Metyu Bom 2:1-23
2 Herot* king mom kunum Jises mam, Betliem, e Judia tuwalto kangim. Bulto oll na kajip omuk toro enjip ga, al Is monjup sikele se Jerusalem wo,
2 ki embe ngonjup: “Juda king mora ngal mam kangim nanja bar paim? Kin al Is molo olom kajip pam kane, gosmung pup bol ngonamen ne wonjin.”
3 King Herot yu e pim kunum, bunuman puli wei kem ala Jerusalem monjup alamb pal bunuman puli kenjip eri.
4 Embe pile, pris mol ngimba kenjip na Lo sape pam ga porpor wiro, Krais* jebar kangram a ne ki sim.
5 Enjep olom nengo embe ninjip: “Betliem, Judia tuwalto kangram. Nal enem propet ende yu bolo embe nim:
6 ‘Betliem, nim Juda tuwalto seien, nim Juda kongan pengem esim ga dungol a taun ei ende naseien ma, nal enem na alambna man Israil, kantawol enda ye ende nim tuwalto min wonda.’”
7 Herot akmak ere oll na kajip omuk toro enjip ga wiro yu ninjip mane omukro, nal kunum wei kajip e min wom pilkane erim.
8 Olom kelnge enjep Betliem punjup kunum embe nim: “Enem ngal e mane kur kansinjip dal, yem wo ninambe na pra pu gosmung pupbol ngonal.”
9 King nim yu pile bulto sepjip. Enjep kajip ende al Is mol kanjip, enjep punjup bar yero pu ngal e pam bar gar minto pamom.
10 Kajip e kanjip kunum enjep kawei wei pinjip.
11 Enjep gara gal pu kanjip ngal e mam Maria semom, embe pile gosmung pupbol ngonjup. Ala boks apse topom kerma bom wal sipjip ngonjup, e gol, prenkinsens* na mer.*
12 Ba Got wurkumbanj wusngam a kanpol tonam yu nengo, enem Herot meim bar yem napuya nim. Embe pile enjep wusngam jel karkar ere seyem kulu aijep punjup.
13 Enjep sepjip kunum bulto, Johova* enjol aiyem wurkumbanj wusngam a Josep nengo embe nim: “Akle, ngal mam bol si kese Isip po. Ele mol punambe na kulu ele wakroya nine wakronam, nal enem Herot ngal kembis e kurkansi to goral ne enem.”
14 Embe pile Josep akle ngal e mam bol emilpal sise Isip pum.
15 Olom pu ele mol pungo Herot gom. Wal embe min wom e Johova propet aiyem wusngam a yune pakim mal mongom tom, olom embe nim: “Na ngalna Isip wakro sewa nind.”
16 Herot pilkane erim oll na kajip omuk toro enjip ga, olom yu gend ne ngonjup pam pile kumbol mul kes wei sim. Olom yera pende kelnge Betliem na kulu pende mand sem bar pu, yengal kongar tal molse mene punjup porpor to gonjup. Olom oll na kajip omuk toro enjip ga yu ninjip omuk manero kane, kongar embe monjup ngal to gom.
17 Wal e propet Jeremaia yune pakim mongom weirom, olom embe nim:
18 “Numun ende kulu Rama min wom pinjip, kene ga golang wandil mal erim, e Resel numun, olom ngalem man pile ke nim. Alamb ende yune olom kumbol amin ngonam kanapim nal erim, ngalem man ende wei namonjup.”
19 Herot gom kunum bulto, Johova enjol aiyem ende Josep Isip mom bar wurkumbanj wusngam a pu
20 embe nim: “Akle, ngal mam bol sise Israil po, nal enem ngal e togoram ne kurjup alamb gol sikenjip.”
21 Embe pile Josep akle ngal e mam bol sise Israil pum.
22 Ba olom, Akelous dam Herot dumam si Judia king meim paninjip pim kunum, kulu ele punda mundmong to kisal gom. Ala Got wurkumbanj wusngam a, olom kanpol tonda yu ende nengom pile se Galili pum.
23 Josep pu taun ende kangem Nasaret paninjip sem bar mom. Embe erim bar propet ga yune pakjip mongom tom, enjep embe ninjip: “Olom* Nasaret ye paninam.”
Footnotes
^ “Herot” Baibel Diksinari kane.
^ Mo “Mesaia, Got Makrom Ye.”
^ “Prenkinsens” Baibel Diksinari kane.
^ “Mer” Baibel Diksinari kane.
^ Baibel Diksinari kane.
^ Mo “Krais.”
