Nisy tsaiky viavy Jiosy zay, Estera an̈arany, nipetraka ta Sosana, ta Persy tan̈y. Iro olo baka Jerosalema, fa efa ela Nebokadnezara nitondra ry havany niala tan̈y. Nisy lelahy zay, Mordekay an̈arany, mbala havany Estera izio sady nitarimy izy. Piasany Ahasoerosy panjakany Persy Mordekay io.

Ahasoerosy tafara tatỳ, nitady vady vaovao. Nindesin̈y taminany tao man̈angy tsara sora jiaby, an̈isanizen̈y Estera. Ke Estera nifidiny panjaka. Estera tsy nimboany Mordekay nivolan̈a fa izy Jiosy.

Nisy lelahy zay, Hamana an̈arany, sefonolo ambony jiaby tao. Nan̈ambony ten̈a izy, ke tiany hankohoko taminany olo jiaby. Mordekay ndraiky tsy nety. Neloko mare Hamana, ke tihamono izy. Koa fa hainy Hamana fa Jiosy Mordekay, tiany hivonen̈a koa Jiosy jiaby tamy tany io. Hoizy tamy panjaka: ‘Iro Jiosy aby io olo tsy manjary, ke vonia iro jiaby.’ Ahasoerosy nivolan̈a: ‘Ataova zay raha tianao!’ Hamana nambelany han̈ano lalàn̈a nan̈ambara fa tokony hivonen̈a Jiosy jiaby, amy 13 Adara. Hitany Jehovah raha jiaby zen̈y.

Estera tsy nahay lalàn̈a zen̈y foeky. Mordekay nandefa lalàn̈a io taminany, baka io izy nirahiny nikoran̈a tamy panjaka. Estera nivolan̈a: ‘Olo tsy nikahin̈a kony koa mandeha amy panjaka an̈y vonen̈a e! Efa 30 andra zaho tsiary nikahiny! Zaho handeha fo. Izikoa zaho tondroeny amy kobainany, zaho tsy maty. Izikoa zaho tsy tondroeny, hofoaty edy zaho.’

Nandeha taminy haramanjany panjaka tao Estera. Niaraka izy hitany panjaka, efa nitondroeny tamy kobainany edy, baka io hoizy: ‘Ino raha tadiavinao Estera?’ Ho Estera: ‘Zaho  mba mikaiky anao ndreky Hamana amy fety hataoko hariva an̈y.’ Iro koa fa navy tan̈y, nikahiny Estera han̈aton̈o fety hafa ndraiky. Mbala nimpody nan̈ontany izy ndraiky panjaka: ‘Ino raha tadiavinao Estera?’ Ho Estera: ‘Mba vonjia zaho ndreky firenenanaka, fa misy olo mitady hamono zahay!’ Ho panjaka: ‘Azovy olo tihamono anaro?’ Nivolan̈iny Estera: ‘Io Hamana ratsy jery io!’ Neloko mare Ahasoerosy ke nirahiny nivonen̈a Hamana.

Tsisy olo nahavita nan̈afoan̈a lalàn̈a nataony Hamana io, ndray panjaka. Mordekay nataony panjaka sefonolo ambony jiaby, baka io namiany lalan̈a han̈ano lalàn̈a vaovao. Mordekay nan̈ano lalàn̈a nan̈ambela iro Jiosy aby io hiaro ten̈a, koa misy olo manafiky iro. Resindro Jiosy aby io fahavalondro tamy 13 Adara. Nanomboko tamy zen̈y, nan̈ano fety iro isaka taon̈o, hatsiarovan̈a raha zen̈y.