1-3. (a) Mang boch ban’en u rarogodad nrayog ni nge mo’maw’ ni ngad thilyeged u tomuren ni kad uned ko taufe? (b) Mang boch e deer nrayog ni nge sum u lanin’dad ni faanra gad be guy nib mo’maw’ rogon ngodad ni ngad thilyeged boch ban’en u rarogodad? (Mu guy e sasing ni bay u tabolngin e re article ney.)

 NAP’AN ni fil Kevin ^[1] e tin riyul’, ma aram e ri adag ni nge chugur e tha’ u thilrow Jehovah. Machane, ke yoor e duw ni ma un nga boch e gosgos ni yima fek e salpiy riy, nge tamagow, nge chingaw nib pag rogon, maku ma fanay boch e falay ni kireb. Ere, faanra nge fel’ e tha’ u thilrow Got, ma thingari digey e pi ngongol nem. Machane, bochan ni pagan’ ngak Jehovah nge Thin Rok nib gel gelngin ma aram me yag ni nge thil.​—Heb. 4:12.

² Ere gur, i tal Kevin ndaki thilyeg boch ban’en u rarogon u tomuren ni un ko taufe? Danga’, ya thingari athamgil ni nge yag boch i fel’ngin e Kristiano ngak mi i m’ug ko ngongol rok. (Efe. 4:31, 32) Bod ni, guy nib mo’maw’ ngak ni nga i gagiyegnag e damumuw rok. I yog ni gaar: “Kug guy ni kab mo’maw’ ngog ni nggu gagiyegnag e damumuw rog ko bin ni nggu taleg boch e ngongol nib kireb ni ug  rin’ kafram!” Machane, bochan ni ma ning e ayuw ngak Got u daken e meybil maku ma fal’eg i fil e Bible, ma aram e n’en ni ayuweg.

³ Boor i gadad e bod Kevin. Ya u m’on nda uned ko taufe ma boor ban’en ni kad thilyeged ko ngongol rodad ya nge yag ni puluw e ngongol rodad ko n’en ni be yog e Bible. Machane, tomuren nda uned ko taufe maku bay nochi ban’en u rarogodad ni kab t’uf ni ngad thilyeged ya nge yag nda boded Got nge Kristus. (Efe. 5:1, 2; 1 Pet. 2:21) Bod ni, sana yug gad ma gun’gun’, ara gad ma rus ko girdi’, ara gad ba ta dugdugthin, ara ku gad ma rin’ nochi ban’en nde fel’. Ere gur, gad be guy nib mo’maw’ ni ngad thilyeged e pi n’ey u rarogodad? Faanra ga be guy nib mo’maw’, ma sana rayog ni ngam fithem ni nge lungum: ‘Mang fan nib mom ngog ni nggu tal i rin’ boch e ngongol nib gel e kireb riy, ma ke yib ko tiney e ban’en ni gathi rib ga’, ma rib mo’maw’ ni nggu taleg? Uw rogon ni nggu mon’og u rogon ni gu be pag e thin nu Bible ni nge thilyeg e ngongol rog?’

4. Mang fan ni yu ngiyal’ e ba mo’maw’ ngodad ni ngad rin’ed e tin nib m’agan’ Jehovah ngay?

⁴ Gadad e piin ni kad nanged Jehovah e gad baadag ni ngad rin’ed e tin nib m’agan’ ngay u polo’ i gum’ircha’dad. Yugu aram rogon, ma bay yu ngiyal’ nib mo’maw’ ngodad ni ngad rin’ed e tin nib m’agan’ ngay ni bochan e dawor da flontgad. Ere, rayog ni ngad lemgad ni bod apostal Paul ni faani gaar: “Yugu ra gu be yim’ ni bochan ni nggu rin’ e tin nib fel’, ma dabiyog rog ni gu rin’.”​—Rom. 7:18; Jas. 3:2.

5. Mang boch e ngongol nda talgad i rin’ u m’on nda uned ko taufe? Mang boch e meewar rodad nrayog ni ka be mo’maw’ rogon ngodad ni ngad gelgad ngay?

⁵ Kad paged e tin ni ud ngongliyed kakrom nib kireb ya gad manang ni faanra dab da paged e pi n’ey, ma dabiyog ni ngad manged boch e Kristiano. (1 Kor. 6:9, 10) Yugu aram rogon ma dawor da flontgad. (Kol. 3:9, 10) Ere, de puluw ni ngad lemnaged ni faanra kad taufegad ara ke yoor e duw ni kad nanged e tin riyul’ ma aram e dab ku ud olobochgad, ara da ar’arnaged boch ban’en nib kireb, ara dab kud sulod nga rarogodad kafram. Bin riyul’ riy e, rayog ni sana ba n’uw nap’an nib t’uf ni ngad athamgilgad ni ngad gelgad ko pi n’ey u rarogodad.

6, 7. (a) Mang e ke bing e kanawo’ ngodad ni nge fel’ e tha’ u thildad Jehovah ni yugu aram rogon ndawor da flontgad? (b) Mang fan ndab da magagawongad ni nga dogned ngak Jehovah ni nge n’ag fan e kireb rodad?

⁶ Bochan ndawor da flontgad, ma gathi aram e be yip’ fan ndabiyog ni ngad manged fager rok Jehovah ara ngad pigpiggad ngak. Am lemnag e re n’ey: Nap’an ni pow’iydad Jehovah ni ngad manged fager rok aram ko som’on, ma manang ni bay yu ngiyal’ ni gad ma oloboch. (John 6:44) Bochan ni manang Got e pi meewar rodad nge n’en ni bay u gum’ircha’dad, ma aram fan ni manang ko mang e pi n’en nra i mo’maw’ rogon ngodad ni ngad rin’ed. Maku manang nra ud olobochgad. Yugu aram rogon, ma de pag Jehovah e re n’ey ni nge taleg ndabi fekdad ni ngad manged fager rok.

⁷ T’ufeg rok Got ngodad e aram e n’en ni k’aring ni nge pi’ reb e tow’ath nrib manigil ngodad, ni aram fare biyul ni pi’ Fak nrib t’uf rok. (John 3:16) Faanra da kalgadngan’dad ko kireb rodad u daken e re biyul nem ni ke pi’ ma gad wenig ngak ni nge n’ag fan, ma aram e rayog ni nge pagan’dad nra par nib fel’ e tha’ u thildad. (Rom. 7:24, 25; 1 John 2:1, 2) Ere gur, ba puluw ni ngad lemnaged ni faanra dawor da machalboggad ara bochan ni gad bogi tadenen, ma aram e dabiyog ni nge yib angin e re biyul ney ngodad? Danga’! Ya faan gad ra lem ni aray rogon ma bod rogon ni dubdad ni ngad malukniged pa’dad ni ke alit. Bin riyul’ riy e, fare biyul e kan pi’ ni fan ngak e pi tadenen ni yad ra kalngan’rad ko denen rorad. Ere, ri gad be pining e magar ngak Jehovah ko re biyul ney ni bochan e aray e n’en ni ke ayuwegdad ni ngad manged fager rok ni yugu aram rogon ndawor da flontgad.​—Mu beeg e 1 Timothy 1:15.

8. Mang fan nsusun e dab da feked owchedad ko pi meewar rodad?

 ⁸ Riyul’ ndabiyog ni ngad feked owchedad ko pi meewar rodad. Faanra nge gel e chugur ko tha’ u thildad Jehovah ma thingar da athamgilgad ni ngad folwokgad rorow Kristus mu ud ngongolgad u rogon nib m’agan’row ngay. (Ps. 15:1-5) Re n’ey e ba muun ngay ni ngad athamgilgad ni ngad gelgad nga boch ban’en u rarogodad nde fel’ ara ngad guyed rogon ni ngad chuweged e pi n’ey. Demtrug ko ka fin da uned ko taufe fa ke yoor e duw ni kad uned ko tin riyul’, ma gubin ngiyal’ nthingar ud ‘yal’uweged’ boch ban’en u rarogodad.​—2 Kor. 13:11.

9. Uw rogon ni kad nanged ni gubin ngiyal’ nib t’uf ni nga don’ed nga dakendad e bin nib beech i gadad?

⁹ Ba t’uf ni ngaud athamgilgad ni ngad ‘yal’uweged’ boch ban’en u rarogodad ya nge yag ndon’ed nga dakendad e ‘bin nib beech i gadad.’ I puguran Paul ko piin taareb e michan’ rorad ni gaar: “Bin kakrom i gimed nge tin ni ke mecham ngay e kam n’iged, ma bin nib beech i gimed e ka mon’ed nga dakenmed. Erera’ e bin nib beech i gimed, ni Got ni ir e sunumiy e yugu be beechnag i yan ni nge yan i par ni bod ir.” (Kol. 3:9, 10) Fare thin ni “yugu be beechnag i yan” e be yip’ fan ni gubin ngiyal’ nib t’uf ni ngad athamgilgad ni ngad thilyeged boch ban’en u rarogodad ma don’ed nga dakendad e bin nib beech i gadad. Ra pi’ e re n’ey e athamgil nga lanin’dad ni bochan e be puguran ngodad ni yug demtrug n’umngin nap’an ni kad pigpiggad ngak Jehovah, ma gubin ngiyal’ nrayog ni ngad filed boch ban’en nib beech u murung’agen pi fel’ngin. Arrogon, rayog ni nge ayuwegdad e thin nu Bible ni ngad ululgad ni ngad thilyeged boch ban’en u rarogodad.

10. Mang e ba t’uf ni ngad rin’ed ya nge yag ni ayuwegdad e Bible ni ngad thilyeged boch ban’en u rarogodad? Mang deer e rayog ni nge sum ni bochan e re n’ey?

¹⁰ Ba t’uf ni ngad athamgilgad ya nge yag nda paged e Thin rok Got ni nga i thilyeg rarogodad. Machane, mang fan nib t’uf ni ngaud athamgilgad ni ngad rin’ed e re n’ey? Gathi yug rayog ni nge momnag Jehovah ngodad ni ngad rin’ed e tin nib fel’?

11-13. Mang fan ni baadag Jehovah ni ngad athamgilgad ni ngad gelgad ko pi meewar rodad?

¹¹ Gad ra fal’eg i lemnag rogon ni kan sunmiy e palpalth’ib rodad, ma gad ra nang nrib gel gelngin Jehovah. Bod ni, ir e ke sunmiy e yal’ ni ban’en nrib gel gelngin. Gubin e second ni ma pi’ e yal’ ramaen e tamilang nge gowelngin nrib gel. Machane, kemus nri buchuuw riy e ba t’uf ni nge ayuweg e pi n’en ni bay u fayleng ni nge par nib fos. (Ps. 74:16; Isa. 40:26) Ku ma pi’ Jehovah gelngin e pi tapigpig rok u nap’an nra t’uf rorad. (Isa. 40:29) Arrogon, rayog rok Got ni nge momnag ngodad ni ngad gelgad ko pi meewar rodad ma dab kud ar’arnaged boch ban’en nib kireb. Machane, mang fan nder ma rin’ e re n’em?

¹² Ke pi’ Jehovah reb e tow’ath ngodad ni aram e puf rogon. Gad ra dugliy ni ngad rin’ed e n’en nib m’agan’ ngay ma gad athamgil ni ngad rin’ed u rogon nrayog rodad, ma aram e gad be dag ngak Jehovah nrib t’uf rodad ma gad baadag ni ngad rin’ed e tin nib m’agan’ ngay. Gad ra rin’ ni aray rogon maku aram e gad be tayfan mat’awun e gagiyeg rok. Ke togopuluw Satan nga mat’awun e gagiyeg rok Jehovah. Machane, nap’an ni gad ra fol rok, ma aram e gad be dag ni gad baadag ni nge mang Pilung rodad. Maku rayog ni nge pagan’dad nib ga’ fan u wan’ e Chitamangidad ni bay u tharmiy e athamgil ni gad ma tay ni ngad folgad rok. (Job 2:3-5; Prov. 27:11) Machane, faanra ngari momnag Jehovah gubin ban’en nga puluwdad ma ra yan i aw nib m’ay fan e yul’yul’ ni gad be tay ngak nge rogon ni gad be tayfan mat’awun e gagiyeg rok.

¹³ Aram fan ni ke yog Jehovah ngodad ni ngad ‘athamgilgad’ u rogon nrayog rodad ni nge yag pi fel’ngin ngodad. (Mu beeg e 2 Peter 1:5-7; Kol. 3:12) Baadag ni ngad athamgilgad ni ngaud t’ared lanin’dad u boch ban’en. (Rom. 8:5, 6; 12:9) Ba gel e felfelan’ ni gad ma tay u nap’an ni gad ra athamgil u rogon nrayog rodad ni ngad thilyeged boch ban’en u rarogodad ma gad guy ni ke yib angin.

14, 15. Uw rogon ni nge yag boch e fel’ngin ngodad ni baadag Jehovah? (Mu guy fare kahol ni kenggin e “ Ke Ayuwegrad e Bible nge Meybil ni Ngar Thilyeged Boch Ban’en u Rarogorad.”)

¹⁴ Mang e rayog ni ngad rin’ed ya nge yag ni m’ug pi fel’ngin Jehovah rodad ma gad rin’ e tin nib m’agan’ ngay? Gathi kemus ni ngad lemnaged e pi n’en nib t’uf ni ngad thilyeged u rarogodad, ya kub t’uf ni ngad paged Got ni nge pow’iydad, ya be gaar e Roma 12:2: “Dab mu folgad ko ngongol ni yibe rin’ u roy u fayleng, machane mpied gimed ngak Got nge piliyegmed, ni aram e kari piliyeg lanin’med ni polo’. Ma aram e rayog ni ngam nanged e tin nib m’agan’ Got ngay​—ni tin nib fel’, nib fel’ u wan’ Got ma rib yal’uw.” Thin rok Jehovah nge gelngin nib thothup e ra ayuwegdad ni ngad nanged e n’en nib m’agan’ ngay, ma gad thilyeg boch ban’en u rarogodad ya nge yag nda fel’gad u p’eowchen. Thingar da athamgilgad ni ngaud beeged e Bible ni gubin e rran, ma gad fal’eg i lemnag e pi thin nu Bible ni gad ma beeg, ma gad ning gelngin Got nib thothup u daken e meybil. (Luke 11:13; Gal. 5:22, 23) Ma faan gad ra fol u rogon ni be pow’iydad gelngin Got nib thothup ma gad pulweg e lem rodad ko lem rok nrogon ni ma m’ug ko Thin rok u Bible, ma aram e rayog ni ngaud lemgad, ma gad be non, ma gad be ngongol ni bod ir. Yugu aram rogon mab t’uf ni ngaud athamgilgad ni ngad gelgad ko pi n’en ni gad ba meewar riy.​—Prov. 4:23.

¹⁵ Gathi kemus ni ngaud beeged e Bible rodad ni gubin e rran, ya kub t’uf ni ngaud ted e fol Bible ni yigoo gadad ma gad be fil boch e babyor rodad ni yima ngongliy ni be fil ngodad murung’agen pi fel’ngin Jehovah, ni bod rogon fa gal ke babyor ni Fare Wulyang ko Damit nge Awake! Ku bay boch e walag ni kar guyed nib ga’ angin ni faanra ur yoloyed boch e thin nu Bible nga but’ ara ra chaariyed boch e article ni kar beeged nib manigil ni ngaur sulod u daken ni bochan e ma ayuwegrad e re n’ey ni nge yag boch e pi fel’ngin e Kristiano ngorad mar gelgad ko pi meewar rorad.

16. Mang fan ndabi mulan’dad ni faanra be mo’maw’ ngodad ni ngad thilyeged boch ban’en u rarogodad?

¹⁶ Faanra ba sagaal ni ga be mon’og ko tirok Got ban’en, ma dab mu pagtalin nre n’ey e dabiyog ni nga yigi buch nib tomgin. Ya faanra nge yag pi fel’ngin Got ngodad mab t’uf ni ngad maruweliyed nib n’uw nap’an ni nge yag ngodad. Thingar da gum’an’naged gadad ya nge yag nda paged e thin nu Bible ni nge thilyeg boch ban’en u rarogodad. Som’on e sana ba t’uf ni ngad filed rogon ni ngad rin’ed e tin nib mat’aw ban’en ni bay u Bible. Machane, faanra ud athamgilgad ni ngaud lemgad ma gad be ngongol u rogon nib m’agan’ Jehovah ngay, ma aram e ra munmun ma ra mom ngodad ni ngaud lemgad ma gad be rin’ e tin nib mat’aw.​—Ps. 37:31; Gal. 5:16, 17.

17. Faan gad ra par ni gad ba yul’yul’ ngak Jehovah, ma mang boch ban’en nrayog ni ngad athapeged boch nga m’on?

¹⁷ Pi tapigpig rok Jehovah ni yad ba yul’yul’ ngak e ra boch nga m’on ma yad ra pigpig ngak ndariy n’umngin nap’an ni kar flontgad. Ra taw ko ngiyal’ nem ma ke mom ngodad ni nga i m’ug pi fel’ngin Got ko ngongol rodad, maku ban’en nra ud rin’ed ni gad ba felfelan’ ngay. Machane, gad be pining e magar, ya bochan fare biyul ma aram e ke mab e kanawo’ ngodad nrayog ni ngad pigpiggad ngak Got e chiney. Yugu aram rogon ndawor da flontgad, ma faanra ud athamgilgad ni ngad paged e Thin rok Got ni nge thilyeg boch ban’en u rarogodad, ma aram e rayog ni ngad rin’ed e tin nib m’agan’ ngay.

18, 19. Mang fan nrayog ni nge pagan’dad ni bay gelngin e thin nu Bible ni nge thilyeg rarogodad?

¹⁸ Kevin ni faan kad weliyed murung’agen e athamgil u rogon nrayog rok ni nge gagiyegnag e damumuw rok. I fal’eg i lemnag e pi kenggin e motochiyel nu Bible me athamgil ni nge fol riy, miki m’agan’ ko ayuw nge fonow ni i pi’ e pi walag ngak. Yugu aram rogon ni yan in e duw mfini yag ni nge thilyeg e pi n’ey u rarogon, machane munmun me yag ni nge mang reb e ministerial servant. Ma chiney e ke gaman 20 e duw ni be pigpig ni ir reb e piilal u lan e ulung. Yugu aram rogon ma ka ma guy nib t’uf ni nga i athamgil ya nge dabki sul nga rarogon kafram.

¹⁹ N’en ni buch rok Kevin e be dag ni Bible e ma ayuweg e girdi’ rok Got ni ngar thilyeged boch ban’en u rarogorad nib t’uf ni ngar thilyeged. Ere, ngad athamgilgad ni ngaud paged e Thin rok Jehovah ni nga i yal’uwegdad ma be chugurnagdad ngak. (Ps. 25:14) Ma faan gad ra guy rogon ni be tow’athnagdad Jehovah ko athamgil ni gad be tay, ma aram e gad ra guy nriyul’ ni be thilyeg e Bible boch ban’en u rarogodad.​—Ps. 34:8.