3 Yesuusabaa Tumaa Tamaara

“Xoossaa Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis.”—Yohaannisa 3:16.

XUBE GIDIYAABAY AYBEE? Issoti issoti Yesuusi mule deˈida asa gidenna goosona. Harati i deˈida asa gidiyoogaa ammanoosona; shin daro wodiyaappe kase hayqqida, hara asappe dummatenna asa goosona.

HE XUBIYAA WAATA XOONANA DANDDAYAY? Erissiyo ashkkaraa Naatinaaˈeela leemisuwaa kaalla. * A laggee Piliphoosi Masiyaara—“Yooseefa na7aa Yesuusaara, Naazireete kataman de7iyaagaara” gayttidoogaa ayyo yootiis. Gidikkokka, Piliphoosi ayyo yootidoogaa Naatinaaˈeeli coo ammanibeenna. I zaaridi: “Naazireete katamaappe payyabi kiyanau danddayii?” yaagiis. I siridaba gidikkokka, Piliphoosi, ne huuphe “Yaada be7a” giidoogaadan oottiis. (Yohaannisa 1:43-51) Yesuusabaa qonccissiya naqaashata ne huuphe pilggiyoogan neenikka goˈettana. Yaatin ay oottana danddayay?

Yesuusi deˈida asa gidiyoogau taarikiyaa naqaashaa pilgga. Joosefesinne Tasites geetettiya asati Kiristtaane gidenna, koyro xeetu layttan deˈida erettida taarikiyaa eranchata. Eti Yesuus Kiristtoosi tumuppe deˈida asa gidiyoogaa yootidosona. Rooma Kawuwaa Neeroy 64 K.S., Roome kataman denddida tamaa Kiristtaanetu bolli gaasoyidoogaa xeelliyaagan Tasitesi qonccissiiddi hagaadan giis: “Neeroy eta ammanuwaappe denddidaagan Roome biittaa asay keehippe ixxiyo, Kiristtaane geetettiya citatun tamaa gaasoyidi, eta keehippe barchiyaa bessiis. Kiristtaane giya sunttay beettido Kiraysttus [Kiristtoosi]” Xibaariyoosi haariyo wode nuna ayssidaageetuppe issuwaa gidida, PHenxxeniyaa PHilaaxoosa kushiyan waayettidi hayqqiis.”

Yesuusanne beni Kiristtaaneta xeelliyaagan koyro xeetu layttaaninne naaˈˈantto xeetu layttan deˈida taarikiyaa eranchati xaafidobaa, 2002n attamettida Insaykiloppiidiyaa Biritaanikaa geetettiya maxaafay hagaadan gees: “Ha taariketi Yesuusi deˈida asa gidiyoogaa, beni wode deˈida, Kiristtaanetu morkketikka siribeennaagaa qonccissoosona; shin 18tta xeetu layttaa wurssettan, 19tta xeetu layttaaninne 20tta xeetu layttaa doomettan gaasoy baynnan siriyoogee doomettiis.” Zi Wol Isttiriit Jornal geetettiya gaazeexan issi qofaa xaafiyaagee, 2002n: “Xoossi baawa giya issotu issotuppe attin, hara daro eranchati Naazireete Yesuusi deˈida asa gidiyoogaa ammanoosona” yaagiis.

Yesuusi denddidoogau naqaasha gidiyaabata akeeka. Yesuusi ba morkketun oyqettido wode, a mata laggeti a aggi bayidosona; qassi a laggiyaa PHeexiroosi yayyidi a erikke giidi kaddiis. (Maatiyoosa 26:55, 56, 69-75) Yesuusi oyqetti  simmin, a kaalliyaageeti laalettidosona. (Maatiyoosa 26:31) Hegaappe simmin, sohuwaara i erissiyo ashikkarati keehippe minnidosona. Yesuusi hayqqanaadan oottida asatuura PHeexiroosinne Yohaannisi xalatettan haasayidosona. Yesuusi erissiyo ashkkarati bantta ammanuwaa kaddiyoogaappe, bantta shemppuwaa aattidi immana gakkanaassi Rooma Haaruwaa ubban a timirttiyaa aassanau keehippe murttidosona.

Ha keehi gita laamiyau gaaso gididabay aybee? Kiitettida PHauloosi, Kiristtoosi hayquwaappe denddidi, “PHeexiroosassi qoncciis. Hegaappe guyyiyan, ba kiittido tammanne naa77atussi qoncciis” yaagidi, Yesuusi hayquwaappe denddidoogaa yootiis. PHauloosi gujjidikka: “Hegaappe guyyiyan, ichchashu xeetaappe dariya ishatussi issitoo qoncciis” yaagiis. PHauloosi he qaalaa xaafido wode, hegaa beˈidaageetuppe daroti paxa deˈoosona. (1 Qoronttoosa 15:3-7) Issi woy naaˈˈu ura xallay Kiristtoosa dendduwaabaa markkattidaba gidiyaakko siriya asi deˈena danddayees. (Luqaasa 24:1-11) SHin ichashu xeetaappe dariyaageetu markkatettay Yesuusi hayquwaappe denddidoogaa loyttidi qonccissees.

DEMMANA WOYTOY AYBEE? Yesuusan ammaniyaageetuyyoonne ayyo azazettiyaageetuyyo nagaray atto geetettanaunne etayyo geeshsha zoriya wozanay deˈana danddayees. (Marqqoosa 2:5-12; 1 Ximootiyoosa 1:19; 1 PHeexiroosa 3:16-22) Eti hayqqiyaaba gidikko, “wurssettaa gallassi” eta denttanaagaa Yesuusi qaalaa geliis.—Yohaannisa 6:40.

Gujo qofaa demmanau, Tumuppe Geeshsha Maxaafay Tamaarissiyoy Aybee? giya maxaafan, “Yesuus Kiristtoosi Oonee?” giya shemppo 4nne “Wozuwaa—Xoossay Immido Ubbabaappe Aadhiyaagaa” giya shemppo 5 xeella. *

[Tohossa qofata]

[Sinttaa 7n deʼiya misiliyaa]

Naatinaaˈeeladan, Yesuusabaa yootiya naqaashaa pilgga