PAKUSAKA kutukamucisya kuti tummanyilile Mesiya, Yehofa Mlungu ŵakamulicisye masengo ŵakulocesya pakusala ya kwacacipagwila, undumetume wakwe, soni pakwamba ya ciwa ca Mkulupusyoju. Yakulocesya yosopeyi yakwanilicikwe cenenepe pa Yesu Klistu. Kwende tulole yine mwa yakulocesya yakwamba kupagwa kwa Mesiya, soni yakutendekwa ali mwanace.

Jwakulocesya Yesaya ŵasasile kuti Mesiya caciŵa jwa mumbagwilo ja Mwenye Daudi. (Yesaya 9:7) Yisyene, Yesu ŵapagwile mu msele wa Daudi.—Matayo 1:1, 6-17.

Jwakulocesya jwine jwa Mlungu, Mika, ŵasasile mkanipaŵe kuti mwanaceju caciŵa mwenye, soni kuti cacipagwila mu msinda wa “Betelehemu Efulata.” (Mika 5:2) Mu ndaŵi jaŵapagwaga Yesu, mu Isalayeli mwapali misinda jiŵili jakola lina lyakulandana lyakuti Betelehemu. Msinda umo waliji ciŵandika msinda wa Nasaleti kumpoto kwa cilamboco, soni winewo waliji ciŵandika Yelusalemu mu upande wa Yuda. Msinda wa Betelehemu wawaliji ciŵandika Yelusalemuwo, kalakala wamanyikwaga ni lina lyakuti Efulata. Yesu ŵapagwile mu msinda welewu, mwakamulana ni yakulocesya yila.—Matayo 2:1.

Yakulocesya yine yasasile mkanipaŵe kuti Mwanace jwa Mlungu cacim’ŵilanga kuti “akopoce mu Iguputo.” Yesu ŵamjawisye ku Iguputo ali kamwanace. Yakulocesya yeleyi yakwanilicikwe paŵawusile najo Mwanaceju, Helode ali awile.—Hoseya 11:1; Matayo 2:15.

Malemba gagali  pa peji 201 pasi pa kamtwe kakuti “Yakulocesya” gakwete ngani syakwamba Mesiya. Conde alandanye ni malemba gagali pasi pa kamtwe kakuti “Kwanilicikwa.” Kutenda yeleyi kucilimbikasya cikulupi cawo cakuti Maloŵe ga Mlungu gakusasala yisyesyene.

Amanyilile kuti malemba gagali yakulocesya, ŵagalembile pali pasigele yaka macila gejinji Yesu mkanapagwe. Yesu ŵaŵecete kuti: ‘Yosope yikwenela kutendekwa yiyalembekwe ya une m’malamusi ga Mose, m’mabuku ga ŵakulocesya mpakasoni buku ja Masalimo.’ (Luka 24:44) Pelepa Baibulo jikulosya kuti yakulocesya yosope yakwamba Mesiya yakwanilicikwe.