Taminy apostoly Jaona nigadra tamy nosy Patmo tan̈y, Jesosy nan̈aboaka fahitan̈a 16 taminany. Man̈ambara raha mbala hoavy fahitan̈a aby io, karaha ataony fomba hankamasin̈ana an̈arany Jehovah, faviany Fanjakan̈anany ndreky fan̈anovan̈a sitraponany ambony tany eto, mira andan̈itry an̈y.

Jaona nahita Jehovah tamy voninahitrinany, nipetraka tamy sezinany tandan̈itry tan̈y. Nisy antipan̈ahy 24 nikodidin̈y izy, nan̈ano lamba fotsy ndreky satrokoampanjaka. Volamena satroko io. Nisy tselatra ndreky kotrobaratra baka tamy seziny Jehovah. Iro antipan̈ahy 24 aby io nankohoko tamy Jehovah ndreky nanompo izy. Jaona koa nahita olo maro baka tamy firenena, vahoaka, ndreky volan̈a isankarazany nanompo Jehovah. Nisy Zanaka Ondrikondriky, Jesosy izio, nikarakara olo aby io ndreky nitondra iro tamy ranony fiain̈ana. Izy amy zay nahita Panjaka Jesosy, nanomboko nanjaka tandan̈itry tan̈y, niaraka tamindro antipan̈ahy 24 aby io. Fan̈araka zio, Jaona nahita Jesosy niady tamy dragona, Satana zen̈y, ndreky iro demony aby io. Natsipiny Jesosy tambony tany tatỳ iro.

 Apostoly Jaona amy zay nahita sary tsara. Izio Zanaka Ondrikondriky ndreky iro 144 000 nitsangana tamy Bongo Ziona. Izy koa nahita anjely mitilin̈y, man̈iraka olo hatahotro Zan̈ahary ndreky han̈amia voninahitry izy.

Izy baka tio nahita ady Haramagedona. Taminy ady io Jesosy ndreky tafikinany niady tamy Satana ndreky tafikinany. Tamy fahitan̈a farany, Jaona nahita fa nilamin̈y mare tandan̈itry tan̈y ndreky tambony tany teto. Ripaka Satana ndreky iro jiaby man̈araka izy. Iro jiaby andan̈itry an̈y ndreky olo jiaby ambony tany eto amy zen̈y han̈aja an̈arany Jehovah ndreky hanompo izy zaraiky fo.