Skip to content

Skip to table of contents

Tatamana Kumonisa Luzolo​—Luawu Lunkindisanga

Tatamana Kumonisa Luzolo​—Luawu Lunkindisanga

‘Luzolo lunkindisanga.’​—1 KOLINTO 8:1.

MINKUNGA: 109, 121

1. Dyambu mbi dinkinza Yesu kayoluka na minlonguki myandi va bwilu bu tsuka?

VA BWILU bwandi bu tsuka na minlonguki myandi ava kafwa, Yesu wutubila matedi luzolo 30 di zikhumbu. Nandi wukamba minlonguki myandi ti bafweti ‘zolasana bawu yi bawu.’ (Yoane 15:12, 17) Wutuba mvandi ti luzolo beni lufweti ba lungolu mwingi batu bafika mona ayi bazaba ti bawu badi minlandikini mikyedika mi Klisto. (Yoane 13:34, 35) Luzolo Yesu katubila, lwisi ko to lutedi kumonisa mabanza; vayi yidi khadulu yingolu beni ayi yi kukimanga. Nandi wutuba: “Kuisi ko mutu beki luzolo lulutidi banga mutu wowo wumvana [moyo’andi] mu dyambu di bakundi bandi. Beno luidi bakundi bama enati lumvanganga mambu momo ndikulutumina.”​—Yoane 15:13, 14.

2. (a) Bwidi bisadi bi Nzambi badi bazabakana bubu? (b) Byuvu mbi tunkwiza baka mimvutu mu dilongi adidi?

2 Bisadi bi Yave bubu badi bazabakana mu luzolo lu kukimanga ayi kithwadi kingolu badi. (1 Yoane 3:10, 11) Mimvila, zimbembu  tunkoluka, kwidi tufumina voti bwidi tuyonzukila, masi ko mawu malutidi nkinza. Bila mu nza yimvimba, bisadi bi Yave banzolasananga bawu yi bawu. Kibila mbi luzolo lulutidi nkinza bubu? Bwidi Yave ayi Yesu ba tukindisilanga mu luzolo? Bwidi tulenda monisina luzolo beni mwingi kubomba ayi kukindisa bankaka?​—1 Kolinto 8:1.

KIBILA MBI LUZOLO LWIDIDI BENI NKINZA BUBU?

3. Mambu mbi ‘bilumbu abibi bi ziphasi’ binnatanga batu kuvanga?

3 Tunzingila mu ‘bilumbu bitsuka,’ ayi luzingu bubu lumana ‘wala ziphasi ayi kyunda.’ (2 Timoteo 3:1-5; Minkunga 90:10) Batu bawombo mu nza bantovuka beni ayi bamana vonga. Kuvyoka 800.000 di batu, bayivondanga baveka kadika mvu mu kadika 40 ma mintebu. Kyadi ayi kyunda kuzaba ti mu kibila ki ziphasi, kheti Baklisto bankaka mvandi bayivondanga baveka.

4. Batu mbi bantubila mu Kibibila baba tomba kufwa?

4 Mu thangu yikhulu, bisadi binkaka bi Nzambi bikwikama bayiza ba mu kyunda mu kibila ki ziphasi zi luzingu ayi baba tomba kufwa. Wumweka mu bawu wuba Yobi, nandi wunyonga bo kaba beni mu kyunda ayi wutuba: ‘Yinlenda moyo’ami; yisi bwe tomba ko kuzinga.’ (Yobi 7:16; 14:13) Yona mvandi wuba beni kyunda ayi wutuba: ‘Ah Yave! Bonga moyo’ami yifwa kwami, bila bulutidi buboti kwidi minu kufwa na kuzinga.’ (Yona 4:3) Mbikudi Elia mvandi wuba beni mu kyunda ayi wudinda mwingi kafwa. Nandi wutuba: ‘Yima vonga! Yave, bonga moyo’ami bubu.’ (1 Mintinu 19:4) Yave wuba zolanga bisadi byandi bikwikama ayi waba tomba bawu bazinga. Nandi kasa kuba fundisa ko mu kibila ki mabanza mawu. Vayi wuba sadisa kuvutula luzolo lu kuzinga mwingi batatamana kunsadila mu lukwikumunu.

5. Kibila mbi thangu ayiyi tufweti luta monisina luzolo kwidi zikhomba zitu?

5 Bubu, zikhomba zitu ziwombo zi bakyeto ayi zi babakala bammonikinanga mambu ma phasi ayi bantomba luzolo lwitu. Bankaka ba kuba vwezanga ayi bamvyokila mu zithotolo. Bankaka bankindamanga bo ba kuba tubila bubi kwidi batu bansalanga yawu. Voti badi bavonga bila bansalanga mu zithangu ziwombo voti bamvanganga bisalu biwombo. Bankaka mambu ma phasi bandengana va dikanda. Ḿba badi bakwelana ayi batu bakhambu sadilanga Yave ayi bawu ba kuba tovulanga kadika thangu. Mu kibila ki mambu beni ayi mankaka, bawombo bafika vonganga ayi ḿba balenda mona ti basi ko luvalu. Nani wulenda sadisa batu abobo?

LUZOLO LU YAVE LUTU KINDISANGA

6. Bwidi luzolo lu Yave lunkindisilanga bisadi byandi?

6 Yave wunkindisanga bisadi byandi ti nandi wuku bazolanga beni bubu ayi wela tatamana kuba zola mu thangu zyoso. Yindula bwidi basi Isaeli bamwena mu thangu Yave kaba kamba: ‘Ngye wukitukidi wuthalu va mesu mami, ngye wubeki nzitusu, ayi minu yi kuzola beni,’ ayi ‘Bika kumona boma, bila minu yidi yaku.’ (Yesaya 43:4, 5) Tuzebi ti kadika mutu mu befu widi beni luvalu va mesu ma Yave. * (Tala matangu madi va wanda.) Kibibila kinkanikisa: ‘Nandi widi Nkwa Ngolo ayi wela kuvukisa. Mu kibila kyaku, nandi wela yangalala beni.’​—Sefania 3:16, 17.

7. Mu phila mbi luzolo lu Yave lwidi buka luzolo lu ngudi wunkwemika mwan’andi? (Tala fikula yidi va thononu.)

 7 Yave wunkanikisa kukindisa bisadi byandi kheti mu ziphasi ziwombo balenda vyokila. Nandi wutuba: ‘Buna benu lwela kwema ayi natunu mu nzemba, ayi lwela lekusu mu khata. Dedi bo ngudi kambombilanga mwan’andi, buawu yela tatamana kulu bombila.’ (Yesaya 66:12, 13) Yindula bwidi mwana tsombi kambelanga nsika bo ngudi’andi ka kunkyeba voti kansakana yandi. Yave wuku zola beni ayi tidi ngye wuzingila mu nsika. Bika kuba divuda ti ngye luvalu beni widi va mesu ma Yave.​—Yelemia 31:3.

8, 9. Bwidi luzolo lu Klisto lutu kindisilanga?

8 Tala kibila kinkaka kitu vanga kukikinina ti Yave wutu zolanga beni: ‘Nzambi wuzola beni batu va nza, diawu kafidila Mwan’andi wumweka to mwingi woso wu kunlekila kiminu kabika lalakana, vayi kabaka luzingu lu mvu ka mvu.’ (Yoane 3:16) Khudulu yi Yesu, yitu monisa ti nandi mvandi wutu zolanga, ayi luzolo beni lutu kindisa. Kibibila kintuba ti vasi ko ‘ziphasi,’ ni kyuma kilenda “kutu vambisa mu luzolo lu Klisto.”​—Loma 8:35, 38, 39.

9 Khumbu zinkaka, tummonikinanga mambu ma tuvongisa mu kinsuni, mu mabanza voti matu botulanga mayangi ma kusadila Yave. Vayi kutebuka moyo luzolo lungolu Klisto kadi mu befu, kulenda kutu vana mangolo mwingi tukindama. (Tanga 2 Kolinto 5:14, 15.) Luzolo lu Yesu lutu vanga tutomba tatamana kuzinga ayi kusadila Yave. Mawu malenda kutu sadisa tubika vonga kheti bo tuntovuka mu kibila ki bivuka, mu kibila ki kiminu kitu, kyunda voti mambu ma tutula dibamu.

 ZIKHOMBA ZITU BANTOMBANGA LUZOLO LWITU

Kulonguka kifwani ki Yesu kulenda kusadisa (Tala bitini bi matangu 10, 11)

10, 11. Nani widi kiyeku ki kukindisa zikhomba badi mu kyunda? Sudikisa.

10 Yave wunsadilanga mvandi kimvuka ki Baklisto mwingi kutu kindisa mu luzolo. Bo tunzola zikhomba zitu zyoso, befu tummonisanga luzolo twidi mu Yave. Befu tufweti vanga dyoso dyambu mwingi kusadisa zikhomba zitu kuzaba ti bawu luvalu badi ayi Yave wuku bazolanga. (1 Yoane 4:19-21) Mvwala Polo wusonika: ‘Lutatamana kukindasana ayi kubombasana benu na benu, dedi bo lweti vangila.’ (1 Tesalonika 5:11) Basi ko to bakulutu ba kimuvuka balenda vanga mawu. Vayi kadika mutu mu befu, kalenda landakana ntungulu wu Yave ayi Yesu wu kuvana mbombolo kwidi zikhomba zitu zyoso.​—Tanga Loma 15:1, 2.

11 Bankaka mu kimvuka bantovukanga mu kibila ki kyunda kingolu voti dibamu, ayi balenda tomba lusalusu lu minfelimi ayi bilongu. (Luka 5:31) Bakulutu ba bimvuka ayi zikhomba zinkaka, bazebi ti kheti basi ko bakubama mwingi kusadisa buboti zikhomba azyozi, lusalusu ayi mbombolo balenda kuba vana, nkinza beni yidi. Baboso mu kimvuka balenda ‘bomba batu badi mu kyunda, kusadisa batu balebakana, kuvibidila batu boso.’ (1 Tesalonika 5:14) Befu tutidi visa buboti mabanza ma zikhomba zitu. Tufweti kuba monisa mvibudulu ayi kukolukila mu phila bawu bankwiza bakila mbombolo mu thangu badi mu kyunda. Ngye wumvanga mangolo mwingi kukindisa bankaka? Mbi wulenda vanga mwingi wubwela vana bankaka mbombolo ayi khindusulu?

12. Vana kifwani ki mutu wubaka khindusulu mu luzolo lukyedika zikhomba mu kimvuka bammonisa.

12 Khomba mweka yinkyeto ku Europa  wutuba: “Khumbu zinkaka minu yimbanga mayindu ma kuyivonda miveka, vayi yintambulanga lusalu lumboti. Zikhomba mu kimvuka ba kutsadisanga ayi bavukisa moyo’ami. Bawu ba kumbonisanga luzolo ayi baku khindisanga. Kheti batu balwelu to bazebi ti yimbanga beni kyunda kingolu, vayi zikhomba mu kimvuka badi yami thangu zyoso. Bakwela bamweka mu kimvuka kitu badi buka matata mami ma kiphevi. Bawu ba kukhyebanga, ayi thangu zyoso badi bakubama mwingi kutsadisa.” Tuzebi ti befu boso tulendi nunga ko kusadisila bankaka mu phila yimweka. Vayi befu boso tulenda vanga mangolo mwingi kusadisa zikhomba zitu zyoso. * (Tala Matangu madi va wanda.)

BWIDI BU KUKINDISILA BANKAKA MU LUZOLO?

13. Mbi tufweti vanga mwingi tubomba bankaka?

13 Ba wukubama mu kuwa. (Yakobi 1:19) Tummonisanga luzolo befu kukuwanga bankaka mu luzolo. Vana byuvu mu luzolo bilenda kusadisa kuzaba mabanza ma khomb’aku. Nandi wela zaba ti ngye wukumvwa nkinza mu bukyedika mu kutala kizizi kyaku. Ngye kumona ti khomba wuntomba ku kuzibudila ntim’andi, monisa mvibudulu mwingi wubika kunzenga mambu kantuba. Ngye kuba wukubama mu kukuwa, wulenda luta kumvisa ayi kunsadisa kaluta kufyatila. Kuvanga mawu, kwala vanga mutu beni kayuwa malongi wela kumvana bo wumvanga mangolo ma kunsadisa. Bo ngye wumvwa nkinza bankaka, mawu malenda kuba vana mbombolo.

14. Kibila mbi tufweti bika kifu ki kutubilanga batu bubi?

14 Bika kuba kifu ki kutubilanga bankaka bubi. Mutu widi kyunda kingolu kalenda luta mona kyunda na kuzaba ti befu tukuntubila bubi mu kibila ki mabanza mandi. Mawu malenda tula nkaku tununga kunsadisa. ‘Kukoluka mu khambu yindula, kwidi buka kulweka mu mbedi, vayi ludimi lu nkwa ndwenga lwidi mbukulu.’ (Zingana 12:18) Kheti tuyindulanga ko kulweka mutu widi mabanza ma kyunda mu mambu tunkoluka, vayi tulenda tatamana kuntwadisa kyunda befu koluka mambu mu khambu yindula. Mwingi tusadisa khomb’itu, tufweti kumvanga kakikinina ti tumvanga mangolo mwingi kuvisa mambu kamvyokila.​—Matai 7:12.

15. Bisadulu mbi bi luvalu tulenda sadila mwingi kubomba bankaka?

15 Sadila Dyambu di Nzambi mwingi wubomba bankaka. (Tanga Loma 15:4, 5.) Kibibila yidi buku yifumina kwidi “Nzambi tho yi mvibudulu ayi yi [mbombolo],” diawu tulendi kwituka ko kumona ti tumbaka mbombolo mu mambu madi muawu. Mvandi twidi, Índice das Publicações da Torre de Vigia ayi Guia de Pesquisa para Testemunhas de Jeová. Befu sadila bisadulu abyobi, tulenda bakula matangu ayi bilongulu tulenda sadila mwingi kubomba ayi kukindisa zikhomba zitu zyoso.

16. Zikhadulu mbi zyela tusadisa kusadisa mutu widi mu kyunda?

16 Ba ntima wu kyadi ayi buphombu. Yave widi ‘Tata yi nkwa nlemvu ayi Nzambi wumbombanga mu mambu moso,’ ayi nandi widi mvandi ‘nkwa kyadi’ kwidi bisadi byandi.  (Tanga 2 Kolinto 1:3-6; Luka 1:78; Loma 15:13) Mvwala Polo wutuvana kifwani kimboti mu mambu beni, bila nandi wulandakana kifwani ki Yave. Nandi wusonika: ‘Befu tuyiza ba batu ba buphombu va khat’inu, buka ngudi wunkwemika ayi wunkyeba buboti bana bandi. Mu kibila ki luzolo luwombu twidi mu benu, tubaka makani bika to ma kuluzabikisa zitsangu zimboti zi Nzambi, vayi mwingi kuluyekudila luzingu lwitu, kibila tuluzolanga beni.’ (1 Tesalonika 2:7, 8) Befu monisa kyadi dedi bo Yave kammonisinanga, tulenda ba buka mvutu wu minsambu zikhomba zitu bamvanganga.

17. Phila mbi yi kutadila zikhomba zitu yinkwiza tusadisa kuba kindisa?

17 Bika kuvingila zikhomba zyaku baba batu bavedila. Tadila mambu dedi bo madidi. Bila ngye kutomba zikhomba zyaku baba bavedila, wela banga beni kyunda. (Mpovi 7:21, 22) Tebuka moyo ti Yave kavingilanga ko tuba mavanga mavedila. Diawu tufweti monisa mvibudulu befu na befu. (Efeso 4:2, 32) Twisintomba ko kuvanga zikhomba zitu kumona ti basimvanga ko mangolo, ayi tubika kuba dedikisa na batu bankaka. Vayi, tuba kindisa ayi tuba sadisa kumona mambu mamboti bannunga kuvanga. Mawu malenda kuba sadisa kuba mayangi ayi kusadila Yave.​—Ngalatia 6:4.

18. Kibila mbi tufweti tombila kukindisa bankaka mu luzolo?

18 Kadika mutu mu bisadi bi Yave widi beni luvalu kwidi nandi ayi kwidi Yesu. (Ngalatia 2:20) Tunzolanga beni zikhomba zitu zyoso, diawu tufweti kuba kyebila buboti. Tufweti “tomba mambu mannatanga ndembama ayi momo meti kutu kindisa.” (Loma 14:19) Befu boso tumvingila mu mayangi mu thangu twala zinga ku Paladizu, bila ni mutu kalasa bwe ba ko kibila ki kubela mu kyunda! Kwalasa bwe ba ko bimbevu bingolu ayi mimvita. Batu balasa bwe fwa ko mu kibila ki bimbevu tumbakanga mu kibila ki masumu, kwalasa bwe bako zithotolo mu kibila ki kiminu, mambu mu makanda, voti kyunda mu luzingu. Kutsuka bivevi bi mimvu, batu boso va ntoto bela ba bavedila. Bo bela kwikama mu thotolo yitsuka, bela ba bana ba Yave va ntoto ayi bala baka ‘kiphwanza ki nkembu wu bana ba Nzambi.’ (Loma 8:21) Diawu, tumonisanu luzolo lunkindisanga ayi tuyisadisa befu na befu tuvuka mwingi tukota mu nza yimona Nzambi kala twala.

^ Lut. 6 Tala kapu 24 yi buku Achegue-se a Jeová.

^ Lut. 12 Mwingi wusadisa bo badi mayindu ma kutomba kuyivonda, tanga malongi madi mu Despertai!: Por Que Continuar? Três Razões Para Não Desistir da Vida,” (Ngonda Yinna 2014); “Já Pensou Alguma Vez Em Desistir da Vida?”, (Ngonda Yitheti 2012); ayi “Vale a Pena Viver” (22 Ngonda Yikumi, 2001).