Hagaappe kasetiya huuphe yohuwan denttido Delfiina unˈˈettidoogee A bessiyaagaappe aatta uyanawu koyanaadan oottidoogaa akeekaasu. Geeshsha Maxaafay amaridaagaa uyiyoogaa diggana xayikkonne, ‘Daro woyne eessaa uyiyaageetuura zuppetoppa’ yaagees. (Leemiso 23:20) Bessiyaagaappe aattidi uyiyoogee iita harggiyaa kaalettees, dabbotaa mooreesinne layttan layttan miilooniyan qoodettiyaageeti hegaa daafan hayqqanaadan oottees. Asay Geeshsha Maxaafaa eratetta zoriyaa ekkiyaaba gidiyaakko he metuwaappe dariya baggay gakkennaadan teqqana danddayettees.

Delfiina hegaadan oottaasu. A haˈˈi hagaadan gawusu: “Ushshay taani unˈˈettiyoogaa agganaadan oottennaagaa akeekaas. Piliphphisiyuusa 4:6, 7n deˈiya, ‘Inttena koshshiyaabaa ubbau woossiteppe attin, issibaukka hirggoppite’ giya loˈˈo zoriyaa oosuwan peeshshaas. Qammi ubbatoo hirggissiyaabaynne qofissiyaabay dariyo wode Yihoowa woossays. Tana hanqqetissidabaa, ta qohuwaa, ta yibbaanne tawu siyettiya ubbabaa Yihoowawu qonccissada, loˈˈobaa qoppanaadan I tana maaddana mala A woossays. Guuran, loˈˈobaa qoppiyoogaa aggennaadan baaxetays. Yaatiyoogee tawu baynnabaa aggada, tawu deˈiyaabaa ubbatoo qoppanaadan maaddiis. Ushshaa mule uyennan agganawu kuuyaas. Ta demmido sarotettay keehi alˈˈoba gidiyo gishshawu, hegaa xayssiyaabaa mule oottana koyikke.”

Keehi azzanttiyaabaa kaalettiyaabatuppe issoy shori baynna kandduwaa. Geeshsha Maxaafaa maaray lambbeechchiyoogaa woy pornograafiyaa beˈiyoogaa malabay hegawu waanna gaaso gidiyoogaa yootiyoogan, nuuni he metuwaappe teqettanaadan maaddees. Samuˈela giyo yelagay hagaadan giis: “Lambbeechchiyoogee tawu kaassa mala gidiis. Issi issi maccaasata ta dosikke, shin eti tana siiqiyoogaa akeekaas; hegee qassi taani lambbeechchiyoogaa dosanaadan oottiis.” Samuˈeli qoppibeenna wodiyankka asay A lambbeechchaasa giyoogaa akeekidi, eriiddi lambbeechchanawu kuuyiis. SHin he meeziyaabay A qofissiis. I haˈˈi, “Hegee issi uri ba xallaa siiqanaadan oottiyo gishshawu, keehi qohiyaaba” yaagees.

Samuˈeli jw.org web saytiyan yelagatuyyo giigida huuphe yohuwaa nabbabiis. I, “Na7i geeshshanne suure gidiyoogee i oottiyo oosuwan erettees” giya, Leemiso 20:11 loytti qoppiis. Hegee A waati maaddidee? Lambbeechchiyoogee geeshshabakka suurebakka gidennaagaa Samuˈeli akeekiis. I haˈˈi hagaadan gees: “Lambbeechchiya yelagi sinttappe iita azina woy machcho gidanaagaakka akeekaas. Sinttappe ta machchiyaa taani hara maccaasa lambbeechchishin beˈiyaakko iyyo aybi siyettanaakko qoppiyoogaa doommaas. Hegee he meezee qohiyoogaa taani akeekanaadan maaddiis. Lambbeechchiyoogee kaassa mala gidiyoogee hegee likke giyoogaa gidenna.” Samuˈeli laamettiis. I lambbeechchiyoogaa aggidoogee shori baynnabaappe naagettanaadankka maaddiis.

Antoniyo giyo bitanee shori baynnabaa kaalettana danddayiya keehi iitabaa haniis. Pornograafiyaa beˈiyoogee ayyo amale gidiis. I ba machchiyo keehi siiqiyaaba gidikkokka, he iita eeshshay A zaari zaari wayssiis. I 1 PHeexiroosa 5:8y bana keehi maaddidoogaa yootiis. Xiqisee hagaadan gees: “Xalahe halaqai, intte morkkee, mittiyo uraa koyidi, gudiya gaammuwaadan gudiiddi, intte lanqqiyan yuuyiyo gishshau naagettitenne beegottite.” Antoniyoy hagaadan giis: “Pornograafe misilee ubbasan kumiis; qassi hegaa issitoo beˈikko mule dogettenna. He paacciyaabay awuppe pulttiyaakko taani akeekanaadan he xiqisee maaddiis. Pornograafe misiliyawu pulttoy Dabloosa gidiyoogaa sohuwaara hassayiyoogaa taani meeze oottana koshshiis. Ta qofaa, ta wozanaanne ta aqo deˈuwaa qohiya he meeziyaa eqettana mala ‘naagettanaadaaninne beegottanaadan’ maaddana danddayiyay Yihoowa xalla gidiyoogaa taani haˈˈi erays.” Antoniyoy koshshiya maaduwaa demmiis; qassi wurssettan he iita meeziyaa aggiis. Hegee qassi keehi iita metuwaappe teqettanaadan A maaddiis.

Keehi iita metuwaa teqqanawu maaddiya zoree Geeshsha Maxaafan deˈiyoogee tuma. Gidoppe attin, aggennan ixxidi xoonida metuwaabaa shin? Hegaadan wayssiya metuwaa pagalanawu Xoossaa Qaalay nuna waatidi maaddana danddayiyaakko ane beˈoos.