“Keha Samaare” giyoogee metootidaageeta maaddiya ura qonccissanawu darotoo goˈettiyooba. He guussawu doomettay, keha uri issi asa biittay woy I diccido hanotay ayba gidikkokka maarotan haraata maaddiyoogaa bessanawu Yesuusi yootido taarikiyaa woy leemisuwaa. a

Ha huuphe yohuwan

•  “Keha Samaariyaa Bitaniyaabaa” leemisoy aybee?

•  Yesuusi ha leemisuwaa yootidoy aybissee?

•  Ha leemisuwaappe demmiyo timirttee aybee?

•  Samaariyaa biittaa asati oonee?

•  “Keha Samaariyaa Bitaniyaa” taarikee tumuppe hanidabee?

Yesuusi yootido taarikee qanttan hagaadaana: Issi Ayhuda bitanee Yerusalaameppe Yarkko biiddi deˈees. Panggati abaa bonqqidi, A shocidi hayquwaappenne paxaappe gidduwan yeggidi biidosona.

Issi Ayhuda qeesee, qassi guyyeppe hara Ayhuda gidida haymaanootiyaa kaalettiyaagee he masunxxida bitaniyaa beˈiiddi aggidi biidosona. Eti he bitaniyaara issi biitta asa gidikkokka, eti naaˈˈaykka A maaddibookkona.

Wurssettan, issi hara biitta asa gididaagee yiis. I Samaariyaa biitta asa. (Luqaasa 10:33; 17:16-18) Samaariyaa biittaa bitanee qohettidaagawu qarettidi A masunttaa qachchiis. Yaatidi A imattay aqiyo sohuwaa efiis. Yan he bitaniyaa maaddiiddi aqiis. Wonttetta gallassi, imattay aqiyoosaa naagiyaagee he bitaniyaa maaddanaadan miishshaa qanxxidi, I miishshaa gujjidi kessikko qanxxanaagaa yootiis.—Luqaasa 10:30-35.

Zariyaaninne haymaanootiyan banaara issi mala gididaageetu xallay ba shooro giidi qoppiya bitaniyawu Yesuusi ha leemisuwa yootiis. Yesuusi he bitaniyaa keehi koshshiyaabaa, hegeekka ‘shooruwaa’ giyoogee A mala Ayhudatu xallaa bessiyaaba gidennaagaa tamaarissanawu koyiis. (Luqaasa 10:36, 37) Ha taarikee, Xoossaa ufayssanawu koyiya ubbaa maaddiyaabaa tamaarissanawu Geeshsha Maxaafan xaafettiis.—2 Ximootiyoosa 3:16, 17.

Loˈˈo shooroy qaretaa oosuwan bessiyoogaa ha taarikiyaappe tamaaroos. He uri metootida uraa biittay, I diccido hanotay woy A zaree aybanne gido A maaddiyaabaa oottees. Tumuppe loˈˈo shooroy harati baayyo oottanaadan koyiyoobaa haratussi oottees.—Maatiyoosa 7:12.

Samaariyaa biittaa asay Yihudaappe huuphessa baggan deˈiis. Etappe daroti Ayhudatinne hara zareti eketti geletti yelidoogeetu zeretta.

Koyro xeetu layttaa M.Ln, Samaareti bantta haymaanootiyaa essidosona. Eti Ibraawetto Geeshsha Maxaafan koyro ichchashu maxaafata ammaniyaaba gidikkonne, attida haraata ammanokkona.

Yesuusi saˈan deˈiyo wode daro Ayhudati Samaareta ixxoosonanne eta lagoosona. (Yohaannisa 4:9) Issi issi Ayhudati “Samaariyaa asa” giyaagaa cashshadan xeelloosona.—Yohaannisa 8:48.

Samaariyaa biittaa bitaniyaa leemisoy tumuppe hanidabakkonne Geeshsha Maxaafay yootenna. Gidoppe attin, Yesuusi yootiyoobaa ezggiyaageeti A timirttiyaa sohuwaara akeekanaadan I erettida meezetanne sohota darotoo goˈettiis.

He leemisuwan odettida darobati taarikiyan erettidabata. Leemisuwawu:

• Yerusalaameppe Yarkko efiya ogee, 20 kilo meetiriyaappe darees; qassi 1 kilo meetire gidiyaagee sitti giida dugetta. Yerusalaameppe Yarkko biyaageeti dugettaa wodhdhiyoogaa he leemisoy yootees.—Luqaasa 10:30.

• Yarkkon deˈiya Qeesetinne Leewati ubbatoo ha ogiyaara Yerusalaame boosona.

• Panggati darotoo asi baynna heeran qosettidi, barkka biya uraa bonqqanawu naagoosona.