Metyu Bom 21:1-46
21 Enjep se Jerusalem mand pu kulu Betpege, komngom Olip tuwalto sem bar punjup kunum, Jises disaipol tal kelnge yero punjil.
2 Olom enjel nengo embe nim: “Elep taun kerei e tuwal pu wamnam kanambel dongi ende kanem kol paksam, ala dongi ngalem ende bol ai morambel. Elep enjel kanem poling nesi na mei bar tunambel.
3 Ala alamb ende wo elep bol yu ninjip dal elep embe ninambel: ‘Kerma dongi tal e konganem enda paim.’ Ala wamnam kelde elep si tunambel.”
4 Wal e min wom, propet ende yune pakim mongom tom, olom embe nim:
5 “Saion amblem nengo embe nindel: ‘Kane! King ainem nim mein bar wonom, olom mambnem amin paim, ala kong dongi a amine meim. Weieri e dongi ngalem ende, wal bono koi nine erim dongi e ngalem.’”
6 Embe pile disaipol tal pu, Jises wal eiyal a nim mal enjil.
7 Enjel dongi ngalem bol ai tunjil, ala enjep kondos oriro gulo dongi bol a senge, olom bola amine mom.
8 Alamb puli enjep kondos oriro wusngam punda bar kumbul senjip, ala alamb pende ond anglem barsi tu malma kumbul senjip.
9 Alamb Jises pum bar yero punjup na bulto wonjup alamb porpor wiro embe ninjip: “Kaple ende Depit Ngalem pakeroiya! Johova* kangem a wonom ye blesing olom bol seim! Nim namal min epen mein kaple ende olom pakerondol!”
10 Jises, Jerusalem tuwal pum kunum, alamb porpor taun a monjup malmal ere ki embe ngonjup: “Ye e namal?”
11 Alamb anjngo embe ninjip: “E Jises, propet ende Nasaret, Galili tuwalto mom wonom!”
12 Jises tempol a gal pu alamb wal topro ku bol er monjup to ori kem. Ala teipol se ku sens ere, bol pom se ka balus maket er monjup to tuli nim.
13 Olom enjep nengo embe nim: “Got Yuwom embe dom: ‘Alamb na garna yane nine enjip gar paninam.’ Ba enem er kerambe kunumb alamb okul esim dumam mal seim.”
14 Ala dungol emil erim na simb kes mom alamb, olom tempol a mom bar wongo kes aijep to pornim.
15 Pris mol ngimba kenjip na Lo sape pam ga kanjip, olom wal kaka jelmal erim, ala kanjip ngal tempol a wiro embe ninjip: “Kaple ende Depit Ngalem e pakeroiya!” Embe pile enjep ka napile
16 olom nengo embe ninjip: “Nim yu nim pisen mo?” Jises enjep nengo embe nim: “Weieri na pis. Enem yu e ger nakanja kanjip kana? E embe: ‘Nim ngal na ngal kumblam kumbol si akin, nim kangem min kesim.’”
17 Ala olom enjep wakro taun e sikele se ori kulu Betani pum, ala emil pange olom ele pam.
18 Ala kinimba wei olom seyem taun a punal ne pu pim, olom konorom.
19 Olom kanim ond pik ende wusngam dangnem a pange, pu kanim mongom ende to napam, aulom mongse mom. Olom ond e nengo embe nim: “Nim aimanj aimanj mongom narondol.” Ala wamnam ond pik e gom.
20 Disaipol ga wal e kanjip kunum, enjep malmal wei ere embe ninjip: “Ond pik e nalmal wamnam wei gorom?”
21 Jises enjep yu pundom nengo embe nim: “Na yu weieri ne enem ngonal, enem pilgi pande bunuman tal nambjip dal, na ond pik bol wal erind mal enem ding mal enam. Ala enem wal e mongse na enam, ma, enem mekbem e nengo ‘Akle dusne se apnol mene pa ninam,’ wal e min wonda.
22 Ala enem wal porpor yane ne ki sim wal, pilgi pam dal sinam.”
23 Jises tempol a tuwal pu alamb yu nengo mom kunum, pris mol ngimba kenjip na alamb tawol enjip ga wo embe ninjip: “Nim wal embe enen kun paim mo? Namal nim namba ngom?”
24 Jises yune yem kele embe nim: “Na pra enem ki ende ngonal. Enem na ki e pundom ngonjup dal, na namba nanja bar wei si wal embe erind enem ne ngonal.
25 Jon namba si alamb nol pakil ngom, namba min epen wom mo ya mala alamb kin sim?” Enjep enjep yu nepile embe ninjip: “Kenem ‘Min epen’ wom paninjin dal, olom embe ninda, ‘Embe pam dal nal ende enem olom bol pilgi nanim?’
26 Ba kenem ‘Alamb bol sim’ paninjin dal, kenem alamb bol kisal goramen nal enem, enjep Jon propet ende ne pisim.”
27 Embe pile enjep yu pundom ne Jises ngo embe ninjip: “Kin nakanmen.” Ala olom enjep nengo embe nim: “Embe pam dal, na pra namal namba ngondo wal embe erind enem ne nangonal.
28 “Enem nal ne pisim? Ye ende ngangem tal monjil. Olom pu ngangem komna mom bar embe nim: ‘Ngalna, nim yipe pu wain tanjip bar kongan endel.’
29 Ba ngalem embe nim: ‘Na punal ka napis,’ ba bulto olom bunuman erkun ere ala pum.
30 Pi ye e pu ngangem ende mom bar yu ding mal nim. Ngal e embe nim: ‘Dana, na punal,’ ba olom napum.
31 Embe pile ngal tal e, namal dam ka pim mal karkar erim?” Enjep embe ninjip: “Ngal komna.” Jises enjep nengo embe nim: “Na yu weieri ne enem ngonal, ku takis sim alamb na amb pasdia Got Gapman* a yero se tuwal pu enem ngom.
32 Jon enem bol wo mambnem dulto tanim, ba enem olom bol pilgi naninjip. Takis sise enjip ga na amb pasdia olom bol pilgi ninjip. Enem wal e kanjip, ba bulto bunuman erkun ere olom bol pilgi naninjip.
33 “Yu ekin ende piya: Ye ende mom, olom mal dam. Olom wain tal moklo gul ersi tuwal kem. Greip kambsam wal wain tam bar er pakim, ala gar kerei* ende minkin tau pakle, wain alamb jel angel a kele kantawol er moiya ne* olom se kulu kolbar wei ende pum.
34 Wain mongom bol tom kunum, olom kongan nip ga ne kelnge pu wain tawol er monjup ga ninambe olom wain tange make tonam ne punjup.
35 Ba wain tawol monjup ga, olom kongan nip ga kem punjup ende tonjip, ende to gonjup ala ende ku tonjip.
36 Ala kongan nip ga pende kem punjup, yero kem punjup mal ma, pende puli kem punjup, ba kem punjup ga bol mambnem ding mal enjip.
37 Bulto wei olom ngangem kelnge enjep monjup bar pum, olom embe nim: ‘Na ngalna bol mol mene keram.’
38 Wain tawol monjup ga olom ngangem wom kane, enjep enjep yu nepile embe ninjip: ‘Ye e dam wal porpor sinda. Woiya, kenem olom to golo olom sinda wal kenem sinamen!’
39 Embe pile olom ngunj sise wain tal mokjup bar oriro pu to gonjup.
40 Wain dam wonda kunum, wain tawol er meim ga bol nal enda?”
41 Pris mol ngimba kenjip na alamb tawol enjip ga olom nengo embe ninjip: “Enjep alamb kes, embe pile olom enjep erkes ere, wain tal mokum alamb ende angel a kelde kantawol er morambe, mongom bol tonda kunum tang si olom ngonam.”
42 Jises enjep nengo embe nim: “Enem Got Yuwom pam ger nakanja kanjip kana? E embe: ‘Kapenta kanka nakanjip ku, gar jeknem a* pase ngimba pum. Johova* erkelnge wal e min wom, ala kenem dungol a kawei paim.’
43 Embe pile na enem ne ngonal, Got Kingdom* enem bol seim siyem ne, alamb dulom ende Kingdom e konganem ere mongom tom alamb ngonda.
44 Ala alamb ende ku e bola borom dal, olom ombun kerma sinda. Ala ku e mene wo alamb ende bola pam dal, tumbrum wei ere se kulman kol punda.”
45 Pris mol ngimba kenjip na Parasi ga olom yu ekin embe erim pinjip kunum, enjep kol dom ne pilkane enjip.
46 Enjep olom to ambram ne pinjip, ba alamb puli monjup bol kisal gonjup, nal erim alamb olom propet ende ne pinjip.
Footnotes
^ Baibel Diksinari kane.
^ Mo “Kingdom.”
^ Ele kunumb alamb mo tu kong penegar a tuwal wonam kane moram gar.
^ Grik, “ wain tawol enjip ga angel a kele ku sinam ne erim.”
^ Grik, “gar jeknem a minto paim ku.”
^ Baibel Diksinari kane.
^ Mo “Gapman.”
