Solomona koa fa nanjary panjaka, Jehovah nivolan̈a taminany: ‘Ino raha tianao hamiako anao?’ Ho Solomona: ‘Zaho io mbala tsaiky, tsy haiko foeky mitondra vahoaka aby ty, ke amia fahendrena zaho.’ Jehovah nivolan̈a: ‘Koa zen̈y raha angatahinao, anao ataoko olo farany misain̈y aminolo jiaby. Hataoko manandraha mare koa anao. Ho ela velon̈o anao izikoa man̈araka volan̈anaka fo.’

Namboariny Solomona amy zay tempoly io. Volamena, volafotsy, kakazo, baka io vato farany tsara nampiasainy. Izy koa nampiasa man̈angy ndreky lelahy maro sady mahay. Nafaka fito taon̈o, vita tempoly io, baka io nitokanandro natao niny Jehovah. Nisy alitara tamizio. Nasiandro fan̈atitry tan̈abonizio. Solomona nandohaliky nivavaka talohany alitara tio. Volan̈iny: ‘A Jehovah, tsy ten̈a tsara tempoly ty sady hely aminao. Kanefa ato zahay hivavaka aminao, ke mba tandrin̈esa vavaka ataonay.’ Karakory eky nataony Jehovah naharen̈y vavaka Solomona? Niaraka vavaka Solomona tapitry, nisy motro latsaka baka tandran̈itry nan̈oro fan̈atitry io. Tiany Jehovah tempoly io. Ravoravo mare iro Israelita aby io!

Nanjary ren̈inolo fahendrenany Solomona io, na olo ta Israely tao, na olo baka lavitry. Ke zay olo nisy problemo nandeha taminany tan̈y. Nandeha tan̈y koa panjakavaviny Seba, nan̈ontany izy raha sarotro mare. Koa fa ren̈iny raha nivolan̈iny Solomona, izy nivolan̈a: ‘Tsy ninoako foeky raha nivolan̈inolo taminaka, fa izioty, masonaka foeky mahita fa anao misain̈y ankitin̈y, mandilatra raha ren̈iko momba anao. Mitahy anao Jehovah Zan̈aharinao.’ Nilamin̈y fiain̈anandro Israelita aby io tamy zen̈y, baka io sambatra mare iro. Kanefa raha zen̈y niova.