Neeni Geeshsha Maxaafaa Akeekana Danddayiyo Ogiyaa

 3. Haratu Maaduwaa Ekka

Erettenna biittan deˈiyaabaa xannaˈanau yuuyiya Edward Joon Eeri Nelabor giyo bazzuwaa dembbaa meto hanotan kanttidi biyo wode, he heeran deˈiya Aborjjine geetettiyaageeti ulettida shafiyaappenne zaafiyaappe haattaa demmiyo ogiyaa a bessidosona. He heeraabaa eriyaageetu maaduwaa ekkidoogee guyyeppe Eera shemppuwaa ashshiis.

HA LEEMISOY bessiyoogaadan, issi metiya allaalliyaa muruta ogiyan polanau darotoo hegaa xeelliyaagan meezee deˈiyo urappe maaduwaa koshshana danddayees. Neeni Geeshsha Maxaafaa nabbabanau doommiyo wodekka hanotay hegaa mala.

Yesuusi bana kaalliyaageeti hara uri maaddennan Geeshsha Maxaafaa akeekoosona giidi qoppibeenna. Issi wode i, “Xoossaa maxaafati giyoogee etassi gelana mala, eta wozanaa dooyiis.” (Luqaasa 24:45) Geeshsha Maxaafay tamaarissiyoobaa a nabbabiyaageeti akeekanau maaduwaa koshshiyoogaa Yesuusi erees.

Maaduwaa Ooppe Demmanee?

Yesuusi bana kaalliyaageeti he maaduwaa immanaadan kiittiis. Yesuusi saluwaa baanaappe kase: “Hegaa gishshau, intte biidi, asa ubbaa tana kaalliyaageeta oottite; . . . taani inttena azazidobaa ubbaa eti naagana mala, eta tamaarissite” yaagidi azaziis. (Maatiyoosa 28:19, 20) Kiristtaanetu waanna oosoy tamaarissiyoogaa;  hegee Geeshsha Maxaafaa baaso siraataa galla galla deˈuwan waatidi oosuwan peeshshana danddayiyaakko qonccissiyoogaa gujjees. Tumu Kiristtaaneti harati Geeshsha Maxaafaa akeekanaadan maaddoosona.

Yesuusi bana kaalliyaageetussi he oosuwaa immi simmin daro gamˈˈennan, garamissiyaabay haniis. Hananabaa yootiya Isiyaasa maxaafaa nabbabiya, Toophiyaa biitta asa gidida, kawo keettan oottiya issi bitaniyaabaa Geeshsha Maxaafay yootees. He hiraagaappe akeekibeenna issi qofaa he bitanee nabbabees. Geeshsha Maxaafay yootiyoogaadan, bitaniyau kirqqi giida xiqiseti: “Dorssadan i shuhettanau laagettiis. Dorssa marai ba ikisiyaa meediyaagaa sinttan co77u giyoogaadan, ikka ba doonaa pogibeenna. I kauyyidoogan au xillo pirddi xayiis. A de7oi ha sa7aappe pude ekettiichchido gishshau, a zariyaabaa oonee yootanai?” yaagoosona.—Oosuwaa 8:32, 33; Isiyaasa 53:7, 8.

He bitanee Geeshsha Maxaafaa loytti eriya Kiristtaaniyaa Piliphoosa: “Hananabaa yootiyaagee hagaa obaa odii? Babaa odiiyye woi hara asabaa odii?” yaagidi oychiis. (Oosuwaa 8:34) Toophiyaa asa gidida he suure bitanee goynnanau Yerusalaame biis; qassi kaaletuwaa demmanau woossennan aggenna. I amottidi  ashkketettan nabbabiiddi deˈiyoogee qoncce. Gidoppe attin, ha bitanee nabbabiyoobaa akeekibeenna. I Piliphoosi maaddanaadan ba huuphiyaa kawushshidi oychiis. Piliphoosi qonccissidobay he bitaniyaa keehippe ufayssidi, i Kiristtaane gidanaadan denttettiis.—Oosuwaa 8:35-39.

Piliphoosinne beni wode deˈida hara Kiristtaaneti oottido oosuwaa Yihoowa Markkati oottiiddi deˈoosona. Yihoowa Markkati 235ppe dariya biittatun tumuppe Geeshsha Maxaafay tamaarissiyoobay aybakko asay akeekanaadan bantta dosan maaddoosona. Eti hegaa oottiyoy issitoo issi huuphe yohuwan Geeshsha Maxaafaa xannaˈissiyoogaana. Hegaa mala xinaatee issi allaalliyaa xeelliyaagan Geeshsha Maxaafay woygiyaakko pilggiyoogaa gujjees. *—“Geeshsha Maxaafaa Oyshatuyyo Aliya Zaaruwaa” yaagiya saaxiniyaa xeella.

“Ta Oysha Ubbau Zaaruwaa Demmaas”

Koyro huuphe yohuwan denttido, Isttefeni, Balbbaneeranne Jo-Aana Yihoowa Markkatuura Geeshsha Maxaafaa xannaˈiyoogaa doommidosona. Isttefeni hagaadan giis: “Geeshsha Maxaafaa baaso siraatata woykko taariketa geeddarssiyo wode, issi allaalliyaa xeelliyaagan darotoo Geeshsha Maxaafan zaaruwaa demmiyoogee tana garamissees. Yihoowa Markkatuura Geeshsha Maxaafaa xannaˈanaappe kase hegaadan oottanaadan ooninne tana bessibeenna. Geeshsha Maxaafay qashoy baynna palamaaninne phalqqettiya qofan kumidaba gidennaagaa eriyoogee keehippe woppissiyaaba.”

Balbbaneera hegaa maayawusu. A hagaadan gaasu: “Taani tamaaridobay ubbay issoy issuwaara moggottiyaagaanne ammanttiyaagaa. Issibay tuma gidiyoy woosa keettay tamaarissido gishsha xallaassa gidennan, ubbabau Geeshsha Maxaafaappe qoncce naqaashay imettiyo gishshataassa.” Jo-Aana: “Xoossay asaa qofissiya daro oyshay deˈiyoogaa eridi, hegaa zaaruwaa ba qaalan xaafissido gishshaunne ta oysha ubbau Geeshsha Maxaafaappe zaaruwaa demmanaadan oottido gishshau, a anggau hoola gays” yaagaasu.

Neeni eriyo Yihoowa Markki deˈii? Ha xinaatiyaa waatidi xannaˈiyaakko he ura ayssi oychikkii? Neeni Yihoowa Markkatuppe oonanne erennaba gidikko, ha maxeetiyan sinttaa 2n deˈiya qatotuppe issuwan xaafa. Xoossaa ayyaanaynne Geeshsha Maxaafaa tamaarissiyo giday deˈiyo uri maaddiyo wode, qassi suure qofaa oyqqiyo wode, Xoossaa Qaalay akeekanau metiya maxaafa gidenna. Geeshsha Maxaafaa akeekanau danddayaasa!

[Tohossa qofata]

[Sinttaa 8n diya misiliyaa]

Geeshsha Maxaafaa Oyshatuyyo Aliya Zaaruwaa

Yihoowa Markkati Geeshsha Maxaafaa xinaatiyau goˈettiyo huuphe yohotuppe amaridaageeti kaallidi deˈiyaageeta.

• Xoossay saˈau halchidoy aybee?

• Hayqqidaageeti awan deˈiyoonaa?

• Nuuni deˈiyoy ‘wurssetta gallassaanee’?

• Xoossay tuggaa aybissi coˈˈu giidi xeellii?

• Ta soo asaa duussaa waatada ufayssiyaagaa oottana danddayiyaanaa?

[Sinttaa 7n deʼiya misiliyaa]

Geeshsha Maxaafaa akeekanau . . . Xoossaa ayyaanaa demmanau woossa; suure qofaa oyqqada nabbaba; haratu maaduwaa ekka