Tsy ela tafara tatỳ, nanohitry Mosesy Kora ndreky Datana, baka io Abirama. Nisy olo 250 lahy koa niaraka tamindro. Kora nivolan̈a tamy Mosesy: ‘Zahay fa kajo, nan̈ino karaha anao fo pitariky zahay, baka io Arona pisoron̈obe? Tiany Jehovah aby olo jiaby io, fa tsy anao ndreky Arona zaraiky fo!’ Jehovah tsy ravoravo tamy Kora ndreky iro namany aby io, fotony iro nanohitry izy tamy raha nataondro zen̈y.

Mosesy nivolan̈a tamindry Kora: ‘Mandihana amy tran̈olay masin̈y an̈y anaro amaray, indesa raha fitondrasanaro motro, baka io asia emboko mangitry. Haboakany Jehovah atsika azovy olo nifidiny.’

Nandeha tamy tran̈olay masin̈y tany Kora ndreky iro lelahy 250 aby io amarainizin̈y. Navy tio koa Mosesy. Nan̈oro emboko mangitry ry Kora, karaha fataony pisoron̈o in̈y. Jehovah nivolan̈a tamy Mosesy ndreky Arona: ‘Mialà marikitry Kora ndreky iro namany aby io anaro.’

Datana ndreky Abirama, baka io fianakavian̈anany tsy nety  nandeha tamy tran̈olay masin̈y tan̈y. Iro nitsangana tambelan̈a tran̈olaindro tio. Jehovah nan̈iraka iro Israelita aby io hiala marikitry tran̈olainy Kora ndreky Datana baka io Abirama. Iro direkty niala tio. Tampoko tio nitresaka tany, ke natelin̈y tany Datana ndreky Abirama, baka io fianakavian̈anany. Kora ndreky iro lelahy 250 aby in̈y mbala tamy tran̈olay masin̈y tan̈y. Tio fo nisy motro baka andan̈itry nilatsaka tamindro ke naty iro jiaby.

Jehovah baka tio nivolan̈a tamy Mosesy: ‘Aleva tongozony sefony foko tsiaraikiaraiky, baka io sorata amizio an̈aranany. An̈arany Arona sorata amy tongozony fokony Levy. Ataova an̈aty tran̈olay masin̈y ao tongozo aby io, fa zay tongozo misy folera maniry olo tompinizio fidiko.’

Amarainizin̈y, Mosesy nan̈aboaka tongozo aby io baka tamy tran̈olay masin̈y tao. Naboakany sefony foko aby io tongozo jiaby. Tamy tongozony Arona nisy folera naniry ndreky voandraha masaka. Tio nahitan̈a fa Arona olo nifidiny Jehovah ho pisoron̈obe.