1-3. Ana mmagongo jwapi jwakututoposya wosopewe, soni ligongo cici kumanyilila yajikusajiganya Baibulo panganiji kuli kwakutondoya?

AWANICISYE kuti akutila jwaciswamba jwakogoya mnope. Jwalakwe ali jwamacili, soni akuwutuka mnope kwapunda wawojo. Akumanyilila kuti ali jwangali canasa ligongo ŵam’weni ali mkwawulaga acimjawo. Pakulingalinga kutila ni pakwaŵandicila mnope. Yikuwoneka kuti nganakola cembeceyo cilicose. Nambo mwangajembeceya, mundu jwakwakulupusya akukopocela. Jwalakwe ali jwamacili mnope kumpunda jwaciswambajo, soni akwasimicisya kuti ciŵakamucisye. Ana pelepa mpaka apikane catuli mumtima mwawo?

² M’litala line, yili mpela kuti jwaciswamba akwatoposya wawojo. Wosopewe akututoposya. Mpela mwatwalijiganyile mu mtwe upite, Baibulo jikusasala kuti ciwa cili mmagongo. Pangali jwalijose jwetuwe jwampaka acitile kapena kulimbana naco. Ŵajinji tum’weni mmagongoju ali mkutyosya umi waŵakunonyelwa ŵetu. Nambo Yehofa ali jwamacili mnope kucipunda ciwa. Jwalakwe ali Jwakulupusya jwacinonyelo, jwalosisye kuti mpaka amalane ni mmagongoju. Soni akusala kuti cacimjonanga kwangamala mmagongoju, jwali ciwa.  Baibulo jikusajiganya kuti: “Mmagongo jwakumalicisya kummasya macili taciŵa ciwa.” (1 Akolinto 15:26) Jeleji jili ngani jambone kwabasi!

³ Mwakata, kwende tulole mwatukusapikanila naga jwine jwatukusammanyilila awile. Kutenda yeleyi kucitukamucisya kupikanicisya cine cakwe campaka citutendekasye kusangalala. Yehofa akutusalila kuti ŵawe cacikolasoni umi. (Yesaya 26:19) Jemanjajo cacajimusya. Celeci cili cembeceyo cakwamba kwimuka ku ŵawe.

4. (a) Ana mwaŵapikanile Yesu pa ciwa ca mjakwe yikusatujiganya cici pakwamba ya mwakusapikanila Yehofa? (b) Ana Yesu ŵakwete acimjakwe ŵapi ŵaŵanonyelaga?

⁴ Ana pakwete paŵajasile jwakunonyelwa jwawo mu ciwa? Yikusawoneka kuŵa yakusawusya kupilila canasa, kupweteka, soni kuliwona kuŵa jwangali cikamucisyo. Pandaŵiji, tukusasosekwa kuŵalanga Maloŵe ga Mlungu kuti gatutondoye. (2 Akolinto 1:3, 4) Baibulo jikusatukamucisya kupikanicisya mwakusaciwonela ciwa Yehofa, soni Yesu. Yesu, juŵakwete ndamo mpela sya Atatigwe, ŵamanyilile kupweteka kwakukusayika ligongo lya ciwa. (Yohane 14:9) Papite ku Yelusalemu, Yesu ŵakungulukaga mnope ni Lasalo pampepe ni acalumbu ŵakwe, Maliya ni Malita, ŵaŵatamaga mumsinda wa Betaniya. Jemanjajo ŵaŵele acimjakwe Yesu. Baibulo jikusati: “Yesu ŵanonyelaga Malita ni Maliya ni mlumbugwawo Lasalo.” (Yohane 11:5) Mtwe upite twalijiganyisye kuti Lasalo ŵajasice.

5, 6. (a) Ana kumalilo ga Lasalo, Yesu ŵapikene wuli paŵaweni acanasi, soni acimjakwe ŵa Lasalo? (b) Ana canasa caŵalosisye Yesu cikusatulimbikasya catuli?

⁵ Ana Yesu ŵapikene wuli paŵajasice mjakwe? Nganiji jikusasala kuti, Yesu ŵapite kukutama yimpepe ni acanasi, soni acimjakwe ŵa Lasalo kumaliloko. Ali ŵaweni ŵanduwo Yesu camkamwile mnope canasa. Jwalakwe “yamgundile mu mtima nipo yamlagasisye mnope.” Kaneko “Yesu ŵalisile.” (Yohane 11:33, 35) Ana kulila kwa Yesu kwalosisye kuti nganakola  cembeceyo? Iyayi. Yesu ŵamanyililaga kuti cine cakwe cakusimonjesya caliji cili cisigele panandi kutendekwa. (Yohane 11:3, 4) Nambope, jwalakwe ŵapikene kupweteka, soni canasa yayikusayika ligongo lya ciwa.

⁶ Nambotu, canasa caŵalosisye Yesu cili cakulimbikasya. Cikutujiganya kuti Yesu, soni Atati ŵakwe Yehofa, akusaŵengana ni ciwa. Yehofa Mlungu mpaka amalane ni mmagongoju. kwende tulole yaŵatesile Yesu ni cikamucisyo ca Mlungu.

⁷ Lasalo ŵam’ŵisile mu mbanga, ni Yesu ŵasalile ŵandu kuti atyosye liganga lyaŵawugalile pambangapo. Malita ŵalekasisye, ligongo paliji pali papite masiku mcece ciwile Lasalo, cilu ca Lasalo komboleka kuti caliji cili citandite kuwola. (Yohane 11:39) Kwa ŵandu ŵaŵaliji pelepowo, ana akakulupilile kuti Lasalo cajimuce?

7, 8. Kwa ŵandu ŵakulolela, ligongo cici yawonekaga kuŵa yangakomboleka kwimusya Lasalo ku ŵawe, nambo ana Yesu ŵatesile cici?

⁸ Liganga lila ŵalityosisye, ni Yesu ŵagumisile kuti: “Lasalo, kopokani pasa!” Ana kaneko catendekwe cici? “Jwalakwejo ŵakopwece pasa.” (Yohane 11:43, 44) Agambe ganisya mwaŵasangalalile ŵandu ŵaŵaliji pamalopo! Cinga Lasalo ŵaliji jwacinasi jwawo, mjawo kapena ŵakuŵandikana nawo nyumba, ŵayimanyi kuti jwalakwejo jwawile. Nambo sambano ŵam’mbwenisoni jwakunonyelwa jwawo jula ali ajimi pasikati pawo. Ŵanduwo nganakulupililaga yayatendekwagayo. Mwangakayicila ŵandu ŵajinji ŵamkumbatile Lasalo mwakusengwa. Pelepatu ciwa ŵacimasisye macili!

⁹ Yesu nganasala kuti ŵatesile yakusimonjesyayi ni macili gakwe. M’lipopelo lyakwe mkanamjimusye Lasalo, jwalakwe ŵasasile mwakupikanika cenene kuti Yehofa ni jwaŵatendekasisye kuti Lasalo ajimuce. (Yohane 11:41, 42) Jeleji nganijiŵa ndaŵipe jele Yehofa ŵakamulicisye masengo macili gakwe mu  litala lyeleli. Kwimuka ku ŵawe kwa Lasalo kuli cimo mwa yakusimonjesya msanu ni mcece yayikusimanikwa m’Maloŵe ga Mlungu. * Kuŵalanga ngani syelesi mpaka kutukamucisye kuŵa ŵakusengwa. Nganisi sikusatujiganya kuti Mlungu jwangali lusagu, pakuŵa ŵaŵajimwicewo akupwatikapo ŵanace ni acakulungwa ŵakwe, acalume ni acakongwe, Ayisalayeli ni ŵandu ŵanganaŵa Ayisalayeli. Nganisi sikusasala mwaŵasengwele ŵandu paŵam’weni jwacinasi jwawo ali ajimwice ku ŵawe. Mwambone, Yesu paŵajimwisye mwali ku ŵawe, acinangolo ŵakwe “ŵasengwile mnope.” (Maliko 5:42, NW) Yisyene, Yehofa ŵatendekasisye ŵandu kusengwa, kwanganakuliŵalila.

¹⁰ Yisyene kuti ŵandu ŵele Yesu ŵajimwisye ku ŵawe, ŵawilesoni mkupita kwandaŵi. Ana yeleyi yikulosya kuti kwajimusyako kwaliji kwangali mate? Iyayi. Nganisi sikusasimicisya usyesyene wakusosekwa mnope, soni sikusatupa cembeceyo.

11. Ana ngani ja Lasalo jikusasimicisya catuli usyesyene wawukusimanikwa pa Mlaliki 9:5?

¹¹ Baibulo jikusajiganya kuti ŵawe “pangalikose cakusacimanyilila.” Ngani ja Lasalo jikusasimicisya usyesyene welewu. Paŵajimwice ku ŵawe, ana Lasalo ŵasalilaga ŵandu kuti ŵaliji mkutama umi wambone kwinani? Ana kapena ŵajogoyaga ŵandu pakwasalila yakwamba moto wa helo? Jwalakwe nganasala cilicose. Pangali palipose m’Baibulo papakulosya kuti Lasalo ŵasasilepo yeleyi. Pamasiku mcece gaŵaliji m’malembe, jwalakwe ‘pangalikose caŵamanyililaga.’ (Mlaliki 9:5) Lasalo ŵagambile gona mu ciwa.—Yohane 11:11.

12. Ligongo cici mpaka tuŵe ŵakusimicisya kuti Lasalo ŵajimwice ku ŵawe?

¹² Ngani ja Lasalo jikusatujiganya kuti kwimuka kwa ŵawe kuli kusyesyene, nganijiŵa adisi. Yesu ŵamjimwisye Lasalo  pameso pa mboni syasyalolaga ni meso yakutendekwayo. Atamose acimlongola ŵa dini ŵaŵam’ŵengaga Yesu, nganakana kuti yakusimonjesyayi yatendece. Mmalo mwakwe jemanjajo ŵawusyene kuti: “Ana pelepa tutende cici? Alole yakusimonjesya yosope yene yakuyitenda jwele munduju!” (Yohane 11:47) Ŵandu ŵajinji ŵapite kukumlola Lasalo juŵajimwice ku ŵawejo. Yakuyicisya yakwe yaliji yakuti ŵajinji ŵatandite kumkulupilila Yesu. Kupitila mwa Lasalo ŵandu ŵawuweni umboni wangasisika wakuti Yesu ŵatumigwe ni Mlungu. Yeleyi yapelece umboni wamacili, mwati acimlongola ŵa dini ja Ciyuda ŵalingenye yakuti awulaje Yesu ni Lasalo jwakwe.—Yohane 11:53; 12:9-11.

13. Ana pana umboni wapi wakulupilila kuti Yehofa mpaka ajimusye ŵawe?

¹³ Ana yili yangali mate kulupilila kuti ŵawe cacijimuka? Iyayi, ligongo Yesu ŵajigenye kuti lisiku line ‘ŵaŵawile wosope’ cacijimuka. (Yohane 5:28) Yehofa ali Mkupanganya jwa umi. Ana mpaka yiŵe yakusawusya kulupilila kuti jwalakwe mpaka apanganyesoni umi? Yisyene kuti yikwegama pa yakukumbucila Yehofa pakwamba ya jwam’wejo. Ana jwalakwe mpaka ŵakumbucile ŵakunonyelwa ŵetu ŵaŵajasice? Kwinani kwana ndondwa syangaŵalanjika, nambo Mlungu akusajikolangaga jilijose lina lyakwe. (Yesaya 40:26) M’yoyo, Yehofa mpaka akumbucile yiliyose yakwamba mundu jwaŵawile, soni ali jwakoseka kum’wucisya umi.

14, 15. Mwakamulana ni yaŵaŵecete Yobu, ana Yehofa akusapikana wuli pakwamba yakwimusya ŵawe?

¹⁴ Nambo ana Yehofa akusapikana uli mumtima mwakwe pakwamba ya kwajimusya ŵawe? Baibulo jikusasala kuti jwalakwe ali jwakusacilila kwimusya ŵawe. Mundu jwakulupicika Yobu ŵawusisye kuti: “Ali awile mundu, ana cacikolasoni umi?” Yobu ŵasalaga yakwembeceya m’malembe mpaka ndaŵi jele Mlungu cacimkumbucila. Jwalakwe ŵaŵecete kwa Yehofa kuti: “Ŵalakwe caciŵilanga, nipo une cinjajanga. Pakuŵa cacigasacilila masengo ga makono gawo.”—Yobu 14:13-15.

¹⁵ Agambe ganisya! Yehofa akusasacilila kwimusya ŵawe. Ana ngaŵa yakulimbikasya kumanyilila kuti Yehofa akusasacilila  kutenda yeleyi? Nambo ana kwimusya ŵawe kwa m’bujo kweleku, ŵani ŵacacijimuka, soni cacajimucisya kwapi?

16. Ana ŵawe cacijimuka ni kutamaga m’cilambo catuli?

¹⁶ Ngani sya m’Baibulo syakwamba kwimuka kwa ŵawe sikusatujiganya yejinji ya kwimuka kwa ŵawe kwakucitendekwa m’bujo. Ŵandu ŵaŵajimwice ku ŵawe pacilambopa ŵatamagasoni ni acanasi ŵawo. M’bujomu yiciŵasoni m’yoyo, kwamba kuti yiciŵa yambone mnope. Mpela mwatwalijiganyile mu Mtwe 3, lisosa lya Mlungu lili lyakuti cilambo cosope capasi ciŵe paladaiso. M’yoyo ŵawe ngasajimuka ni kutamaga m’cilambo cegumbale ni ngondo, kasa malamusi, soni ulwele. Jemanjajo cacikola upile wakutama kwangamala mwakusangalala, soni mwamtendele m’cilambo capasi.

¹⁷ Ana ŵani ŵacacijimuka? Yesu ŵatite, ‘ŵaŵawile wosope tacigapikana maloŵe gakwe [ga Yesu] ni tacikopoka m’malembe mwawo.’ (Yohane 5:28, 29) Lilemba lya Ciunukuko 20:13 likusasala yakulandana ni yeleyi kuti: ‘Nyasa japelece ŵaŵawilile mwelemo. Ciwa ni malo ga ŵandu ŵawe nombe nayo yapelece ŵandu ŵaŵawilile mwelemo.’ “Ciwa” ni “malo ga ŵandu ŵawe” yigopolela cindu cimo, malembe ga ŵandu wosope. (Alole Yakonjecesya pa mapeji 212 mpaka 213.) M’malembe mwelemu muciŵa mwangali kandu. Ŵandu ŵajinji ŵali mwelemo cacikolasoni umi. Ndumetume Paulo ŵatite: “Kuciŵa kwimuka kwa ŵandu wosope ŵakulungama ni ŵangalungama ŵakwe.” (Masengo 24:15, NW) Ana yeleyi yikugopolela cici?

18. Ana “ŵakulungama” ŵacacijimuka ali ŵani, soni cembeceyo cakwimuka ku ŵawe cikwakwaya wawojo catuli?

¹⁸ “Ŵakulungama” ŵeleŵa akupwatikapo ŵandu ŵajinji ŵaŵalembile m’Baibulo ŵaŵapali Yesu mkanayice pacilambo capasi. Mwine mpaka aganisye ya ŵandu mpela Abulahamu, Sala, Mose, Lute, ni ŵane ŵajinji. Ŵane mwa acalume, soni acakongwe ŵakulupicikaŵa akusimanikwa mu mtwe 11 wa m’buku ja Ahebeli. Nambosoni “ŵakulungama” ŵeleŵa akupwatikapo ŵakutumicila ŵa Yehofa ŵakuwa moŵa agano.  Tukutogolela ligongo tukwete cembeceyo cakwimuka ku ŵawe cacikusatugopola kuti tukajogopaga ciwa!—Ahebeli 2:15.

19. Ana “ŵangalungama” ali ŵani, soni Yehofa cacapa upile watuli?

¹⁹ Nambi uli pakwamba ya ŵandu wosope ŵanganamtumicila, soni kumpikanila Yehofa, ligongo nganammanyilila? “Ŵangalungama” ŵeleŵa cacakumbucilasoni. Jemanjajo cacajimusya ni kwapa ndaŵi jakuti alijiganye yakwamba Mlungu jusyesyene ni kumtumicila. Mkati mwa yaka 1,000, ŵawe tacijimuka ni kola upile wakutama ni kumtumicilaga Yehofa yalumo ni ŵandu ŵakulupicika pacilambopa. Jiciŵa ndaŵi jakusangalasya kwabasi! Baibulo jikusasala kuti ndaŵiji jili Lisiku Lyakulamula. *

20. Ana Jehena ni cici, soni ŵacacijawula kweleko ali ŵani?

²⁰ Ana yeleyi yigopolela kuti jwalijose juŵawile cacijimuka ku ŵawe? Iyayi. Baibulo jikusasala kuti ŵawe ŵane ali ku “Jehena.” (Matayo 10:28) Lina lyakuti Jehena lyatyocele ku citutu cacaliji kusa kwa msinda wa Yelusalemu. Ŵandu ŵawe, soni yiswani ŵayijasaga kweleko. Ŵandu ŵawe ŵaŵajasaga kweleko ŵawonaga kuŵa ŵangaŵajilwa kwimuka ku ŵawe. M’yoyo, Jehena cili cilosyo ca konasika kwangamala. Atamose kuti Yesu cacilamula nawo ŵandu ŵawumi, soni ŵawe, Yehofa ni Jwakulamula jwakumalisya. (Masengo 10:42) Jwalakwe ngasajimusya ŵacacalamula kuti ali ŵakusakala, soni ŵangasaka kucenga ndamo syawo syakusakala.

21, 22. (a) Ana “kwimuka kwandanda” kuli cici? (b) Ana jwandanda kwimucila ku umi wausimu ŵaliji ŵani?

²¹ Baibulo jikusasalasoni ya kwimuka kwine, kwakuli “kwimuka kwandanda.” (Ciunukuko 20:6) Cisyasyo cimo cakwimuka kwandandaku cili ca Yesu Klistu.

²² Yesu ali awulajigwe mpela mundu, Yehofa nganakunda kuti Mwanagwe jwakulupicikaju ajendelecele kuŵa  m’malembe. (Salimo 16:10; Masengo 13:34, 35) Mlungu ŵamjimwisye Yesu, nambo ni cilu causimu. Ndumetume Petulo ŵalembile kuti Klistu ‘ŵam’wuleje ku ciilu nambo mu usimu ŵapegwile umi.’ (1 Petulo 3:18) Celeci caliji cakusimonjesya cekulungwa. Yesu ŵajimwice mpela mundu jwausimu jwamacili. (1 Akolinto 15:3-6) Jwalakwe ŵaliji jwandanda pakwimuka kwapenaniku. (Yohane 3:13) Nambo nganaŵa jwakumalisya.

23, 24. Ana ŵani ŵali mu kakuga ka ‘ŵakulijiganya ŵapanandi’ ŵa Yesu, soni apali ŵalingwa?

²³ Paŵamanyilile kuti asigele panandi kwawula kwinani, Yesu ŵasalile ŵakulijiganya ŵakwe ŵakulupicika kuti cacijawula ‘kukwalinganyicisya malo.’ (Yohane 14:3) Yesu ŵasasile kuti ŵakwete cembeceyo cakwawula kwinani ali ‘ŵakulijiganya ŵakwe ŵapanandi.’ (Luka 12:32) Ana kakugaka kali ka Aklistu ŵakulupicika ŵalingwa? Mwakamulana ni Ciunukuko 14:1, ndumetume Yohane ŵatite: “Kaneko nalolite, ni nam’weni Mwanace Jwangondolo ali ajimi petumbi lya Siyoni. Pampepe ni jwalakwejo ŵapali ŵandu 144,000, ŵiŵalembegwe lina lyawo soni lina lya Atati ŵakwe pawusyo pawo.”

²⁴ Aklistu ŵakwana 144,000 ŵeleŵa, kupwatikapo ŵandumetume ŵakulupicika ŵa Yesu, akusajimuka ni umi wausimu ni kwawula kwinani. Ana jemanjanji akusajimuka cakaci? Ndumetume Paulo ŵalembile kuti kwimukaku kucitendekwa pa ndaŵi jakuŵapo kwa Klistu. (1 Akolinto 15:23) Mpela mwacacilijiganyila mu Mtwe 9, sambano tukutama mundaŵi jeleji. M’yoyo ŵa 144,000 ŵasigalile, pagambile kuwa akusajimuka ni kwawula kwinani. (1 Akolinto 15:51-55) Nambo, ŵandu ŵane wosope akwembeceya kuti cacijimuka m’bujo ni kutamaga m’cilambo ca Paladaiso.

25. Ana mu Mtwe wakuyicisya tucilijiganya cici?

²⁵ Yehofa cacimalana najo kwene mmagongo jwetu jwali ciwa ni ngasapagwasoni mpaka kalakala! (Yesaya 25:8) Nambo mpaka aliwusye kuti, ‘Ŵacacijimucila kwinani cakatendeje cici kweleko?’ Caciŵa mbali ja Ucimwene wambone mnope wakwinani. Mu mtwe wakuyicisya tucilijiganya yejinji pakwamba ya ucimwene welewu.