Xoossaakko SHiiqa

“Taani GODAI, Intte Xoossai Geeshsha”

Wogaabaa SHemppo 19

XOOSSAA YIHOOWAY ‘geeshsha, geeshsha, geeshsha.’ (Ajjuutaa 4:8) Yihooway aybippenne aadhidi keehi geeshsha gidiyoogaa Geeshsha Maxaafay hegaadan qonccissees. Xoossay nagaraappe muleera haakkidaagaa; ayba ogiyankka nagari a bochenna. Hegee, geeshshatettan laggetiyay baynna Xoossaakko polo gidenna asaa naati shiiqanau hidooti baawa giyoogee? CHii, hegaadaana gidenna! Nuuyyo hidootay deˈanaadan oottiya qaalata Wogaabaa shemppo 19n ane beˈoos.

Yihooway Muuseyyo: “Israa7eela asau ubbau hagaadan yaagada yoota” yaagiis. Hegaappe kaallidi i yootidobay he biittan deˈiya asa ubbau haniyaagaa. Muusee etau ay yootana koshshii? Xoossay: “Taani GODAI, intte Xoossai geeshsha gidiyo gishshau, inttekka geeshsha gidite” yaagiis. (Paydo 2) Israaˈeeleti ubbay geeshsha gidana koshshees. “Gidite” giya qaalay akeekisso gidennan azazo. Xoossay azazidoy asi oottana danddayennabee?

Yihooway ba geeshshatettaa yootidoy aagaara issi mala hanotan geeshsha gidanaadan gidennan, azazanau bau gaaso oottidi gidiyoogaa akeeka. Hara ogiyan, Yihooway baayyo goynniya, polo gidenna Israaˈeeleti baagaadan geeshsha gidanaadan yootibeenna. Hegee haniyaaba gidenna. Yihooway, aybippenne aadhidi “Geeshsha” Xoossa. (Leemiso 30:3) Gidikkokka, Yihooway geeshsha gidiyo gishshau, baassi goynniya, polo gidenna asaa naati danddayiyo keenan geeshsha gidanaadan koyees. Eti ayba ogiyan geeshsha gidana danddayiyoonaa?

Yihooway geeshsha gidanaadan azazi simmidi, deˈo macaraa ubbaa xeelliyaagan Muuse baggaara koshshiyaabata yootiis. Israaˈeeleti ubbay kaallidi deˈiyaageetu mala kandduwaa maarata azazettanaadan koyettees: yelidaageetanne cimata bessiyaagaadan oyqqiyoogee, (paydo 3, 32), tulletuyyo, qooqetuyyoonne hiyyeesatuyyo qoppiyoogee, (paydo 9, 10, 14), haratuyyo ammanettiyoogeenne asa asappe shaakkennaageenne (paydo 11-13, 15, 35, 36) banttanaara issippe goynniyaageeta bantta huuphedan siiqiyoogee koyettees. (paydo 18) Hageetanne odettida hara maarata naagiyoogan Israaˈeela asi “[ba] Xoossaayyo geeshsha gidana.”—Qoodaabaa 15:40.

Geeshshatettaabaa yootiya azazoy nuuni Xoossaa Yihoowa qofaanne a ogeta loyttidi akeekanaadan maaddees. Hegau maaddiya issibay, aara mata dabbotaa medhidi i kessido kandduwaa maaraara moggidi deˈanau, nuuni danddayiyo ubbabaa oottana koshshiyoogaa akeekoos. (1 PHeexiroosa 1:15, 16) Nuuni he maarata naagiyoogan nu deˈuwan keehippe ufayttana danddayoos.—Isiyaasa 48:17.

Geeshsha gidanaadan imettida azazoy, Yihooway baassi goynniyaagetun ammanettiyoogaakka bessees. Yihooway nuuni oottana danddayennabaa nuuppe mule naagenna. (Mazamure 103:13, 14) A leemisuwan merettida nuussi, asaa naatussi, kumetta hanotan gidana xayikkonne, geeshshatettaa dichiyo abbee meretan deˈiyoogaa i erees. (Doomettaabaa 1:26) Geeshsha Xoossaa Yihoowakko waanada keehippe shiiqana danddayiyaakko tamaaranaadan hagee nena denttettidee?

[Sinttaa 31n deʼiya misiliyaa]

Geeshshatettaa dichiyo abbee nuussi meretan deˈees