanda mwingi kuvana kimbangi.” Yaya Nancy, weka nduka 90 di mimvu wutuba: “Yitandilanga ko lwaku lu kusonika minkanda buka dyambu diphamba. Vayi, kidi kisalu ki kusamuna, bila batu bawombo bafweti longuka kyedika.” Yaya Ethel, wubutuka mu mvu 1921 wutuba: “Kumona khyenzu voti tanta, kumana  ba buka nzingulu’ami. Khumbu zinkaka yimmonanga beni phasi mwingi kuvwata.” Vayi kheti bobo, nandi wunzolanga beni kuvana kimbangi mu telefoni ayi widi batu kamvutukilanga bamvwa nkinza kyedika. Barbara, widi 85 di mimvu wutuba: “Bo yikhambulu buvinya bumboti, yimmonanga beni phasi kusamuna khumbu ziwombo mu sabala. Vayi kimbangi mu telefoni ki kutsadisanga kukoluka ayi bankaka. Matondo beni Yave, mu lwaku alolo!” Vasa vyoka ko mvu mweka, dingumba di biboba divanga 1.228 di bilokulu mu kusamuna, basonika 6.265 di minkanda, batela batu mu telefoni 2.000 di zikhumbu, ayi batambika 6.315 di bilongulu! Bukyedika, mangolo mawu, manyangidika beni ntima wu Yave!​—Zingana 27:11.

10. Bwidi tulenda sadisila zikhomba zitu kubaka ndandu mu zikhutukunu zi kimvuka?

10 Vwa bankaka nkinza mu zikhutukunu zi kimvuka. Befu ba batu bamvwanga bankaka nkinza, twala sadisa zikhomba zitu kubaka ndandu mu zikhutukunu. Bwidi? Phila mweka tulenda vangila mawu, yidi mu kuvitila mu thangu mwingi tubika kuba vuvisa. Tuzebi ti vadi mambu maphamuka mammonikanga malenda kutu vanga tubika vitila mu thangu. Vayi boti khumbu zyoso tuvitilanga ko mu thangu, tufweti yindula bwidi zikhomba zitu ba tutadila ayi kuyindula mvandi mbi tufweti vanga mwingi tumonisa ti tuku bavwa nkinza. Bika zimbakana ti Yave ayi Mwan’andi bawu ba kutu tumisanga mu zikhutukunu. (Matai 18:20) Tummonisa ti tuku bakinzika mu kuvitilanga mu thangu mu zikhutukunu!

11. Kibila mbi zikhomba badi kiyeku mu lukutukunu bafweti landakana dilongi didi mu 1 Kolinto 14:40?

11 Befu kuvwa nkinza zikhomba zitu, twala landakana thwadusulu yi Kibibila yintuba: “Bika mambu moso mavangimina mu lukinzu ayi mu khambu divunza.” (1 Kolinto 14:40) Zikhomba badi kiyeku mu lukutukunu banlandakananga thwadusulu ayiyi mu kusadila to  thangu’awu. Mu phila ayoyi, bawu bela monisa ti bamvwanga nkinza bika to khomba widi dilongi dinlanda, vayi mvandi kwidi kimvuka kyoso. Yindul’abu bwidi bankaka balenda mwena boti zikhutukunu zimaninanga ko mu thangu. Bila vadi zikhomba balenda dyata mu makalu mu thangu yiwombo mwingi kuvutuka ku nzo. Bankaka bafweti kwendila mu taxi. Ayi bankaka badi bakwela na batu bakhambu sadilanga Yave, ayi bawu ba kuba vingilanga ku nzo khumbu zinkaka.

12. Kibila mbi bakulutu ba kimvuka ‘bafweni tambula lukinzu ayi luzolo’? (Tala quadro yintuba “ Monisa ti Wumvwa Nkinza Batu Bantwama Ntwala mu Kimvuka”)

12 Bakulutu ba kimvuka, bansalanga beni mu kimvuka ayi mu kisalu ki kusamuna, diawu tufweti kuba kinzikila ayi kuba zola. (Tanga 1 Tesalonika 5:12, 13.) Tuzebi ti ngye wunzolanga beni mambu moso bamvangila mu ngyewu. Ngye wulenda monisa mawu mu kuba tumukina ayi kuba sadisa, bila ‘bawu bansunga moyo’inu ayi bela vumbudila Nzambi kipholo mu kisalu kiawu.’​—Ebeleo 13:7, 17.

VWA BATU NKINZA MU KISALU KI KUSAMUNA

13. Mbi tulenda longuka mu phila Yesu katadila batu?

13 Yesaya wubikula matedi Yesu: ‘Kalendi manisa ko nti wulwelu widi wukeluka ayi kalendi zimisa ko nsifu wu mwinda wukhidi basika muisi.’ (Yesaya 42:3) Luzolo Yesu kaba mu batu, lumvanga nandi kakitula va kibwangu ki bankaka. Nandi wuvisa mabanza ma batu baba mu kyunda ayi baba buka ‘nti wulwelu widi wukeluka’ voti ‘nsifu mwinda,’ diawu kaba monisina mamboti ayi mvibudulu. Kheti bana balezi baba zolanga kumfikama. (Malako 10:14) Tuzebi ti tulendi visa ko buboti voti kulonga batu mu phila Yesu kalongila. Vayi tulenda monisa ti tumvwa nkinza batu badi va kizunga kitu ki kusamuna mu phila tunkolukila yawu, thangu mbi tufweti vangila mawu ayi thangu kwa tufweti kolukila yawu.

Nkinza beni kumonisa mamboti ayi kyadi mu kusola buboti mambu tunkoluka na mutu ayi phila tunnangunina mbembu

14. Kibila mbi tufweti tadila buboti phila tunkolukila ayi batu?

14 Bwidi tulenda kolukila ayi batu? Bubu, bivevi na bivevi bi batu badi ‘kyunda ayi bavonga’ mu kibila ki zimfumu zi política ayi zi zimfumu zi binganga zi nza ayiyi. (Matai 9:36) Mu kibila beni, bawombo bammonisanga mavanga mambi ayi basi ko kivuvu. Diawu nkinza beni kumonisa mamboti ayi kyadi mu kusola buboti mambu tunkoluka na mutu ayi phila tunnangunina mbembu! Batu bawombo banzolanga kukuwa zithangu zitu, bika ti bo tunsadilanga buboti Kibibila, vayi mu kibila ki lukinzu tu kuba monisanga ayi mu zikhadulu zitu zimboti.

15. Mu ziphila mbi tulenda monisina ti tumvwa nkinza batu tumvana kimbangi?

15 Vadi ziphila ziwombo tulenda monisina ti tumvwa nkinza batu va kizunga kitu ki kusamuna. Befu tufweti vanga byuvu mu phila yimboti ayi mu lukinzu. Ntwami ntwala mweka wuba samunanga mu kizunga kidi batu badi  zitsoni, wubika vananga byuvu bilenda vanga batu kumona zitsoni boti bawu basa zaba ko mvutu wusulama. Nandi wubika kuvulanga batu byuvu dedi, ‘Ngye zebi dizina di Nzambi?’ voti, ‘Ngye zebi mbi Kintinu ki Nzambi?’ Vayi nandi wuba kambanga batu, “Minu yilonguka mu Kibibila ti Nzambi widi dizina. Yilenda kumonisa diawu?” Mambu amama, malendi salama ko mu bibwangu byoso, bila batu ayi bikhulu biawu diswasana badi. Vayi tufweti monisanga mamboti ayi lukinzu kwidi batu badi va kizunga kitu ki kusamuna. Mwingi tuvanga mawu, tufweti zaba buboti batu badi va kizunga kitu.

16, 17. Bwidi tulenda monisina mamboti mu matedi (a) thangu tunkwenda mu zinzo zi batu? (b) thangu kwa tumvanga mwingi kukoluka yawu?

16 Thangu mbi tufweti kwenda mu zinzo zi batu? Bo tunsamunanga nzo ka nzo, tufweti zaba ti twisi ko zinzenza, bila basa kutu tumisa ko. Diawu, nkinza beni kukwenda mu zinzo zi batu mu thangu tuzebi ti bankwiza tomba koluka yitu. (Matai 7:12) Yindula: Batu va kizunga kyaku bazolanga ko kukotuka meni meni mu kisabala ayi kilumingu? Boti buawu, ngye wulenda tonina kisalu kyaku ki kusamuna mu kukoluka na batu bamvyoka, mu kuvana kimbangi ki baboso, voti kuvutukila batu zebi ti beka bakotuka mu kilokulu wunkwenda kuna.

17 Thangu kwa tufweti vanga mu kukoluka ayi batu? Batu bawombo bansalanga beni, diawu nkinza beni kubika kala nkulu voti kisina bo tunkoluka yawu, dedi mu khumbu yitheti. Bulutidi buboti kufika manisa disolo na kukala beni nkulu voti kisina. (1 Kolinto 9:20-23) Bo batu bammona ti befu tunkwendanga mu zinzo ziawu mu thangu bakhambu vanga ni kisalu, ḿba balenda luta ba bakubama mwingi kutu tambula mu khumbu yinkaka. Befu kuna zikhadulu zi pheve yi Nzambi, twala ba ‘minsadisi minsala va kimweka ayi Nzambi.’ Yave kalenda tusadila kusadisa batu kulonguka kyedika.​—1 Kolinto 3:6, 7, 9.

18. Lusakumunu mbi tulenda tambula befu vwa bankaka nkinza?

18 Tuvanganu mangolo mwingi kuvwa nkinza batu va dikanda ditu, zikhomba zitu zyoso mu kimvuka ayi batu tundengana mu kisalu ki kusamuna. Befu vanga mawu, twala tambula lusakumunu bubu ayi mu bilumbu binkwiza. Buku yi Minkunga 41:1, 2 yintuba: ‘Mayangi kwidi mutu wowo wumvwanga nkinza mutu wulebakana; Yave wela kunkula mu kilumbu ki ziphasi. Nandi wela kunsakumuna va ntoto.’