Ngani sya Mateyu 3:1-17
3 M’masiku gelego, Yohane+ M’batisi jwapite m’chipululu cha Yudeya ni kutanda kulalichila.+
2 Jwalakwe jwalalichilaga kuti, “Agalawuche mtima, pakuŵa Umwenye wakwinani uŵandichile.”+
3 Jwakulochesya Yesaya jwasasile kala pakwamba ya Yohane+ kuti, “Mundu jwinejwakwe akuŵecheta mwagumila m’chipululu kuti, ‘Alinganye chenene litala lya Yehofa!* Ajongole misewu jakwe.’”+
4 Yohaneju jwawalaga chakuwala chaubweya* wa ngamila soni lamba jwa lipende m’chiwunu mwakwe.+ Yakulya yakwe yaliji sombe ni uchi.+
5 Myoyo, ŵandu ŵa ku Yelusalemu ni ku Yudeya kosope soni madela gosope gakusyungulila Yolodani ŵayikaga kwa Yohanejo.+
6 Jwalakwe jwabatisyaga* ŵanduwo mu Lusulo lwa Yolodani,+ soni ŵanduwo ŵasalaga yakulemwa yawo pameso pa ŵandu wosope.
7 Yohane paŵaweni Afalisi ni Asaduki ŵajinji+ ali mkwika ku malo kuŵabatisyaga ŵandu, jwalakwe jwasalile kuti, “Jemanja ŵanache ŵa majoka,+ ana ŵani ŵamkalamwisye kuti mtile ukali wa Mlungu wawukwikawo?+
8 Myoyo, jemanja msogoleje yisogosi yakulosya kugalawuka mtima.
9 Mkalilambusyaga pakuŵecheta kuti, ‘M’we tuli ŵanache ŵa Abulahamu.’+ Pakuŵa ngumsalila kuti Mlungu mpaka ampanganyichisye Abulahamu ŵanache kutyochela ku maganga aga.
10 Sonitu liŵago lili kala pa lipata lya chitela. Mwamti, chitela chilichose changasogola yisogosi yambone chichisosekwe kuchikata ni kuchiponya pamoto.+
11 Unetu ngum’batisya jemanja ni mesi ligongo lya kugalawuka mtima kwenu,+ nambo jwine jwakwika panyuma pangu ali jwamachili kumbunda une, soni nganimba jwakuŵajilwa kumwula sapato syakwe.+ Jwalakwejo chachim’batisya jemanja ni msimu weswela+ soni ni moto.+
12 Fosholo jakwe jakuwululuchisya masapi jili mmyala mwakwe, soni jwalakwe chachityosya masapi gosope pamalo gakuputilapo mbeju. Tiligu chachimsonganganya ni kumŵika mu ngokwe, nambo masapi chachigajocha ni moto+ wele nganiwuŵa ukomboleche kuwusimisya.”
13 Kaneko Yesu jwayiche kwa Yohane ku Yolodani kutyochela ku Galileya, kuti abatisidwe ni jwalakwe.+
14 Nambo Yohane jwalinjile kumlekasya mwakuŵecheta kuti, “Une ni jwangusosekwa kubatisidwa ni wawojo, sambano wawojo akwikasoni kwa une?”
15 Yesu ŵamjanjile kuti, “Mkandekasya, ligongo kuli kwakuŵajilwa kwa m’weji kuti tukwanilisye yosope yakusaka Mlungu mwakutenda yeleyi.” Kaneko Yohane ŵakundile.
16 Paŵabatisidwe, ndaŵi jijojo Yesu ŵachuwiche m’mesimo, soni kwinani kwawugwiche+ ni ŵawuweni msimu wa Mlungu uli mkutuluka mpela njuŵa ni kutula pa jwalakwe.+
17 Nambosoni papikaniche maloŵe kutyochela kwinani+ gakuti, “Aju ali Mwanangu+ jwapamtima, jwangusasangalala najo.”+
