Ushacha baggan deˈiya misiliyan qonccidaagaadan, daro asay Pirddaa Gallassan biilooniyan qoodettiya asaa shemppoy kase oottidobau bessiya pirddaa ekkanau, giishin amaridaageeti saluwan deˈiyo woytuwaa ekkanau, harati qassi siˈooliyan barchetanau Xoossaa araataa sinttan eqqoosona giidi qoppees. SHin, Pirddaa Gallassan oottanau halchettidabay asaa naaquwaappe ashshiyoogaa gidiyoogaa Geeshsha Maxaafay yootees. (Maz. 96:13) Yesuusi asaa naatussi zaarettidi suure pirddaa ehiya Daanna gidanaadan Xoossay sunttiis.—Isiyaasa 11:1-5; Oosuwaa 17:31 nabbaba.

Koyro bitanee Addaamee eriiddi Xoossaa bolli makkalido wode, ba zeretta ubbay nagarau haarettanaadan, tuggatanaadaaninne hayqqanaadan oottiis. (Roo. 5:12) Yesuusi hegaa giigissanau biilooniyan qoodettiyaageeta hayquwaappe denttana. Ajjuutaa maxaafay hegee Kiristtoos Yesuusa shaˈu layttaa haaruwaa wode polettanaagaa qonccissees.—Ajjuutaa 20:4, 11, 12 nabbaba.

Hayquwaappe denddidaageeti pirddaa ekkiyoy hayqqanaappe kase oottidobaana gidennan, Ajjuutaa shemppo 20n odettida ‘maxaafatun’ xaafettidabau azazettiyoogaana woy azazettennaagaana. (Roo. 6:7) Kiitettida PHauloosi, hayquwaappe denddidi Xoossaabaa tamaaranaageetu giddon “worddoikka xilloikka” deˈanaagaa yootiis.—Oosuwaa 24:15 nabbaba.

Xoossaa Yihoowabaa siyennaaninne ayyo oottennan hayqqidaageeti kaseegaappe laamettidi loˈˈobaa oottiyo qaaday etau deˈana. Eti loˈˈobaa oottiyaaba gidikko, ‘deˈanau denddidosona’ giyoogaa. SHin, hayquwaappe denddidaageetuppe issoti issoti Yihoowabaa tamaaranau koyokkona. Eti ‘pirddettanau denddidosona’ giyoogaa.—Yohaannisa 5:28, 29; Isiyaasa 26:10; 65:20 nabbaba.

SHaˈu layttaa Pirddaa Gallassaa wurssettan, Yihooway azazettiya asaa naati koyroogaadan polo gidanaadan oottana. (1 Qor. 15:24-28) Azazettiyaageetu ubbaassi he ufayssiya hidootay deˈees! Wurssetta paaciyaa wode, Seexaanaa Dabloosi shaˈu layttau qashettido ciimma ollaappe Xoossay a birshshana. He wodekka Seexaanay asaa Yihoowappe haassanau malana, shin Seexaanaa eqettidaageeti saˈan merinau deˈana.—Isiyaasa 25:8; Ajjuutaa 20:7-9 nabbaba.

Geeshsha Maxaafay ha alamee xayiyoogaakka ‘pirdda gallassaa’ yaagees. Ha pirdda gallassay, Nohe wode iita asaa ubbaa xayssida Bashshaa Haattaagaadan qoppennan puttu gaana. “Xoossau goinnenna asati” mata wode xayi simmin, ‘xilloy deˈana’ saˈan, asaa naati ooratta dere gididi deˈanaagee ufayssiyaaba.—2 PHeexiroosa 3:6, 7, 13 nabbaba.