HE ADUSSA mittata, loˈˈiya ciishshatanne xoqqa dereta xeella. Ha sohoy loˈˈennee? Cofoshoy guutta naˈaa kushiyaappe waati miyaakko beˈa. Qassi dembban deˈiya gaammotanne eqqida parata xeella. Hagaa mala sohuwan deˈiya keettan deˈanau koyikkii?

Xoossay neeni saˈaa bolli gannatiyan merinau deˈanaadan koyees. Ha wodiyan asaa tuggayiya ayba sahoynne waayee nena gakkanaadan i koyenna. Ooratta gannatiyan deˈanaageetuyyo Geeshsha Maxaafay gelido qaalay: ‘Xoossay etaara deˈana. Hagaappe sinttanau hayqoy woy waasoy woy sahoy deˈenna. Ceegabay xayiis’ yaagiyaagaa.

Yesuusi ha garamissiya laamee yaanaadan oottana. Hegee audekko eray? Ee, i saˈaa bollappe iitatettaanne iita asa ubbaa xayssi simmiina. Yesuusi saˈan deˈiyo wode, asaa ubba qommo harggiyaappe pattoogaanne hayquwaappekka denttoogaa hassaya. Yesuusi hegaa oottidoy, i Xoossaa kawotettaayyo Kawo gidiyo wode saˈa ubban oottanabaa bessanaassa.

Saˈan ooratta gannatiyan deˈoy ayba loˈˈanaakko ane qoppa! Yesuusi, ba doorido amaridaageetuura saluwan uttidi haarana. He haariyaageeti saˈaa bollan deˈiyaageetussi huuphiyan huuphiyan koshshiyaaba kunttidi, eti ufayttanaadan oottana. Xoossay nuussi ba ooratta gannatiyan merinaa deˈuwaa immanaagaa ammanettanau, nuuni ay oottana koshshiyaakko ane beˈoos.