Silempwale ni Marko 3:1-35
3 Yesu aavolowa-tho musinakooka, ni musinakookani mmwe aakhala mulopwana mmoha aari oorakala ntata.
2 Ni yannawehexexa weera emoone waari weera ammulamiha mulopwana ole nihiku na esaabadu, weera emphwanyeno nthowa noomoothera.
3 Nto, Yesu aamweerela mulopwana ole oorakala ntata: “Nvinye, nwe variyari va.”
4 Avinyaka, Yesu aahaakoha: “Onnaakhuleliwa opaka itthu sooreera naari soonanara, ovuluxa ekumi naari wiiva nihiku na esaabadu?” Mene awo khiyaakhunle etthu.
5 Yesu anyoonyinweene vantxipale, aahaaweha atthu yaamurukurenre ni ariipinweene murima mwaha woowuuma waya murima, owo aamweerela mulopwana ole aarino ntata noorakala: “Mookole ntata.” Ni owo, aahookola ntata, ni ntata nne naalama.
6 Nto, afarisi yaakhuma enarowa ovaanela ni atthu a Herodi weera emwiive Yesu.
7 Yesu aarowa ophareya vamoha ni atthareli awe, muloko mutokotoko wa atthu wa oGalileya ni oYudeya waamutthara.
8 Atthu yiiwakaru itthu Yesu aapakaawe, muloko mutokotoko wa atthu waarowa okumana nuuwo okhumaka oYerusalemu, wIdumeiya, ekhopela ekina ya mooloko Yordani ni mittetthe soowaattamela oTiro ni oSidoni.
9 Yesu aaweerela atthareli awe weera enwiihere paarku mukhaanini, weera muloko wa atthu ohimuhaameleke.
10 Woona weera annaalamiha atthu antxipale, tivanto atthu ootheene yaarino iretta itokotoko yannamwaattamela weera emutave.
11 Mpaka atthu yaarino minepa soonanara yaamoonaka Yesu, yannakokhora ohoolo wawe ni yannakhuwela: “Nyuwo Mwaana a Muluku.”
12 Mene ikwaha sintxipale, Yesu annalamula minepa iyo soonanara weera sihimulaleye.
13 Yesu aawela vamwaako ni aahaawopa ale aathanliyaawe ni awosa yaarowa.
14 Yesu aahaathanla* alopwana 12, yaawo aavanhaawe nsina na arummwa, yaawo eeraawe eettekeno vamoha ni yaawo aakelaawe waarumiha weera yaalaleereke atthu,
15 ni aahaavaha owera woowoomola mademooniyu.*
16 Vano, alopwana ale 12 owo aathanliyaawe,* taala: Simoni (yoowo anvanhaawe nsina na Pedru),
17 Yakobe mwaana a Zebedeyo, Yohani munnawe Yakobe (yaawo aavanhaawe nsina na Bowanerxe, nintaphulela “anamwane a etari”),
18 Andreya, Filipe, Bartolomewu, Matewus, Tome, Yakobe mwaana Alfeyo, Tadeyo, Simoni Mukanani,*
19 Ni Yuda Iskarioti, yoowo muhoolo mwaya anvarinhe Yesu.
Owo aavolowa empa emoha,
20 ni atthu yaamusareela veeli-tho, mpaka ohikhalano etempu yootxa.
21 Amusi awe esuwelakaru ele Yesu aapakaawe yaamurowela, yaapaka eyo yuupuwelaka weera: “Owo othatunwe anepa.”
22 Nave-tho, alipa oolepa yaakhuma oYerusalemu yanneera: “Ola onwera woomola minepa soonanara mwaha wooweera onkhaviheriwa ni muhooleli a minepa iyo soonanara.”*
23 Mwa yeeyo, awiitthanakaru, Yesu aapatxera waaleela avarelaka muteko maphwanaphwaniho: “Moota heeni Satana onkelaawe omoomola Satana?
24 Wakhala weera omwene mmoha onnakawanyeya yooworu, omwene owo onoonyaanyeya,
25 ni wakhala weera empa ennakawanyeya yeeyoru, ennamora.
26 Nave-tho, wakhala weera Satana onnawana yooworu, ookawanyeya, ni onoonyaanyeya woona weera oophiya okhwipi.
27 Aani, khaavo anwera ovolowa mpaani mwa mulopwana a ikuru mpaka omwiiyera mihakhu sawe, ahipatxenre toko omutthuka mulopwana owo a ikuru. Amutthuka vale, aneeraiye awere wiiya itthu sawe mpaani.
28 Miyo kinnooleelani ekhaikhai weera: Soottheka ni oveeha wootheene anamwane aatthu eneeraaya epakeke, enooleveleliwa.
29 Mene ole onveeha munepa wa Muluku, khonleveleliwa, yoottheka eyo ti ya mahiku ootheene.
30 Yesu aahimme eyo, mwaha wooweera atthu awo ohima yeera: “Owo orino munepa woonanara.”
31 Muhoolo mwaya, ameyawe ni asinnawe yaahoowa eneemela vaate, ni yaamuruma mutthu weera amwiitthane.
32 Muloko wa atthu weera okilantheene ni omurukurenreene Yesu, nto awo yaamweerela: “Ameyanyu ni asinninyu eri vaate vale enoowaasani.”
33 Mene Yesu owaakhula enre: “Ameyaka ni asinnaka, taani?”
34 Nto aaweha muloko ole waakilanthi omurukurenreene ni aaheera: “Alasa eri ameyaka ni asinnaka!
35 Yoole ompaka yootthuna ya Muluku, owo ori munnaka, murokoraka ni ameyaka.”
