Silempwale ni Marko 2:1-28
2 Evirakaru mahiku vakhaaniini, Yesu aatthikela oKafarnawu, ni mitthenka sooweera owo aari owaani, saamwaramwareya.
2 Ni yaathukumana atthu antxipale mpaka vamulako ni ohihala-tho nipuro, nto owo aapatxera waalaleera mitthenka sooreera.
3 Ni aawiiheriwa mutthu mmoha oorakala ateexinweene ni alopwana axexe.
4 Mene mwaha wa muloko mutokotoko wa atthu, awosa khiyaawera okumana ni Yesu, nto mwaha wa yeeyo, yaaphwata vakhaaniini nipatho na empa Yesu aaraawemo, evetakaru vakhaaniini yaakuruxela vathi maaka* aakonnaiyevo mulipa oorakala.
5 Yesu oonakaru nroromelo yaaraayano, aamweerela ha mulipa ole oorakala: “Mwanaka, soottheka sanyu sooleveleliwa.”
6 Mene alipa oolepa akina yaari vale ekilantheene, yaapatxera wuupuwela mmurimani mwaya:
7 “Mwaha wa heeni ola onuulumaawe hiiha? Mutthu ola onnanveeha Muluku. Taani onwera olevelela soottheka ahikhanle Muluku?”
8 Mene moowaakuveya, Yesu asuwelakaru etthu awo yuupuwelaaya vamurimani vaya, aaweerela: “Mwaha wa heeni munuupuwelaanyu itthu iya mmurimani mwanyu?
9 Eheeni eri yookhweya, omuleela mulipa oorakala weera: ‘Soottheka sanyu sooleveleliwa,’ naari weera: ‘Nvinye, mukuxeke maaka anyu* ni mweette’?
10 Mene, weera musuwele weera Mwaana a Mutthu ookhalano valaponi owera woolevelela soottheka . . .”, Yesu aamweerela ha mulipa ole oorakala:
11 “Miyo kinnooleelani weera nvinye mukuxe maaka anyu* murooke owaani.”
12 Nto, aavinya anakuxa maaka awe* moowaakuveya ni anarowa ariki weetta atthu ootheene emoonaka. Voowoona eyo, atthu ootheene yaatikhiniheya ni yanvuwiha Muluku yeeraka: “Khanitonko woona etthu ntoko ela wIsraeli.”
13 Nto Yesu, aatthikela-tho muxerexere mwa ephareya; nto, atthu antxipale yannarowa okumana nuuwo ni owo aapatxera waaxuttiha.
14 Eettaka hiihaale, aamoona Levi mwaana Alfeyo akilantheene alivihaka mpostu,* ni aamweerela: “Mukhale mutthareli aka,” nto Levi, aahiya oliviha mpostu* anamutthara Yesu.
15 Muhoolo vaya, Yesu areene owannyawe Levi, atxaaka,* yaahoowa alipa ooliviha mpostu* antxipale ni anamattheka enapatxera otxa vamoha ni Yesu ni atthareli awe. Woona weera antxipale a yaawo yannamutthara.
16 Mene alipa oolepa aafarisi yoonakaru weera Yesu aatxa ni anamattheka vamoha ni alipa ooliviha mpostu,* yaahaakoha ha atthareli awe Yesu: “Muhusihaanyu, ontxa vamoha ni alipa ooliviha mpostu* ni anamattheka?”
17 Nto Yesu aahiiwa eyo ni aaweerela: “Atthu akumi khemmuhaawela meetiku, mene ale envoreiwa. Miyo nkaawenle owiitthana anaxariya mene anamattheka.”
18 Atthareli a Yohani ni afarisi, yannamutthuka ramasaani. Nto yaamwaattamela Yesu enamukoha ha: “Mwaha wa heeni atthareli a Yohani ni atthareli aafarisi emmutthukaaya ramasaani, menento atthareli anyu ehimmutthukaaya ramasaani?”
19 Nto Yesu, aawaakhula aakohaka ha: “Neereke asinthamwene a mutthu ottomenre ennatthuneya omutthuka ramasaani nthamwene aya areene ni yaawo? Nthamwene aya akhala ni yaawo, awo khiyaanoono mathowa ooweeriha omutthuka ramasaani.
20 Mene enoophiya mahiku nthamwene aya ole ottomenre eneeraaya yaakhiwe, nto nihiku nene nenno, eneeraaya emutthuke ramasaani.
21 Khaavo onkuxa ekuwo enyowani anattotthela vakuwoni ya khalayi. Mwaha wooweera mutthu apaka eyo, ekuwo enyowani enookokha ekuwo ya khalayi mpaka waahuwa.
22 Vamoha-moharu, eviinyu enyowani khenheliwa mmirupani sa ixapala sa khalayi, wakhala weera mutthu onoopaka eyo, murupa wa eviinyu onoophuleya ni eviinyu eyo enooyeeheya. Mene eviinyu enyowani enheliwa mmurupani munyowani.”
23 Yesu aavira imatta saalinwe tiriku nihiku na esaabadu, ni atthareli awe yaapatxera ovurula makala a etiriku yeettaka.
24 Nto mwaha wa yeeyo, afarisi yaamweerela: “Nkawehani! Mwaha wa heeni atthareli anyu empakaaya etthu ehinaakhuleliwa opaka nihiku na esaabadu?”
25 Yesu owaaakhula enre: “Neereke nyuwo khamusomme ele Davidi ni anakhotto awe yaapankaaya vaavo yaathoiwalaaya yootxa ni yaavolinwaaya etala?
26 Ntoko yooweereya ya Abiyatari namakeya mutokweene enhimaaya, Davidi aavolowa mpaani mwa Muluku anatxa ipaawu sooveleeliwa wa* Muluku ni aahaavaha-tho ale aaraaweno. Ipaawu seiyo ahaakhuleliwaawe mutthu mukina otxa, ehikhanle anamakeya.”
27 Vano, Yesu aaweerela-tho: “Esaabadu epakinwe weera atthu ettotteleke mureerelo, ohiya esaabadu ottottela mureerelo mwaha wa atthu.
28 Tthiri, Mwaana a Mutthu tori Mwaneene esaabadu.”
