Alole yatesile achimlongola ŵa dini pangondo jajikutendekwa ku Ukraine:

•   Nyusipepala jine jatite: “Mlongola jwa dini ja Orthodox ku Russia, Patriach Kirill, ngakujijamuka boma ja Russia pakwinjila m’chilambo cha Ukraine kukujitanda ngondo. . . . Diniji jikupitilisya kuwandisya ngani syaunami syakwayana ni chilambo cha Ukraine, mwamti ligongo lya yeleyi, Putin, akuliwona kuti akwete magongo gakupikanika gakuputila ngondoji.—EUobserver, March 7, 2022.

•   Nyusi jine jatitesoni: “Patriarch Kirill . . Alosisye mwamachili kuti pangali chakulemwecheka chilichose chajitesile boma ja Russia pakwinjila m’chilambo cha Ukraine kukuputa ngondo. Jwalakwe jwatite, ngondoji jikutendekwa pakulingalinga kumalana ni ulemwa.”—AP News, March 8, 2022.

•   Nombe najo nyusi jine jatite: “Mlongola jwa dini ja Orthodox ku Ukraine, lina lyakwe Epiphanius I jwa ku Kyiv, Lyakulemba ŵapopelele ŵandu ŵakwe kuti ‘alimbane ni asilikali ŵa chilambo cha Russia ŵajinjile m’chilambocho’ . . [jwalakwe] jwaŵechetesoni kuti kuwulaga asilikali ŵa Russia nganikuŵa kulemwa.”—Jerusalem Post, Marchi 16, 2022.

•   Bungwe jine ja dini ku Ukraine jatite: “M’weji [Ukrainian Council of Churches and Religious Organizations (UCCRO)] tukukamulana ni asilikali ŵangondo ŵa ku Ukraine soni wosope ŵali kumbali jetu, soni tukwasosela yambone yosope pamasengo gawo gakuchichenjela chilambo cha Ukraine kwa achimmagongo ŵawo, mwamti tukwapopelela jemanjaji.”—Chimanyisyo cha UCCR, a February 24, 2022.

 Akuganisya uli? Ana akuyiwona kuti dini syasikusasala kuti sikusamkuyaga Yesu Klistu, sikusosekwa kwalimbikasya ŵandu ŵawo kuputa ngondo? Nambi ana Baibulo jikusasala yamtuli panganiji?

Yasiŵele mkutenda dini pangondo

 Mbili jikusalosyaga kuti dini siŵele sili mkwitichisya kuputa ngondo soni kuti pangali chakulemwecheka chilichose panganiji. Siŵelesoni sili mkwalimbikasya ŵandu kuti yili yakusosekwa kuputa ngondo pakulambuchisya kuti akusaka kuyikasya mtendele. Nambo kwa yaka yejinji ŵa Mboni sya Yehofa aŵele ali mkwakamuchisya ŵane kumanyilila kuti yasiŵele mkutenda dinisi uli unami. Alole yisyasyo yakuyichisyayi kutyochela mu mabuku getu.

•   “Tchalitchi cha Katolika mu Afirika?” Mtwewu ukusalasoni yasitesile dini pakulepela kulekasya ngondo.

•   “Kodi Zipembedzo N’zimene Zikusokoneza Mtendere?” “Mbali ya Chipembedzo m’Nkhondo za Anthu” “Chipembedzo Chichirikiza Mbali Ina” Mitweji jikusala yasitesile dini sya Chikatolika, Orthodox soni dini sine pakujigala nawo mbali mu ngondo.

Ana Aklistu ajinjilileje nawo ngondo?

 Yaŵajiganyisye Yesu: “Mumnonyeleje mjenu mpela mwamkulinonyelela m’mwe mwasyene.” (Mateyu 22:39) “Mwanonyeleje amagongo ŵenu.”—Mateyu 5:44-47.

 Yaŵasasile Yesu: “Uchimwene wangu nganiwuŵa kose wa chilambo chapasi pano, ukaŵe wa chilambo chapasi pano, ŵakunguya ŵangu akatesile ngondo kuti une ngapelechekwa.” (Yohane 18:36) “Pakuti wosope ŵakamula upanga, tachiwulajidwa ni upanga.”—Mateyu 26:47-52.

 Aganichisye ayi: Naga ŵakulijiganya ŵa Yesu nganasosekwa kuputa ngondo pakumchenjela Yesu, Ana Aklistu masiku agano akusosekwa kuputa ngondo? Aŵalanje ngani ja Chichewa jakuti, “Kodi Akhristu Ayenera Kumenya Nawo Nkhondo?” Nganiji chijakamuchisye kumanyilila yaŵatendaga Aklistu ŵandanda pakukuya yaŵatendaga soni yaŵajiganyaga Yesu.

Ana Mlungu chachitenda nasyo chichi dini syasikujilila ngondo?

 Baibulo jikusajiganya kuti Mlungu jwangajitichisya dini syasikusasalaga kuti sikusakuyaga Yesu nambo ningakuyaga yiŵajiganyisye jwalakwe.—Mateyu 7:21-23; Tito 1:16.

•   Buku ja Chiwunukuko jikusalosyaga kuti Mlungu chachisijimba magambo dini syasitendekasisye kuti ‘ŵandu wosope awulajidwe pa chilambo chapasi.’ (Chiwunukuko 18:21, 24) Kuti amanyilile ligongo lyakwe, aŵalanje ngani ja Chichewa jakuti “Kodi Babulo Wamkulu N’chiyani?”

•   Yesu jwasasile kuti dini syosope syasikanile Mlungu chachisijonanga ligongo lya yitendo yakwe yakusakala. Yichiŵa mpela mwakusakatila mundu “chitela chilichose changasogola yisogosi yambone, akusachikata ni kuchiponya pamoto.” (Mateyu 7:15-20) Aŵalanje ngani jakuti “Mbesi ja Dini Jawunami Jiŵandicile!” kuti amanyilile mwayichitendechela yeleyi.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images