1, 2. Mang deer e ke sum ni bochan e n’en ni yog Jesus ni bay ko Matthew 24:14?

 DEMTRUG ko baadag e girdi’ ni ngar motoyilgad ngodad fa danga’, ma boor e girdi’ ni ka rogned ni goo yimanang e Pi Mich Rok Jehovah ni bochan e machib ni yad ma tay. Rayog ni sana kam mada’nag boch e girdi’ u nap’an e machib ni yad ma yog nde mich u wan’rad e pi n’en ni gad ma machibnag, machane yad be tay fadad ni bochan e re maruwel ney ni gad be rin’. Gad manang ni yiiynag Jesus ni fare thin nib fel’ ni murung’agen Gil’ilungun Got e yira machibnag u ga’ngin yang e fayleng. (Matt. 24:14) Machane, uw rogon ni kad nanged nre maruwel ney ni gad be rin’ e be lebguy fare thin ni yiiynag Jesus? Gur, bay mat’awdad ni nga dogned ni gad e piin ni gad be rin’ e re maruwel nem?

² Boor raba’ e teliw ni yad ma lemnag ni yad e piin ni yad be machibnag e thin ni bay ko fapi Gospel ara fare thin nib fel’. Machane, ba ga’ ni kemus ni yad ma pi’ boch e welthin u galesiya rorad, ara u TV, ara u Internet, ara ra weliyed ko girdi’ rogon ni kar filed murung’agen Jesus. Boch i yad e ma lemnag ni faan yad ra ayuweg e piin ni yad be  gafgow ara ra manged boch e togta, nge kangof, ara sensey ni ngar ayuweged e girdi’ ma aram e yad be machib. Machane gur, ireray e n’en ni tay Jesus chilen ngak pi gachalpen ni ngar rin’ed?

3. Mang aningeg ban’en nthingari rin’ pi gachalpen Jesus nrogon ni kan tamilangnag ko Matthew 28:19, 20?

³ Gur, kemus ni nge par pi gachalpen Jesus ngar sonnaged e girdi’ ni ngar bad ngorad? Danga’, ya tomuren nni faseg ko yam’ me non ngak bokum miriay i gachalpen ni gaar: “Mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad . . . , mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matt. 28:19, 20) Aningeg ban’en nib t’uf ni ngad rin’ed. Thingar da pingeged e girdi’ ngar manged pi gachalpen Jesus, ma gad taufenagrad, ma gad fil ban’en ngorad. Machane, u m’on ni ngad rin’ed e pi n’ey, ma mang e som’on nthingar da rin’ed? I gaar Jesus: “Mmarod”! I yog be’ ni manang murung’agen e Bible ni gaar: “Thingari ‘yan’ e piin ni ke michan’rad, ndemtrug ko nga ranod u barba’ e kanawo’ nga barba’ ara nga ranod u barba’ e day nge yan i mus nga barba’.”​—Matt. 10:7; Luke 10:3.

4. Mang e ba t’uf ni ngan rin’ ya nge yag nni “yognag e girdi’”?

⁴ Ere gur, kemus ni be weliy Jesus murung’agen e machib ni nge tay reb nge reb i gachalpen, fa be weliy murung’agen e machib ni ngar ted u taabang ni yad reb e ulung ni kan yarmiy? Ra taabe’ ma dabiyog ni nge yan ngak “girdien e pi nam u gubin yang.” Ere, ba t’uf boor e girdi’ ni ngar rin’ed e re maruwel ney u taabang. I tamilangnag Jesus e re n’ey u nap’an ni pining pi gachalpen ni ngar uned ngak i “yognag e girdi’.” (Mu beeg e Matthew 4:18-22.) N’en ni weliy Jesus u roy e rayog ni ngan taarebrogonnag ko n’en ni ma rin’ be’ nib ta fita’. Machane, der weliy murung’agen taabe’ ni be fita’ ni be fanay e gaf nge wal me par ni be sonnag e nig ni nge yib i aw ko gaf rok. Ya be weliy Jesus murung’agen e fita’ ni yibe tay ni yibe fanay e nug ni boor yang. Ma re miti fita’ ney e ba gel e maruwel riy, ma kub t’uf ni ngan yarmiy nib fel’ rogon, ma dabiyog rok taabe’ ni nge rin’ ni yigoo ir.​—Luke 5:1-11.

5. Mang aningeg e deer nib t’uf ni ngad nanged e fulweg riy, ma mang fan?

⁵ Ra ngad nanged ko mini’ e piin ni yad be machibnag fare thin nib fel’ e ngiyal’ ney ni bod ni yiiynag Jesus, mab t’uf ni ngad weliyed e fulweg ko re aningeg i deer ni baaray ni be gaar:

•   Mang e susun ni ngad weliyed murung’agen ko girdi’?

•   Mang fan ni ngad rin’ed e re maruwel ney?

•   Mang boch e kanawo’ ni ngad rin’ed e re maruwel ney riy?

•   Uw ga’ngin yang e gin ni ngad machibgad riy, ma uw n’umngin nap’an ni ngad machibgad?

 Fulweg ko pi deer ney e ra ayuwegdad ni ngad nanged ko mini’ e piin ni yad be rin’ e re maruwel ney nra ayuweg e yafos ko girdi’, ma gad athamgil ni ngad ululgad i rin’ ndab da talgad.​—1 Tim. 4:16.

6. Mang fan nrayog ni nge pagan’um ni Pi Mich Rok Jehovah e aram e piin ni yad be machibnag e bin nib puluw e thin?

⁶ Mu beeg e Luke 4:43. I machibnag Jesus “fare Thin Nib Fel’ ni murung’agen e gagiyeg rok Got,” maku aram rogon ni baadag ni nge rin’ pi gachalpen. Ere, bin ngan e ulung e yad be machibnag e re thin ney u “gubin yang u fayleng”? Ba tamilang ni kemus ni yigoo Pi Mich Rok Jehovah. Mus ngak boch e girdi’ ni yad ma togopuluw ngodad ni ka rogned nriyul’ e re n’ey. Immoy reb e padrey u barba’ e teliw ni yog ngak reb e Pi Mich ni ir e ke yoor e nam ni ke par riy, ma gubin e pi nam nem ni i par riy ma ke fith ko Pi Mich Rok Jehovah ko mang e yad ma machibnag ko girdi’. Ere, mang e ka rogned ngak? I yog fare padrey ni gaar: “Ri yad ba aliliy, ya yad gubin ni taab fulweg e kar pied ngog ni aram e: ‘Fare Thin Nib Fel’ ni murung’agen e gagiyeg rok Got.’” Machane, bin riyul’ riy e de “aliliy” e Pi Mich nem, ya ba taareban’rad,  ma aram reb e ban’en nsusun e nge m’ug ko tin riyul’ e Kristiano. (1 Kor. 1:10) N’en ni ke yog e Pi Mich nem e ku aram e n’en ni bay ko Fare Wulyang ko Damit Ni Be Weliy Morngaagen Gil’ilungun Jehovah. Re ke babyor ney e yibe ngongliy u 254 mit e thin, ma ra bayay nni ngongliy mab chugur ni nge gaman 59 milyon ken. Ireray e re ke magazine nth’abi yoor ken ni yibe wereg u roy u fayleng!

7. Uw rogon ni kad nanged nde puluw e n’en ni be machibnag e pi tayugang’ ko pi yurba’ i teliw ko Kristiano ni googsur?

⁷ Pi tayugang’ ko pi yurba’ i teliw ko Kristiano ni googsur e darur machibnaged murung’agen Gil’ilungun Got. Mus ni faanra kar weliyed murung’agen Gil’ilungun Got, ma yooren i yad e ma yog ni Gil’ilungun Got e ban’en ni bay u fithik’ i laniyan’ reb e Kristiano. (Luke 17:21) Darur ayuweged e girdi’ ni ngar nanged ni Gil’ilungun Got e aram reb e am ni bay u tharmiy ni Jesus Kristus e ir e Pilung riy, ma ir e ra pithig urngin e magawon ni be mada’nag e girdi’, ma dabki n’uw nap’an ma ra chuweg e kireb u roy u fayleng. (Rev. 19:11-21) Ya bin riyul’ riy e kab ga’ fan u wan’rad ni ngar weliyed murung’agen Jesus u nap’an e Christmas nge Easter. Ere, be m’ug riy ndar nanged e n’en ni bayi rin’ Jesus u nap’an nra tabab i Gagiyegnag e fayleng. Ma bochan nde puluw e n’en ni yad be machibnag ko girdi’, maku aram fan nde puluw fan ni yad be machib.

8. Uw rogon ni yira rin’ fare maruwel ni machib ma aram e ba kireb?

⁸ Mang fan ni ngad rin’ed e re maruwel ney? Gathi ngad rin’ed ni bochan e nge yag e salpiy riy ngodad ma gad toy boch e naun nib fel’ yaan. Ya gaar Jesus ngak pi gachalpen: “Ke yog ngomed nda mpied puluwon, ere mpied ndab ni pi’ puluwon ngomed.” (Matt. 10:8) Ere, susun ndab ud machibgad ni bochan e nga i yag e salpiy riy ngodad. Piin ni yad ma machibnag e re thin ney e susun ndab ur guyed rogon ni nge yag boch ban’en riy ngorad. (Mu beeg e Acts 20:33-35.) Yugu aram rogon nib tamilang e n’en ni yog Jesus, machane yooren raba’ e teliw e yad ma fek e salpiy ko girdi’ ni bochan e nge yag ni ngki ulul e teliw rorad ko pi n’en ni yad be rin’. Ku yad ma pi’ puluwon e pi tayugang’ ko teliw rorad, nge ku boch e girdi’ ni ma maruwel rorad. Bochan e re n’ey, ma aram fan ni boor e tayugang’ ko pi yurba’ i teliw ko Kristiano ni googsur ni boor e salpiy rorad.​—Rev. 17:4, 5.

9. Uw rogon ni ke dag e Pi Mich Rok Jehovah nib puluw fan ni yad be rin’ fare maruwel ni machib?

⁹ Gur, ma fek e Pi Mich Rok Jehovah e salpiy ko girdi’ ni yad ma yib nga Kingdom Hall ara piin ni yad ma un ko pi convention rorad? Danga’, ya salpiy ni yad ma fanay ko maruwel rorad e salpiy ni ayuw nra be’ ma ke pi’ ni ir rok. (2 Kor. 9:7) Der ma mokun salpiy e Pi Mich Rok Jehovah u lan e pi Kingdom Hall rorad ara u nap’an e pi convention. Machane, nap’an fa binem e duw ni ke yan ma 1.93 bilyon e awa ni ke machibnag e Pi Mich Rok Jehovah fare thin nib fel’ riy, ma ra reb e pul mab pag mereb e milyon e girdi’ ni kar filed e Bible ngorad. Ere riyul’ ni yira ngat ngorad, ya gathi kemus ni yad ma rin’ e re maruwel ney ndanir pi’ puluwrad riy, ya ku yad ma fanay e salpiy rorad ni fan ngay. Bay be’ ni ma fal’eg i gay murung’agen boch ban’en ni weliy murung’agen e re maruwel ney ni ma rin’ e Pi Mich Rok Jehovah ni gaar: “N’en ni yad be nameg e aram e ngar machibgad mar filed ban’en ko girdi’. . . . Dariy e tayugang’ ko teliw rorad, ere aram fan nde yoor ban’en ni yad be n’ag e salpiy ngay.” Ere, mang fan ni gad be rin’ e re maruwel ney? Gad be rin’ ni bochan e ba t’uf Jehovah nge girdi’ rodad. Ma ireray e n’en ni kan yiiynag ko Psalm 110:3. (Mu beeg.)

10. Mang boch e kanawo’ ni i machibnag Jesus nge pi gachalpen fare thin nib fel’ riy?

¹⁰ Mang boch e kanawo’ ni i machibnag Jesus nge pi gachalpen fare thin nib fel’ riy? Ur machibgad ko yungi n’en ni ur pirieged e girdi’ riy, ni bod rogon e yungi n’en ni ma muulung e girdi’ ni yoor  ngay ngu tafen e girdi’. Ku yad ma yan u mit e tabinaw i yan ni yad be gay e piin ni yad baadag ni ngar nanged e tin riyul’. (Matt. 10:11; Luke 8:1; Acts 5:42; 20:20) Pi kanawoen e machib ney ni ur ted e be m’ug riy ndar laniyan’gad.

11, 12. Uw rogon ni yira taarebrogonnag rogon ni ma machibnag e pi yurba’ i teliw ko Kristiano ni googsur fare thin nib fel’ nga rogon ni ma rin’ e girdi’ rok Jehovah?

¹¹ Gur, ma machibnag e pi tayugang’ ko pi yurba’ i teliw ko Kristiano ni googsur fare thin nib fel’ ni bod rogon ni i rin’ Jesus? Girdien e pi yurba’ i teliw e ba ga’ ni yad ma tay ni pi tayugang’ rorad ni yima pi’ puluwrad e aram e piin ni ngaur machibgad. Machane, pi tayugang’ ko teliw ney e darur guyed rogon ni ngar ayuweged yugu boch e girdi’ ni ngar manged boch i gachalpen Jesus, ya n’en ni yad ma rin’ e yad ma guy rogon ni nge dabi chuw e girdi’ ko teliw rorad. Riyul’ ni bay yu ngiyal’ ni ma pi’ boch e pi tayugang’ ko teliw ney e athamgil nga laniyan’ girdien e teliw rorad ni ngar machibgad. Bod nnap’an e duw ni 2001 me yog Pope John Paul II u lan bangi babyor ni yoloy ni gaar: “Ke yoor e duw ni yug gu be sul u daken gu be yog nib t’uf ni ngan machib. Ere kug be sul u daken bayay . . . Thingar da pasiggad ni bod rogon Paul ni faani yog ni gaar: ‘Faan mang e da gu machibnag ngak e girdi’ e Thin Nib Fel’ ni yib rok Got ma ri gu ra gafgow.’” Miki ulul e re pope nem nge yog nre maruwel ney e “dabiyog ni nge yan i par ni yigoo piin ni kan ‘skulnagrad’ e ir e ngaur rin’ed, ya thingari un urngin e Girdi’ rok Got ngay.” Machane, uw urngin e girdi’ ni yad be fol ko re thin ney?

¹² Mang e ma rin’ e Pi Mich Rok Jehovah ni kab kafram i yib? Kemus ni yigoo yad e yad ma machibnag ni ke tabab Jesus ko gagiyeg ni ka nap’an e duw ni 1914 nib Pilung. Yad ma tay ni fare maruwel ni machib e aram e re maruwel nth’abi ga’ fan ni bod rogon ni yog Jesus. (Mark 13:10) Be gaar ba ken e babyor: “Fare maruwel ni machib e aram e n’en th’abi ga’ fan u wan’ e Pi Mich Rok Jehovah.” (Pillars of Faith​—American Congregations and Their Partners) Ki weliy e cha’ ni yoloy e re ke babyor ney murung’agen e n’en ni yog reb e Pi Mich ni gaar: “Nap’an ni yad ra mada’nag be’ ni ke yim’ ko bilig, ara ke kireban’ ya yigoo ir, ara be’ ni ke m’ar, ma yad ma guy rogon ni ngar ayuweged . . . machane darur paged talin ni maruwel rorad e aram e ngar weliyed ko girdi’ murung’agen tomuren e re fayleng ney nge rogon ni nge thap e girdi’ ngak Got.” Ka be ulul e Pi Mich Rok Jehovah i weliy e re thin ney ko girdi’. Ma yad be rin’ u kanawoen ni i rin’ Jesus nge pi gachalpen.

13. Uw ga’ngin yang e gin ni susun e ngan machib riy?

¹³ I yog Jesus nthingar ni machibnag fare thin nib fel’ u “gubin yang u fayleng.” (Matt. 24:14) Thingar ni pingeg “girdien e pi nam u gubin yang” ngar manged boch i gachalpen Jesus. (Matt. 28:19, 20) Ere, re n’ey e be dag nthingar ni rin’ e re maruwel ney u ga’ngin yang e fayleng.

14, 15. Mang e be micheg ni Pi Mich Rok Jehovah e aram e piin ni yad be lebguy fare thin ni yiiynag Jesus u murung’agen ga’ngin yang e gin nra taw e machib ngay? (Mu guy e sasing ni bay u tabolngin e re article ney.)

¹⁴ Ngad weliyed boch ban’en ni be buch ni be tamilangnag rogon ni be lebguy e Pi Mich Rok Jehovah fare thin ni yiiynag Jesus u murung’agen ga’ngin yang e gin nra taw e machib ngay. U Meriken e bay riy sogonap’an 600,000 e tayugang’ ko  pi yurba’ i teliw ko pi Kristiano ni googsur, ma sogonap’an 1,200,000 e Pi Mich Rok Jehovah ni yad be machibnag fare thin nib fel’ u rom. Mu ga’ngin yang e fayleng e bay sogonap’an 400,000 e padrey ko Katolik riy. Am lemnag urngin e Pi Mich Rok Jehovah ni yad be machib u ga’ngin yang e fayleng. Ya sogonap’an meruk e milyon urngin e Pi Mich ni yad be machibnag e girdi’ u 240 e nam u fayleng i yan. Ere, rriyul’ ni yira ngat nga rogon ni yibe rin’ e re maruwel ney ni be pining e sorok ngak Jehovah!​—Ps. 34:1; 51:15.

¹⁵ Gadad e Pi Mich Rok Jehovah e gad baadag ni ngad machibnaged fare thin nib fel’ ngak urngin e girdi’ nrayog u m’on ni nge yib e tomur. Aram fan nib elmerin e maruwel ni gad be tay ni gad be pilyeg ma gad be ngongliy boch e babyor nib puluw e thin riy ko Bible. Bokum milyon ken e babyor, nge magazine, nge pi tract, nge pi invitation ni fan ko convention nge Puguran ni kad wereged ko girdi’ ndariy puluwon. Maku boor ken e babyor ni kad ngongliyed u boor ko 700 mit e thin. Kub pag 200 milyon ken fare Bible ni New World Translation of the Holy Scriptures ni kan ngongliy u 130 mit e thin. Fa binem e duw ni ke yan e sogonap’an 4.5 bilyon ken e babyor ni kad ngongliyed nib puluw e thin riy ko Bible. Ma chiney e ke pag 750 mit e thin ni kan pilyeg fare website rodad ngay. Kun raba’ i teliw e yad be rin’ boch e maruwel ni aray rogon?

16. Uw rogon ni kad nanged ni bay gelngin Got nib thothup ko Pi Mich Rok Jehovah?

¹⁶ Uw n’umngin nap’an ni yira rin’ fare maruwel ni machib? I yog Jesus ni yira machibnag fare thin nib fel’ nge mada’ ko ngiyal’ ni keb e ‘tomur.’ Kun raba’ i teliw e yad be ulul i machibnag fare thin nib fel’ e ngiyal’ ney ko tin tomuren e rran? Bay boch e girdi’ ni gad ma mada’nag u nap’an e machib ni ma lungurad, “Gamad e bay gelngin Got nib thothup romad, machane gimed e gimed be rin’ e re maruwel nem.” Bin riyul’ riy e, fan ni be yag ni ngad ululgad i rin’ e re maruwel ney e bochan ni bay gelngin Got nib thothup rodad. (Acts 1:8; 1 Pet. 4:14) Bayi n’en me guy boch e teliw rogon ni ngar rin’ed e n’en ni gad be rin’, machane der yag rorad. Bay boch i yad ni ma yan nga boch e nam ni ngar machibgad ni bay n’umngin nap’an. Ku bay boch i yad ni ma yan u mit e tabinaw i yan. Machane, mang e yad ma machibnag? Fulweg ko re deer ney e be tamilangnag ndarur rin’ed fare maruwel ni tababnag Kristus.

MINI’ E PIIN NRIYUL’ NI YAD BE MACHIBNAG FARE THIN NIB FEL’ E NGIYAL’ NEY?

17, 18. (a) Mang fan nib mich u wan’dad ni Pi Mich Rok Jehovah e aram e piin ni yad be machibnag fare thin nib fel’ ni murung’agen Gil’ilungun Got e ngiyal’ ney? (b) Mang e ke rin’ ma be yag ni ngad ululgad i rin’ e re maruwel ney?

¹⁷ Mini’ e piin nriyul’ ni yad be machibnag fare thin nib fel’ ni murung’agen Gil’ilungun Got e ngiyal’ ney? Ba pagan’dad ni nga dogned ni: “Pi Mich Rok Jehovah!” Mang fan nrib pagan’dad ni nga dogned e re n’ey? Bochan nib puluw e n’en ni gad be machibnag, ni aram fare thin nib fel’ ni murung’agen Gil’ilungun Got. Ba puluw kanawoen ni gad be rin’ e re maruwel ney riy ni bochan e gad be yan ko gin ni bay e girdi’ riy. Kub puluw fan ni gad be rin’ e re maruwel ney ni aram e bochan nib t’uf Jehovah nge girdi’ rodad, ma gathi bochan e nge yag e salpiy riy ngodad. Ku gadad e th’abi ga’ yang e gin ni gad be rin’ e re maruwel ney riy ya gad be machibnag e girdi’ u gubin e nam nge thin. Maku reb e, gubin e duw ni gad ra ulul i rin’ e re maruwel ney ndab da talgad nge mada’ ko ngiyal’ ni ke yib e tomur.

¹⁸ Riyul’ ni yira ngat ko pi n’en ni be rin’ e girdi’ rok Got e ngiyal’ ney ko tin tomuren e rran. Machane, mang e ke rin’ ma ke yag ni ngad rin’ed urngin e pi n’ey? I pi’ apostal Paul e fulweg ko re deer ney u lan fagi babyor ni pi’ ngak piyu Filippi ni gaar: “Got e gubin ngiyal’ ni be maruwel u fithik’ i lanin’med ni be pingeg lanin’med ni nge m’agan’med ngay ni ngam folgad ko tin ni be finey.” (Fil. 2:13) Manga yigi ulul Jehovah ni nga i pi’ gelngidad ya nge yag nda athamgilgad ngad rin’ed fare maruwel ni machib ni kan pi’ ngodad nrogon e tapigpig rok Got.​—2 Tim. 4:5.