Saoly koa fa naty, Davida nanjary panjaka. Izy tamy zen̈y 30 taon̈o. Koa fa elaela nanjakany, nidokodoko tamy tafotran̈onany izy alin̈y araiky zay. Nahita man̈angy tsara sora niseky izy tan̈abo tarỳ. Hainy fa Batseba an̈arany man̈angy io, baka io izio vadiny Oria. Maramila Oria io. Nikahiny nandeha taminany tan̈y Batseba, iro baka tio nan̈ano firaisan̈a. Navesatra Batseba baka tio. Tsy tiany Davida ho hainolo raha nataony, ke izy tihamono Oria. Volan̈iny tamy zeneralinany: ‘Lera anaro miady, ataova farany aloha Oria, baka io anaro milifasa.’ Ke naty Oria. Nalainy Davida vady amy zay Batseba.

Hitany Jehovah aby raha ratsy jiaby io. Izy nan̈iraka Natana paminan̈y nivolan̈a tamy Davida: ‘Nisy lelahy pan̈arivo be nanan̈a ondrikondriky maro, fa lelahy masikiny araiky zay ondrikondriky araiky fo nanan̈any. Raha io mbala nalainy lelahy pan̈arivo io fo.’ Neloko mare Davida ke nivolan̈a: ‘Mila vonen̈a lelahy zen̈y.’ Ho Natana: ‘Anao kony olo zen̈y e!’ Nalahelo mare Davida ke hoizy: ‘Nanota tamy Jehovah ankitin̈y zaho.’ Nanjary nialamboetry fiain̈anany Davida ndreky fianakavian̈anany baka tamy fahotan̈a nataony io. Nisaziny Jehovah i Davida fa izy fo tsy nivoneny, fotony Davida nanetry ten̈a ndreky nifono.

Davida tihiasa tempoliny Jehovah, fa Solomona zanaka Davida nifidiny Jehovah hiasa raha zen̈y. Nataony Davida pare aby  raha nilainy Solomona han̈amboaran̈a izio. Hoizy: ‘Tempoliny Jehovah mila atao farany tsara. Kanefa Solomona mbala hely, ke zaho hitatahy izy han̈oman̈a raha jiaby.’ Nan̈amia vola maro Davida, baka io nitady piasa mahay. Namory volamena ndreky volafotsy koa izy, baka io nan̈afatra kakazo sedera baka ta Tyro ndreky Sidona. Davida koa fa hofoaty, namiany Solomona plany tempoly io. Hoizy: ‘Zaho nirahiny Jehovah han̈ano planizio hamian̈a anao. Anao aza mavozo fa han̈ampy anao Jehovah. Mahireza ke ataova asa io.’