Skip to content

Skip to table of contents

‘Boti Luzebi Mambu Amama, Lwela Baka Mayangi Benu Sadila Mawu’

‘Boti Luzebi Mambu Amama, Lwela Baka Mayangi Benu Sadila Mawu’

“Vanga luzolo lu mutu wuthuma ayi manisa kisalu kiandi biawu bidia biama.”​YOANE 4:34.

MINKUNGA: 8035

1. Bwidi mavanga mambi batu va nza badi malenda kutu vangila tubika kukikulula?

KIBILA mbi didi dyambu diphasi kusadila mambu tunlongukanga mu Dyambu di Nzambi? Bila tufweti kukikulula mwingi tuvanga masulama. Mu ‘bilumbu abibi bitsuka,’ phasi beni kutatamana kukikulula, bila tunzinga na batu ‘banluta kukizola voti badi bwimi, badi minzodi mi zimbongo, badi lunyemo, lunangu,’ ayi ‘basa zaba ko kukiyala.’ (2 Timoteo 3:1-3) Bo twidi bisadi bi Nzambi, tuzebi ti phila mavanga amomo madi mambi, vayi ḿba tulenda mona ti batu badi phila mavanga beni, bambaka ndandu ayi badi mayangi makyedika mu luzingu. (Minkunga 37:1; 73:3) Ḿba tulenda yikuvusa: ‘Vadi ndandu mu kutula mamboti ma bankaka vantwala mambu mami? Minu ‘kukikulula,’ bukyedika ti batu bala tatamana kukhinzika?’ (Luka 9:48) Kubika mayindu mambi batu va nza badi ma tuvukumuna, kulenda tula va kingela kikundi twidi na zikhomba mu kimvuka ayi nzingulu’itu buka Baklisto. Vayi bo tunlonguka bifwani bi bisadi bi Yave ba kukikulanga ayi kulandakana ntugulu’awu, twala baka ndandu.

2. Mbi tulenda longuka mu lukwikumunu lu bisadi bi Nzambi mu thangu yikhulu?

 2 Mbi bisadisa bisadi bikwikama bi Nzambi mu thangu yikhulu kuba bakundi bandi? Bwidi bayangidikila ntim’andi? Bwidi babakila mangolo ma kuvanga mambu masulama? Bo tuntanga bifwani abyobi mu Kibibila ayi tunyindula mu mambu tuntanga, kimitu kitu kyala bwela kinda.

MBI BIMVANGA KIMINU KITU KITATAMANA KUKINDA

3, 4. (a) Bwidi Yave katu longilanga? (b) Kibila mbi tuntombilanga byuma binkaka bika to nzayilu mwingi kukindisa kiminu kitu?

3 Yave wutu vananga byabyoso tuntomba mwingi kiminu kitu kitatamana kikinda. Befu tuntambulanga malongi mamboti mu nzila Kibibila, bilongulu bitu bi Baklisto, zikhondi zitu zi mayo, JW Broadcasting, zikhutukunu zi kimvuka ayi zinneni. Vayi Yesu wusudikisa ti vadi dyambu dinkaka tufweti tomba, kubika to nzayilu. Nandi wutuba: “Vanga luzolo lu mutu wuthuma ayi manisa kisalu kiandi biawu bidia biama.”​—Yoane 4:34

4 Kuvanga luzolo lu Nzambi kuba buka bidya kwidi Yesu. Kudya bidya bimboti, kutu twadisanga mayangi ayi kunkindisanga zinyitu zitu. Bobuawu mvandi, kuvanga luzolo lu Nzambi kutu twadisanga mayangi ayi kunkindisanga kiminu kitu. Khumbu ziwombo tunkwendanga mu lukutukunu lu kisalu ki kusamuna mu kyunda ayi mu khambu mayangi, vayi ku tsuka tumbakanga mayangi ayi khindusulu. Ngye wumana monikina mawu?

5. Ndandu mbi tulenda baka befu ba ndwenga?

5 Tummonisa ti twidi ndwenga bo tunsadila zithwadusulu zi Yave. (Minkunga 107:43) Batu badi ndwenga bantambulanga lusakumunu luwombo. ‘Vasi ko kyuma kilenda dedakana yawu. . . . Yawu yidi buka nti wu moyo kwidi bantatamana mu yawu, ayi bo bansimbidilanga mu yawu bela tedulu batu ba mayangi.’ (Zingana 3:13-18) Yesu wutuba: ‘Boti luzebi mambu amama, lwela baka mayangi benu sadila mawu.’ (Yoane 13:17) Mwingi mayangi ma minlonguki mi Yesu matatamana, vaba tombulu bawu kulandakana mambu Yesu kaba longisa. Kulandakana malongi ayi kifwani kyandi, kuyiza ba nzingulu’awu.

6. Mbi tufweti vanga mwingi tutatamana kuzingila mu mambu tunlonguka?

6 Bubu, befu mvitu tufweti tatamana kuzingila mu mambu tunlonguka. Yindula kifwani ki dibakala dinludikanga makalu widi bisadulu byoso bintombolu mwingi kavanga kisalu kyandi ayi mvandi zebi sadila biawu. Byuma beni, byela kunsadisa kuvanga buboti kisalu kyandi na kusadila biawu. Ḿba nandi kalenda ba nzayilu mu kisalu beni mu mimvu miwombo, vayi kheti bobo, kafweti tatamana kusadila ma kalonguka mwingi kabika zimbakana ayi kavanga buboti kisalu beni. Bobuawu mvandi, bo tulonguka kyedika, tuba beni mayangi mu kusadila mamoso tutanga mu Kibibila. Vayi mwingi mayangi mitu makadidila, tufweti tatamana kusadila kadika kilumbu mu mambu Yave ka tulonganga.

7. Mbi tufweti vanga mwingi tulonguka mu bifwani bi bisadi bi Yave mu thangu yikhulu?

7 Mu dilongi adidi, tunkwiza tubila mu mambu mbi tulenda mona phasi kutatamana kukikulula. Tunkwiza longuka bwidi bisadi bikwikama bi Nzambi mu thangu yikhulu batatamana kukikulula. Vayi vadi mambu mankaka tufweti vanga, bika to kuzaba zitsangu. Tufweti yindula mambu tuntanga ayi kusadila mawu mu luzingu lwitu.

TADILA BANKAKA PHILA MWEKA

8, 9. Mbi tulenda longuka mu buku yi Mavanga 14:8-15 matedi kukikulula ku mvwala Polo? (Tala fikula yidi va thononu.)

8 Nzambi tidi batu boso “bavuka ayi batula ku diela di zabila mambu ma kyedika.” (1 Timoteo 2:4) Bwidi ngye wuntadilanga batu boso bakhambu zaba kyedika? Mvwala Polo wuba samunanga kwidi basi Yuda baba luzabu matedi Yave. Vayi wusamuna mvandi kwidi batu baba sambilanga zinzambi zi luvunu. Kuvanga mawu, kuthota kukikulula ku mvwala Polo. Bwidi?

9 Khumbu yitheti mvwala Polo katona kusala buka misyoni, nandi ayi Balinabasi bayenda ku divula di Listila. Basi Likawoni baba zingilanga kuna, bamwena ti Polo ayi Balinabasi baba zinzambi ziawu ayi baba tedila mu mazina ma zinzambi beni zi luvunu: Zeyisi ayi Elimesi. Bukyedika kwandi ti mambu amomo mavukumuna Polo ayi Balinabasi? Bukyedika kwandi ti bawu batadila mambu beni buka luvundulu batambula mu kibila ki zithotolo zyoso bamonikina mu mavula mamwadi bayenda theti? Batomba kusadila lwaku beni mwingi kusamuna zitsangu zimboti? Ndamba! Bawu badasuka beni, badila ayi bakamba nkangu woso wu batu: ‘Kibila mbi lulembu vangila mambu amomo? Befu mvitu twidi batu banga benu.’​—Mavanga 14:8-15.

10. Kibila mbi Polo ayi Balinabasi basa kuyimwena ko buka bawu balutidi na basi Likawoni?

10 Bo Polo ayi Balinabasi batuba ti bawu mvawu baba batu, maba sundula ti bawu mvawu baba batu basumuka. Bawu basa tuba ko ti phila baba bwongimina, yiba dedi mweka ayi yi basi Likawoni. Bila Nzambi wuba fila kuna buka misyoni. (Mavanga 13:2) Bawu bwadi basolo mu pheve yinlongo ayi bayiza baka kivuvu kilutidi. Vayi mawu masa ba ko kibila mwingi bakimona buka bawu balutidi na bankaka. Bila Polo ayi Balinabasi bavisa ti basi Likawoni mvawu balenda baka lwaku beni ba kukikinina zitsangu zimboti.

11. Bo tunsamuna, bwidi tulenda kuyikuludila dedi Polo?

11 Tala phila yitheti tulenda monisina ti tuyikululanga dedi Polo. Befu tuyindulanga ko ti kiyeku kitu ki kusamuna voti mambu Yave katu sadisanga kuvanga, ma tukitula batu balutidi na bankaka. Tulenda yikuvusa: ‘Bwidi yintadilanga batu yinlonganga Kibibila? Yintadilanga mu kithatu batu ba mimvila minkaka?’ Mu nza yimvimba, Zimbangi zi Yave bamvanganga mangolo ma kutomba batu batidi kukuwa zitsangu zimboti. Bankaka bamvanganga mangolo mwingi kulonguka mbembu ayi bikhulu bi batu banlenzanga. Vayi bawu bayitadilanga ko buka balutidi na batu banlonganga. Angi, bamvanganga mangolo ma kuvisa kadika mutu mwingi kusadisa bawombo bakikinina zitsangu zi Kintinu.

TANGUNA MAZINA MA BANKAKA BO WUNSAMBILA

12. Bwidi Epafalasi kamonisina ti wuba vwanga bankaka nkinza?

12 Phila yinkaka tulenda monisina ti twidi batu bayikululanga, yidi mu kusambidilanga zikhomba zitu zyoso ‘batambula kiminu ki thalu yimweka banga befu.’ (2 Petelo 1:1) Mawu Epafalasi kavanga. Kibibila kintubila matedi Epafalasi khumbu zitatu to. Bo Polo kaba mu buloku ku Loma, wusonikina nkanda kwidi Baklisto baba zinganga ku Kolosai, nandi wuba kamba ti Epafalasi wuba ‘kuba sambidilanga thangu zyoso.’ (Kolosai 4:12) Epafalasi wuzaba buboti zikhomba zyandi ayi wuba kuba vwanga beni nkinza. Polo wuntedila ‘nkundi’ma mu nloku,’ mawu  mammonisa ti nandi mvandi wuba monikinanga ziphasi. (Filemoni 23) Vayi kheti bobo, nandi wuba vwanga nkinza zitsatu zi bankaka ayi wuba vanganga dyoso dyambu mwingi kuba sadisa. Epafalasi wuba sambidilanga zikhomba zyandi zyoso, ayi befu mvitu tulenda vanga mawu, kheti mu kutanguna mazina mawu. Minsambu beni, minsadisa bankaka.​—2 Kolinto 1:11; Yakobi 5:16.

13. Bwidi wulenda landikinina kifwani ki Epafalasi bo wumvanga minsambu?

13 Yindula mutu mbi ngye wulenda sambidila mu dizina. Ḿba wulenda zaba matedi bakundi baku mu kimvuka, voti makanda badi mu kumonikina ziphasi mu luzingu. Ḿba bawu badi makani mankinza beni bafweti baka voti zithotolo bafweti kindama. Wulenda sambidila mvandi zikhomba badi mazina mu jw.org vo vantubila “Testemunhas de Jeová Presas por Causa de Sua Fé(Tala va wanda vantuba IMPRENSA > CASOS JURÍDICOS.) Mvandi, buboti beni kutebukanga moyo bo bafwilu batu banzolanga, bo bamonikini bivuka mu bilumbu abibi, mimvita, ayi bo bankindama mu thangu ayiyi mbakulu yimana ba phasi. Tummona ti vadi zikhomba zitu ziwombo bantombanga tuba sambidila. Befu kuba sambidila, tummonisa ti twisimvwa ko to nkinza zitsatu zitu veka, vayi zi bankaka. (Filipi 2:4) Yave wunkuwanga phila minsambu amyomi.

‘BA WUKUBAMA MU KUWA’

14. Bwidi Yave kadidi kifwani kilutidi mu kukuwanga bankaka?

14 Phila yinkaka tulenda monisina ti tuyikululanga, yidi mu kukuwa bankaka. Buku yi Yakobi 1:19 yintuba ti tufweti ‘ba bakubama mu kuwa.’ Yave wutuvana kifwani kilutidi mu mambu amama. (Ngenesi 18:32; Yosua 10:14) Dedi, tanga disolo didi mu Esodu 32:11-14. (Tanga.) Yave kasa dinda ko Mose kankamba bwidi kaba mwena mambu, vayi kheti bobo Yave wumvana lwaku lu kutuba mabanza mandi. Ngye wulenda kuwa mu  mvibudulu phila mutu awowo? Yave wuvanga mawu, nandi wunkuwanga mu mvibudulu batu boso ba kunsambidilanga mu kiminu.

15. Bwidi tulenda landikinina kifwani ki Yave mu kuzitisa bankaka?

15 Wukiyuvusa: ‘Boti Yave wuku yikululanga mwingi kukuwa batu, dedi bo kavangila kwidi Abalami, Lakeli, Mose, Yosua, Samisoni, Elia, ayi Ezekiasi, yilenda vanga mangolo ma kulandakana kifwani kyandi? Yilenda bwela zitisa zikhomba zyami zyoso mu kukuwa ayi kusadila mayindu mawu? Vadi mutu mu kimvuka kyami voti va dikanda yilenda bwela kuwila? Mbi yinkwiza vanga?’​—Ngenesi 30:6; Minkongudidi 13:9; 1 Mintinu 17:22; 2 Lusansu 30:20.

‘ḾBA YAVE WUNKWIZA MONA ZIPHASI ZYAMI’

Davidi wutuba: ‘Mbikanu.’ Boti ngyewu, khanu mbi wuvanga? (Tala bitini bi matangu 16, 17)

16. Mbi Davidi kavanga bo Simei kansakinina?

16 Kukikulula, mvandi kulenda kutu sadisa kukiyala mu thangu batu ba kutu vangila mambu mambi. (Efeso 4:2) Kifwani kimboti mu mambu beni kidi mu buku 2 Samueli 16:5-13. (Tanga.) Simei musi dikanda di Ntinu Sauli, wusakinina ayi wuvangila mambu makhambu fwana kwidi Davidi ayi bisadi byandi. Davidi wuba lwaku lu kukikakula, vayi nandi wumonisa mvibudulu mu kukindama bo Simei kansakinina. Bwidi Davidi kabakila mangolo mwingi kanunga kukiyala? Tulenda visa mawu buboti befu fyongunina buku yi Minkunga kapu 3.

17. Mbi bisadisa Davidi kanunga kukiyala, ayi bwidi tulenda landikinina kifwani kyandi?

17 Ntinu Davidi wusonika buku yi Minkunga kapu 3 mu thangu mwan’andi Abisaloni kaba tomba kumvonda. Yawu thangu Simei kaba tomba kunwanisa Davidi, vayi Davidi wutatamana wuvumbama. Bwidi? Davidi wusonika mambu madi mu Minkunga 3:4 mantuba: ‘Minu yela tela Yave ayi nandi wela tewuka ku mongo’andi wunlongo.’ Mu thangu ba kutu vangila mambu mambi, befu mvitu tufweti sambila dedi bo Davidi kavangila. Bosi Yave wela kutu vana phevi’andi yinlongo mwingi tukindama. Wulenda bwela kukiyala voti kuba nkwa nlemvu bo mutu ka kuvangila dyambu dimbi? Ngye widi lufyatu ti Yave kalenda mona ziphasi zyaku ayi kusakumuna?

‘NDWENGA YAWU YILUTIDI NKINZA’

18. Ndandu mbi twala baka mu kulandakana zithwadusulu zi Yave?

18 Befu vanga mambu tuzebi ti madi masulama, twala ba ndwenga ayi Yave wela kutu sakumuna. Buku yi Zingana 4:7 yintuba ti ‘ndwenga yawu yilutidi nkinza.’ Kheti ndwenga yinkwizilanga mu nzayilu, vayi yawu yisinsundula ko to kuvisa mambu. Kuba ndwenga kunsundula mvandi kubaka makani mu ndwenga. Bila kheti binona mvandi bimmonisanga ndwenga mu kukubika bidya mu kibila ki thangu kisivu. (Zingana 30:24, 25) Klisto bakuntedilanga, “ndwenga yi Nzambi,” ayi wumvanganga mambu mankwangidika Tat’andi. (1 Kolinto 1:24; Yoane 8:29) Nzambi mvandi wala kutu sakumuna befu monisa ndwenga mu kusola mambu tuzebi ti madi masulama ayi kutatamana kukikulula. (Tanga Matai 7:21-23.) Diawu, vanga mangolo mwingi wutatamana kuvanga kimvuka buka kibwangu batu boso bakikululanga balenda sadila Yave. Kuntombulu thangu ayi mvibudulu mwingi tuvanga mambu tuzebi ti madi masulama. Vayi kuvanga mawu kummonisa ti tukikululanga, ayi kulenda tutwadisa mayangi bubu ayi mvu ka mvu.