Metyu Bom 19:1-30
19 Jises yu embe mal ne pornim kunum, olom Galili wakro sikele Judia mal mak* pam bar, Nol Joden yemto pum.
2 Alamb pulikes olom karkar er punjup, ala enjep kes kanem kanem pam kulu ele to pornim.
3 Ala Parasi ga olom mom bar wo erkanam ne ki embe ngonjup: “Wal kanem kanem min wonda erkelde ye ende bolsinem mem kelip tonda, lo kaple padom mo ma?”
4 Olom embe nim: “Alamb yero wei ersem ye, erkelnge ye na amb min wonjup pane pam yu enem ger nakanja kanjip,
5 e embe: ‘Mem e pande ye dam na mam sikele ambiyem bol tap tonda, ala enjel wose nganj ding punambel pane pam pra ger nakanjip kana’?
6 Embe pile enjel tal na meimbel, enjel wose nganj ding pumbol. Got si ding kel sikem wal alamb kelip naronam.”
7 Ala Parasi ga olom nengo embe ninjip: “Embe pande nal ernge Mosis, ye ende bolsim mem kelip tonda pepe ambiyem ngo amb sikera panim?”
8 Olom enjep nengo embe nim: “Enem peng dongal pam, embe pile Mosis kankelnge bolsinjip mem kelip tonjip. Ba komna wei mambnem embe napam.
9 Na enem ne ngonal, amb ende pasdia* na ende, andam bolsinjil mem kelipro amb ende sim dal, ye e adaltri* enem.”
10 Ga disaipol olom nengo embe ninjip: “Bolsim bar embe pam dal, bolsinamen ka napanda paim.”
11 Olom enjep nengo embe nim: “Alamb porpor yu e karkar na esim, ma. Presen e sim alamb embe esim.
12 Ga pende bolnasim nal enem, manjep kangim kunum nganj aijep kes mom. Pende bolnasim nal enem enjep kopusjip.* Ba pende bolnasim nal enem, enjep epen Gapman* pisim. Ye ende bolnasinal nepim dal, embe enda kawei.”
13 Pi alamb ngal porpor si olom mom bar tunambe, enjep amble yane ne ngonda ne tunjup. Ba disaipol ga alamb e yu ngonjup.
14 Ba Jises embe nim: “Ngal kerambe na mei bar wonambe, enem kol natungya. Nal enem epen Gapman alamb ngal mal meim sinam.”
15 Ala olom angel kele enjep blesim ere, bulto kulu ele sikele sepim.
16 Pi ye gal ende Jises mom bar wo embe nim: “Tisa, na nawal ka ende ere kol aimanj mem sinal?”
17 Jises olom nengo embe nim: “Nal ende nim na ki si nawal ka paim a don? Got mongse ka meim. Ba nim kol mem sinal nepin dal, kunum kunum lo porpor karkar endel.”
18 Ye gal e Jises ki ngo embe nim: “E nal lo pende? Jises embe nim: “Nim alamb to nagorol, nim adaltri* na endel, nim kunumb nanondol, nim kot a yu gend nanindel,
19 nim danem na manem bol mol mene kerel, ala nenem kanka kanen mal, alamb ende ding mal kanka kanjel.”
20 Ye gal e Jises nengo embe nim: “Na lo e porpor karkar erind, nawal ende enal paim?”
21 Jises olom nengo embe nim: “Nim kawei moral nepin dal, pu kannonon wal ku bolo, ku sip konbengel meim alamb ngo wo na karkar endel. Embe erin dal, nim topom kerma wei paim wal min epen seim sindel.”
22 Ye gal e, yu e pim kunum olom kumbol ombun si sepim, nal erim olom wal pulikes wei kannom.
23 Ala Jises olom disaipol aiyem man nengo embe nim: “Na yu weieri ne enem ngonal, ku puli kannonom ye epen Gapman tuwal punda pesil wei panda.
24 Na yu ala ne enem ngonal, ku puli kannonom ye Got Gapman a tuwal punal ne enda pesil wei pa, kong kemol kal nidol tund seim bar tuwal punal ne enem e ngonda.”
25 Disaipol ga yu e pinjip kunum, bunuman puli kele embe ninjip: “Namal wei kol mem sinda kaple enem?”
26 Jises enjep kun wei kane embe nim: “Alamb enjep enjep embe enam kaple na enem, ba Got wal porpor enda kaple enem.”
27 Ala Pita yu pundom ne embe nim: “Kane! Kin wal porpor wakro sikele wo nim karkar esmen. Embe pile kin nawal sinamen?”
28 Jises enjep nengo embe nim: “Na yu weieri ne enem ngonal, wal erkerambe wose kol pundo ye Ngalem sia king a amine mora kunum, enem na karkar esim ga pra, sia king 12-poro senda bar amine jas molo Israil ye dulom 12-poro omuk tonam.
29 Ala alamb porpor na kangna nepile garjep, angjep man, ambajep man, manjep man, danjep man mo mal aijep wak tonjip, kunum 100-poro sise minto punam, ala kol aimanj mem sinam eri.
30 “Ba alamb puli ngimba meim se bulto punam, ala bulto meim alamb se ngimba wonam.
Footnotes
^ Mo “Boda.”
^ Grik, por·neiʹa. “Porneia” Baibel Diksinari kane.
^ “Adaltri” Baibel Diksinari kane.
^ Grik, “alamb enjep walke si sikenjip.”
^ Mo “Kingdom.”
^ “Adaltri” Baibel Diksinari kane.
