Skip to content

Skip to table of contents

Mayangi Kwidi Bo Bansadilanga ‘Nzambi yi Mayangi’

Mayangi Kwidi Bo Bansadilanga ‘Nzambi yi Mayangi’

‘Mayangi kwidi dikabu di batu dyodi Nzambi kadidi Yave!’​MINKUNGA 144:15.

MINKUNGA: 44125

1. Kibila mbi Zimbangi zi Yave badi batu ba mayangi? (Tala foto yidi va thononu.)

ZIMBANGI ZI YAVE badi batu ba mayangi. Kheti badi va kimweka mu zikhutukunu ziawu mu kimvuka, mu zikhutukunu zi mavula voti bo bamvyokisa thangu va kimweka, bankolukanga ayi banseva beni bawu yi bawu. Kibila mbi badidi beni mayangi? Bila bawu bazebi Yave, ‘Nzambi yi mayangi.’ Bawu banlandakananga kifwani kyandi ayi ba kunsadilanga. (1 Timoteo 1:11; Minkunga 16:11) Yave bo kadi Tho yi mayangi, nandi tidi befu mvitu tuba mayangi ayi wutu vana bibila biwombo mwingi tuyangalala.​—Deutelonomi 12:7; Mpovi 3:12, 13.

2, 3. (a) Mayangi buna mbi? (b) Kibila mbi dilenda bela dyambu diphasi kuba mayangi?

2 Abu ngyewu? Widi mayangi makyedika? Kuba mayangi kunsundula kuba buboti, kukikinina luzingu lwaku dedi bo lwididi voti kukwangalala beni. Kibibila kimmonisa ti batu bantambula lusakumunu kwidi Yave, balenda baka mayangi makyedika. Vayi kibila mbi dilenda bela dyambu diphasi kuba mayangi mu nza ayiyi?

 3 Dilenda ba dyambu diphasi kubaka mayangi boti tube fwilu mutu tunzolanga voti bamvayikisidi mu kimvuka, bo tumvambana va dikwela, voti ba tubotudi mu kisalu. Dilenda ba mvandi dyambu diphasi kubaka mayangi boti twisi ko ndembama ku nzo mu kibila ki mambu maphasi, bo batu bansalanga yitu voti bankotanga yitu kikola ba kutu vweza, voti ba kutu thota mu kibila ki kiminu kitu ayi kutu tula mu buloku bo twidi bisadi bi Yave. Ḿba buvinya bwitu bwisi ko bumboti, twidi kimbevu kingolu, voti kyunda kingolu. Vayi tebukanga moyo ti Yesu Klisto, ‘mutu wu mayangi ayi widi Mangolo,’ voti Ntinu, wunzolanga kuvana mbombolo ayi mayangi kwidi batu. (1 Timoteo 6:15; Matai 11:28-30) Mu malongi kavana va Mbata Mongo, Yesu wutubila zikhadulu ziwombo zilenda tusadisa tubaka mayangi kheti bo tumvyokila mu mambu ma phasi mu nza yi Satana.

TULENDI BA KO MAYANGI BEFU KHAMBU YAVE MU LUZINGU LWITU

4, 5. Mbi tufweti vanga mwingi tuba mayangi ayi mwingi mawu makadidila?

4 Dyambu ditheti Yesu katuba, nkinza beni didi. Nandi wutuba: Mayangi kwidi bo bazebi zitsatu ziawu mu mambu ma Nzambi, bila bawu bavwidi Kintinu ki Diyilu.’ (Matai 5:3) Boti befu tuzebi zitsatu zitu mu mamu ma Nzambi, buna twala kikinina ti tufweti zaba Nzambi ayi tuntomba lusalusu ayi thwadusulu’andi. Bwidi tulenda monisina mawu? Mu kulongukanga Kibibila, kutumukina Nzambi, ayi kutula mbwongimini’andi va theti mu luzingu lwitu. Kuvanga mambu amomo, kwala tusadisa kubaka mayangi. Kiminu kitu mu zikhanu zi Nzambi, kyela bwela kinda. Ayi ‘dyana di mayangi’ didi mu Kibibila dyala kutu kindisa.​—Tito 2:13.

5 Boti tutidi kubaka mayangi makyedika, kheti mu mambu moso tumvyokila mu luzingu, tufweti tatamana kukindisa kikundi kitu na Yave. Mvwala Polo wusonika: ‘Luyangalala thangu zyoso mu Mfumu. Yela bwela tuba, Luyangalala!’ (Filipi 4:4) Mwingi tubaka kikundi kimboti na Yave, tufweti ba ndwenga yi Nzambi. Dyambu di Nzambi dintuba: ‘Mayangi kwidi mutu wumbaka ndwenga ayi kwidi mutu wumbaka nzayilu. Yawu yidi buka nti wu moyo kwidi bantatamana mu yawu, ayi bo bansimbidilanga mu yawu bela tedulu batu ba mayangi.’​—Zingana 3:13, 18.

Mwingi tubaka mayangi mankadidila, nkinza beni kutatamana kusadila mambu tunlongukanga

6. Mbi binkaka tufweti vanga mwingi tubaka mayangi mankadidila?

6 Vayi, mwingi tubaka mayangi mankadidila, nkinza beni kutatamana kusadila mambu tunlongukanga mu Kibibila. Mwingi kumonisa ti nkinza beni kusadila mambu tunlonguka, Yesu wutuba: ‘Boti luzebi mambu amama, lwela baka mayangi benu sadila mawu.’ (Yoane 13:17; tanga Yakobi 1:25.) Nkinza beni kuvanga mawu boti tutidi kudukisa zitsatu twidi mu mambu ma Nzambi ayi kutatamana bayangalala. Vayi bwidi tulenda bakila mayangi bo twidi  mambu mawombo malenda botula mayangi mitu? Ndoko tumona mbi Yesu kabwe tuba mu dilongi kavana va Mbata Mongo.

ZIKHADULU ZI TUTWADISANGA MAYANGI

7. Bwidi batu bandilanga balenda bakila mayangi?

7 Mayangi kwidi batu bandilanga, bila bela bombo.’ (Matai 5:4) Ḿba tulenda yikuvusa, ‘Bwidi batu bandilanga balenda bakila mayangi?’ Yesu kabasa tubila ko batu boso bandilanga voti bamvyokila mu ziphasi. Bila vadi batu bawombo bambi mvandi bandilanga voti badi kyunda, bila bamvyokila mu mambu ma phasi ma ‘thangu ayiyi yi ziphasi’ tunzingila. (2 Timoteo 3:1) Vayi bawu banyindulanga to zitsatu ziawu veka, bika ti Yave, diawu bakhambu bakila mayangi ayi kikundi kimboti na Yave. Yesu wuba tubila matedi batu bazebi zitsatu ziawu mu mambu ma Nzambi. Bawu bandilanga bila bammonanga batu bawombo bammanga Nzambi ayi bakhambu zingilanga mu phila Nzambi katidi. Bawu bazebi mvandi ti badi batu basumuka ayi bammonanga mambu mambi ma tukwizilanga mu nza ayiyi. Yave wummona manyonga ma batu beni, wuku babombanga mu kusadila Dyambu dyandi, ayi wuku bavana mayangi ayi moyo.​—Tanga Yehezekeli 5:11; 9:4.

8. Bwidi kuba ntima wulembama kulenda kusadisila wuba mayangi?

8 ‘Mayangi kwidi batu badi mintima milembama, bila bawu bela tambula ntoto banga kyuka.’ (Matai 5:5) Bwidi kuba ntima wulembama kulenda kusadisila wuba mayangi? Batu bawombo badi makhema ayi buphunya, ayi mawu malenda twadisa ziphasi mawombo. Vayi bo banlonguka kyedika, bawu bamvilulanga madyela ayi bamvwatanga “kimutu kimona.” Bubu, bawu bammonisa “kyadi, mamboti, kukikulula, lembami, ayi mvibudulu.” (Kolosai 3:9-12) Mu kibila beni, bawu badi ndembama, badi kikundi kimboti na Yave, ayi badi mayangi. Mvandi, Dyambu di Nzambi dinkanikisa ti bawu bela “tambula tsi banga kiuka.”​—Minkunga 37:8-10, 29.

9. (a) Mbi Yesu kaba tomba kutuba bo katuba ti ‘batu badi mintima milembama bela tambula ntoto banga kiuka’? (b) Kibila mbi batu badi ‘nzala ayi phwila yi mambu masonga’ balenda bela mayangi?

9 Mbi Yesu kaba tomba kutuba bo katuba ti ‘batu badi mintima milembama bela tambula ntoto banga kiuka’? Minlandikini mi Yesu misolo mu pheve yinlongo, bela tambula ntoto banga kiuka mu thangu bela yala yandi buka mintinu ayi zinganga Nzambi. (Nzaikusu 20:6) Bivevi bi batu bankaka bela khambu kwenda ku diyilu, bela tambula ntoto banga kiuka bo bela tambula nswa wu kuzingila muawu mvu ka mvu. Bawu bela ba bavedila ayi bela baka ndembama ayi mayangi. Batu abobo, bawu mvandi Yesu katubila: ‘Mayangi kwidi batu badi nzala ayi phwila yi mambu masonga.’ (Matai 5:6) Phwil’awu yi mambu masonga yela mana bo Yave kela manisa mambi moso. (2 Petelo 3:13) Mu nza yimona, batu basonga bela baka mayangi ayi balasa bwe dila ko mu kibila ki mambu mambi batu bamvanganga.​—Minkunga 37:17.

10. Mbi binsundula kuba nkwa kyadi?

10 ‘Mayangi kwidi bankwa kyadi, bila bela kuba mona kyadi.’ (Matai 5:7) Kuba nkwa kyadi kunsundula kukwazuka mu mabanza, kuba nkwa nlemvu, kumona kyadi mu ziphasi zi batu bantovuka. Vayi, kuba kyadi kulutidi mabanza ma khati  ntima. Kibibila kinlonga ti kuba nkwa kyadi kunsundula mvandi kuvanga dyoso dyambu mwingi kusadisa bankaka.

11. Mbi tulenda longuka mu kinongu ki dibakala musi Samalia?

11 Tanga Luka 10:30-37. Kinongu ki Yesu kitedi musi Samalia, kimmonisa mu bukyedika mbi binsundula kuba nkwa kyadi. Dibakala musi Samalia wumona kyadi ayi kyunda kwidi dibakala diba mu ziphasi, diawu katombila kunsadisa. Bo kamana ta kinongu beni, Yesu wutuba: ‘Yenda ayi vanga mvandi mawu.’ Diawu, tulenda yikuvusa befu veka: ‘Minu mvami yidi mu kuvanga mawu? Yidi mu kuvanga mambu musi Samalia kavanga? Yilenda vanga kyoso kyuma mwingi kusadisa bankaka bo bantovuka? Dedi, yilenda sadisa biboba mu kimvuka, mimfwizi ayi bo matata mawu bakhambu sadila Yave? Yilenda ‘yoluka mambu mambombanga batu badi mu kyunda’ mwingi kuba kindisa?’​—1 Tesalonika 5:14; Yakobi 1:27.

Baka makani ma kusadisa bankaka, ayi wela mona mayangi madi mu kuvanga mawu (Tala lutangu 12)

12. Kibila mbi tumbakilanga mayangi befu monisa kyadi?

12 Kibila mbi tumbakilanga mayangi befu ba nkwa kyadi? Bo tummonisa kyadi kwidi bankaka, befu twidi mu kukabila, ayi Yesu wutuba ti kuvana, kuntwadisanga mayangi. Mvandi tuzebi ti tunkwangidika Yave. (Mavanga 20:35; tanga Ebeleo 13:16.) Ntinu Davidi wutubila matedi mutu wummonisanga kyadi: ‘Yave wela kunlunda ayi wela kunkyeba mwingi katatamana kuzinga. Nandi wela tedolu mutu wu mayangi va ntoto.’ (Minkunga 41:1, 2) Befu monisa kyadi kwidi bankaka, Yave mvandi wala kutu monisa kyadi ayi tulenda baka mayangi mankadidila.​—Yakobi 2:13.

KIBILA MBI BATU “BADI MINTIMA MIVEDILA” BADI MAYANGI?

13, 14. Kibila mbi didi dyambu dinkina kuba ‘ntima wuvedila’?

13 Yesu wutuba: ‘Mayangi kwidi batu badi mintima mivedila, bila bela mona Nzambi.’ (Matai 5:8) Mwingi mintima mitu miba mivedila, tufweti tatamana kuba mayindu ayi zinzinunu zivedila voti zimboti. Nkinza beni kuvanga mawu mwingi Yave kakikinina mbwongimin’itu.​—Tanga 2 Kolinto 4:2; 1 Timoteo 1:5.

 14 Batu badi mintima mivedila balenda baka kikundi kimboti na Yave, ayi nandi wutuba: ‘Mayangi kwidi batu bansukulanga minledi miawu.’ (Nzaikusu 22:14) Mbi binsundula bawu ‘basukula minledi miawu’? Kwidi Baklisto basolo, mansundula ti Yave wuku bamona banga batu bavedila, nandi wala bavana luzingu lu khambu bwe fwa ku diyilu, ayi bawu bela baka mayangi. Vayi kwidi mamemi mankaka, badi kivuvu ki kuzinga va ntoto, mawu mansundula ti Yave wuku bavana lwaku lu kuba bakundi bandi, bila nandi wuku bamona banga batu basonga. Kibibila kintuba ti ‘bawu bansukula minledi miawu ayi kukitula miawu miphembi mu menga ma Mwana Dimemi.’​—Nzaikusu 7:9, 13, 14.

15, 16. Bwidi batu badi mintima mivela balenda ‘mwena Nzambi’?

15 Yave wutuba: ‘Ni mutu kalendi kumbona ko ayi kutatamana kuzinga.’ (Esodu 33:20) Bwidi batu badi mintima mivedila balenda ‘mwena Nzambi’? Mu Kingeleko kikuma basadila mwingi kutuba ‘kumona,’ kilenda sundula mvandi ‘kuyindula, kuvisa, voti kuzaba.’ Diawu, ‘kumona Nzambi’ kunsundula kuvisa phila Mutu mbi nandi kadi ayi kuzola zikhadulu zyandi. (Efeso 1:18) Yesu wulandakana buboti zikhadulu ziduka zi Nzambi, diawu katubila: “Woso wumbueni, mueni Tata.”​—Yoane 14:7-9.

16 Befu ‘tummona Nzambi’ bo tummona phila nandi katu sadisilanga mu luzingu lwitu. (Yobi 42:5) Mvandi tulenda ‘mona,’ voti kutsikika mayindu mu mambu mamboti Yave kakanikisa kuvangila kwidi batu bantatamana kuba mintima mivedila ayi ba kunsadila mu lukwikumunu. Ayi Baklisto basolo bala mona Yave mu thangu bawu bamvulubuka ayi bankwenda ku diyilu.​—1 Yoane 3:2.

TULENDA BAKA MAYANGI KHETI TUMVYOKILA MU MAMBU MAPHASI

17. Kibila mbi bankwa ndembama badi mayangi?

17 Yesu wubwe tuba: ‘Mayangi kwidi minlembami.’ (Matai 5:9) Bo tumbaka makani ma kudedikisa mambu ayi bankaka, befu tulenda baka mayangi. Mvwala Yakobi wusonika: “Batu bobo bansalanga mu diambu di ndembama bankunanga mbutu wusonga wu ndembama.” (Yakobi 3:18) Boti wisi ko beni kikundi kimboti ayi khomba mu kimvuka voti ayi musi dikanda dyaku, wulenda dinda mu nsambu mwingi Nzambi kasadisa wuba nkwa ndembama. Ngye vanga mawu, Yave wala kuvana phevi’andi yinlongo, ayi yawu yela kusadisa kumonisa zikhadulu zi Baklisto, ayi ngye wala luta ba mayangi. Yesu wumonisa nkinza wu kadika mutu kubaka makani ma kudedikisa mambu bo katuba: ‘Boti telimini mwingi kukabila Nzambi makaba maku ayi tebukidi moyo ti khomb’aku diambu kadi kwidi ngyewu, muna bika makaba maku vana ntwala, ayi yenda. Dedikisa theti mambu ayi khomb’aku, bosi vutuka ayi makaba maku kwidi Nzambi.’​—Matai 5:23, 24

Pheve yi Yave yela kusadisa kumonisa zikhadulu zi Baklisto, ayi ngye wala baka mayangi

18, 19. Kibila mbi Baklisto balenda kwangalala kheti badi mu kuvyokila mu zithotolo?

 18 ‘Mayangi kwidi benu boti ba kulufinganga, ba kuluyamisanga ayi ba kuluvuninanga mambu mambi ma phila mu phila mu kibila kyami.’ Mbi Yesu kaba tomba kutuba? Nandi wubwe tuba: ‘Luyangalala ayi lumona beni nyenzi, bila mfutu wunneni wukuluvingila ku diyilu; luzaba buboti ti mimbikudi mi lutuamina mvawu bayamusu.’ (Matai 5:11, 12) Mu thangu bapostolu baba bula ayi baba kandika babika kusamuna, ‘bawu babotuka vantuala lukutukunu lu minyadi mu mayangi.’ Bawu basa ba ko mayangi mu kibila ki khuba. Vayi, bayangalala ‘bila bamonikina ti bafweni mona ziphasi mu kibila ki dizina di Yesu.’​—Mavanga 5:41.

19 Bubu, dikabu di Yave mvandi bankindamanga mu mayangi bo bammonikina zithotolo mu kibila ki dizina di Yesu. (Tanga Yakobi 1:2-4.) Dedi bapostolu, befu mvitu tuzolanga ko kutovuka. Vayi befu tatamana bakwikama kwidi Yave, nandi wela tuvana kibakala tuntomba mwingi kukindama. Tala mambu mamonikina Yaya Henry Dornik ayi khomb’andi. Mu Ngonda Yinna, mvu 1944, baba kotisa ku buloku bu ngolu. Batu baba kuba thota batuba: “Dyambu diphasi beni kuba vukumuna mwingi bavanga dyoso dyambu dimbi. Kheti bazebi ti bankwiza fwa, bawu bantatamana mu mayangi.” Yaya Dornik wusudikisa: “Kheti yisintomba ko kufwa, vayi kutovuka mu kibakala mu kibila ki lukwikumunu lwami kwidi Yave, ku kuthwadisa mayangi.” Nandi wubwe tuba: “Kuvanga minsambu, kutsadisa yiluta fikama Yave, ayi nandi wumonisa ti widi Nsadisi wukyedika.”

20. Kibila mbi twidi mayangi mu kusadila ‘Nzambi yi mayangi’?

20 Bo Yave, ‘Nzambi yi mayangi’ kankwangalala mu kibila kitu, befu tulenda baka mayangi kheti tumvyokila mu zithotolo, boti dikanda ditu di tubalukila mu kibila ki kiminu kitu, bo tumbela voti mu kibila ki bununu. (1 Timoteo 1:11) Mvandi tulenda baka beni mayangi bila Nzamb’itu, wowo “wulendi vuna ko” wutu kanikisa mambu mawombo mamboti. (Tito 1:2) Bo Yave kela dukisa zikhanu zyandi, twalasa bwe tebuka ko moyo ziphasi tumvyokila bubu. Tulendi yindula ko bwidi luzingu lwela bela lumboti ku Paladizu ayi bwidi twala zingila mu mayangi! Bukyedika, twala “monanga [mayangi] mu ndembama yiwombo.”​—Minkunga 37:11.