SAˈAN asaa qooday dariiddi biido wode, etappe daroti Qaayeelaagaadan iitabaa oottidosona. SHin issi bitanee etappe dumma. He bitanee hagaa; a sunttaykka Heenooka. Heenooki xala asa. I deˈiyo wode deˈiya asa ubbay keehi iitabaa oottees; shin Heenooki Xoossaayyo oottiyoogaa aggibeenna.

He wode deˈida asay keehi iitabaa oottidoy aybissakko eray? Addaameenne Hewaana Xoossaassi azazettennaadaaninne i mooppite giido mittaa teeraappe maanaadan oottiday oonee? Ane qoppa. Ee, hegee issi iita kiitanchchaa. Geeshsha Maxaafay, a Seexaanaa yaagi xeegees. I oonikka gidin iita gidanaadan baaxetees.

Issi gallassi Xoossaa Yihooway, asay siyanau koyennabaa Heenooki etau yootanaadan oottiis. Hegeekka: ‘Xoossay issi gallassi iita asaa ubbaa xayssanau deˈees’ yaagiyaagaa. Asay hegaa siyo wode keehippe yiillotennan aggenna. Ubba Heenooka woranau malennan aggokkona. Yaatiyo gishshau, Heenooki Xoossay oottanau deˈiyoobaa asaassi yootanau keehippe xalanaagaa koshshiis.

Xoossay he iita asatu giddon Heenooki adussa wodiyaa deˈanaadan oottibeenna. Heenooki 365 laytta xalla deˈiis. Ayssi “365 laytta xalla” yaagiyoo? He wode deˈiya asay, ha wodiyan deˈiya asaappe keehi minonne adussa wodiyaa deˈiyo gishshataassa. Ubba Heenooka naˈay Maatusaali 969 layttaa deˈiis!

Heenooka hayquwaappe simmin, asay kaseegaappe yaa iiti iiti biis. Geeshsha Maxaafay ‘eti wozanan qoppiyoobay ubbay ubba wodekka iita xalaala;’ qassi ‘saˈa ubbay makkalan kumiis’ yaagees.

He wode saˈan metoy keehi darido gaasotuppe issuwaa eray? Asay iitabaa oottanaadan Seexaanay hara ooratta ogiyan goˈetto gishshataassa. Kaallidi hegaa tamaarana.