Fampidiran̈a Fizaran̈a 1
Amy voanalohany ao, Baiboly mikoran̈a fa Jehovah niasa raha andan̈itry ndreky ambony tany. Mananjanaka ma anao? Ampianara izy fa maro raha niasainy Jehovah, sady maro tsara. Tsy nataony mira biby olombelon̈o fotony nataony mahay mivolan̈a, mieritreritry, miasa raha, mihira, baka io mivavaka. Ampia zanakanao ho tia Jehovah ke ampianara izy, fa Jehovah io ten̈a mahery ndreky misain̈y, baka io tiany raha jiaby namboariny, an̈isanizen̈y atsika tsiaraikiaraiky.
AMY FIZARAN̈A TY
Zan̈ahary Niasa Lan̈itry Ndreky Tany
Baiboly mikoran̈a fa Zan̈ahary niasa lan̈itry ndreky tany. Fa asa mba hainao azovy anjely namboariny talohany izy niasa raha hafa?
Zan̈ahary Niasa Lelahy Ndreky Man̈angy
Zan̈ahary nan̈amboatra lelahy ndreky man̈angy voanalohany, baka io iro napetrany tamy zaridain̈y Edena tao. Tiany iro hiteraka ndreky han̈ova tany jiaby hanjary paradisa.
