Delphine ni faan kan weliy murung’agen ko fa binem e article e guy ni bochan gelngin e mochuch ni be tay, ma aram e n’en ni k’aring ni nge adag ni nga i unum nib pag rogon. Der yog e Bible nib kireb ni ngan unum buchuuw ban’en ni bay e alkul riy, machane be gaar: “Dab um chag ngak e girdi’ ni tamuun rrum.” (Proverbs 23:20) Unum nib pag rogon e ma k’aring boch e m’ar nib ubchiya’, ma ma kirebnag thiliy, maku ma yim’ bokum milyon e girdi’ riy u gubin e duw. Machane, faanra fol e girdi’ ko fonow u lan e Bible ni bay e gonop riy, ma aram e rayog ni ngan siyeg e pi magawon ney.

Aram e n’en ni rin’ Delphine, ma nga tomuren me gaar: “Kug nang nder yag ni nge chuweg e alkul e mochuch ni gu be tay. Ere, kug fol ko fare thin ni bay ko Filippi 4:6, 7, ni be gaar: ‘Dariy ban’en ni nge magafan’med ngay, machane . . . um meybilgad ngak Got mi gimed ning ngak e tin ni nge yog ngomed.’ Gubin e nep’ u nap’an ni gu ra guy ni aram e ke tabab ni nge magafan’ug ma gu be mochuch, ma aram mug meybil ngak Jehovah ni nge ayuwegeg. Gu ma weliy ngak urngin ban’en ni bay u lanin’ug, nib muun ngay e damumuw, nge kireban’ ni gu be tay, nge pi n’en ni ke muleg lanin’ug, ma gu ma wenig ngak ni nge ayuwegeg ni nggu lemnag boch ban’en nib fel’. Nap’an nra kakadbul, ma aram mug guy rogon ndab kug lem ni aram rogon. Re n’ey ni gu ma rin’ e ayuwegeg ni nggu lemnag e pi n’en ni ka bay rog ko bin ni nggu lemnag e pi n’en ni ke mul u paag. Gu dugliy ndakuriy biid ni nggu unum ban’en ni bay e alkul riy. Rib ga’ fan u wan’ug ni ke yag ni nge gapas lanin’ug, ere dabug ni nggu rin’ ban’en nra chuweg e re gapas nem rog.”

Ngongol ndarngal e aram reb e magawon ni ma k’aring e kireban’ nib gel ko girdi’. Machane, rayog ni nge ayuwegdad  e pi kenggin e motochiyel u Bible ni ngad siyeged boch e ngongol nra k’aringdad ni ngad uned ko ngongol ndarngal ni bod rogon ni ngaum ngongol ara ngaum thin i gosgos ngak be’ ni nge m’ug riy ni ga baadag facha’ ara ga baadag ni ngam parew, ara ngaun yaliy yaan e ngongol ni puwlag. Reb e pagel ni Samuel fithingan e yog ni gaar: “Rib mom ni ngaug ngongol ara ngaug thin i gosgos ngak be’ ni nge m’ug riy ni gu baadag facha’ ara gu baadag ni nggu parew. Bay yu ngiyal’ ni gu baadag ni nggu rin’ e re n’ey ni gathi bochan e gu baadag facha’ ya bochan e gu be guy ni baadageg.” I guy Samuel ni mus ni faanra der lemnag ni nge rin’ e re ngongol ney, machane ka be yog e girdi’ ni be rin’. Ere, bochan e re n’ey ma aram me dugliy ni nga i rin’ e re ngongol ney ni lem rok. Machane, i tabab ni nge magawon laniyan’ ni bochan e re n’ey. I yog ni gaar: “Rib kireb e biney e ngongol ya rayog ni nge k’aring be’ ni nga i rin’ boch ban’en nra m’ug riy ni kemus ni yigoo ir e be lemnag ir.”

I beeg Samuel reb e article ni kan ngongliy ni fan ko piin fel’ yangaren ni bay ko fare website ni jw.org. Ki lemnag fare thin ni bay ko Proverbs 20:11 (BT) ni be gaar: “Mus ko bitir ni ma m’ug ko ngongol rok ko ba miti mang girdi’; rayog ni nga mog ko ba yul’yul’ mab manigil fa.” Uw rogon ni ayuweg e re n’ey? I nang Samuel nde fel’ e binem e ngongol ni be rin’ maku be m’ug riy nde yul’yul’. I yog ni gaar: “Maku reb e, kug fil nreb e fel’ yangaren ni ma ngongol ma ma thin i gosgos ngak be’ ni nge m’ug riy ni baadag facha’ ara baadag ni ngar parew, e ra munmun ma ra i rin’ boch e ngongol nib kireb nra yib wenegan ngak u nap’an nra un ko mabgol. Gu tabab i lemnag murung’agen e re pin ni gu ra leay boch nga m’on nge rogon e lem rok ni faanra i guyeg ni gu be rin’ e biney e ngongol ngak yugu reb e ppin. Re n’ey e ayuwegeg ni nggu nang nib kireb e biney e ngongol ni kug mecham ngay. Bochan nib mom ni ngaug rin’ e biney e ngongol, ma gathi aram e be yip’ fan nib fel’ ni ngaug rin’.” Ere, thilyeg Samuel e ngongol rok. Bochan ni ke tal ndaki rin’ e re ngongol ney, ma aram e n’en ni ke ayuweg ni nge siyeg e ngongol ndarngal.  

Antonio e ku bay reb e ngongol ni i rin’ nrayog ni nge k’aring ni nge un ko ngongol ndarngal. Ke mecham ngak ni nga i yaliy yaan e ngongol ni puwlag. Yugu aram rogon nib mabgol ma rib t’uf leengin rok, machane i guy ni ke mecham ngak ni nga i yaliy yaan e mit ney e ngongol ni gubin ngiyal’. I yog ni bochan ni i lemnag fare thin u 1 Peter 5:8, ma rib ga’ e ayuw ni pi’ ngak. Re thin nem e be gaar: “Mu tedan’med mi gimed ayuwegmed! Yi moonyan’ ni ir e toogor romed e yugu be yan ni bod ba layon ni be tolul, ni be gayiy be’ ni nge longuy.” I yog Antonio ni gaar: “Gubin yang u fayleng ni ke sug yaan e ngongol ni puwlag riy, ma pi n’ey e rayog ni nge par u lanin’uy ndabi chuw. I ayuwegeg e re thin nu Bible ney ni nggu lemnag e en ni ma waliyey i yan ko mit ney e ngongol. Gu fil rogon ni nggu gurnageg ni nggu nang ni pi yaan e ngongol ni puwlag nem e ke yib rok Moonyan’. Chiney e kug nang ni kemus ni yigoo Jehovah e rayog ni nge ayuwegeg ni nggu ‘tiyan’ug mug ayuw’ ya nge yag nug chuweg e binem e ngongol u lanin’ug, ngu gum’irchaeg, ngu lan e mabgol rog.” Kan ayuweg Antonio ko n’en nib t’uf ni ngan ayuweg riy. Bochan e re n’ey ma ke yag ni nge taleg e biney e ngongol nib kireb ni ke mecham ngay. Angin ni ke yib riy e ke yag ni nge siyeg boch e ngongol nib gel e kireb riy.

Ba tamilang ni bay boch e fonow nib fel’ u lan e Bible nrayog ni nge ayuwegdad ni ngad siyeged boch e magawon nib gel e kireb riy. Machane, uw rogon e tin baaray e magawon ni kad mechamgad ngay ni ke mo’maw’ ni ngad digeyed? Chiney e ngad weliyed rogon nrayog ni nge ayuwegdad e Thin rok Got ni ngad pithiged boch e magawon ni aray rogon.