Silempwale ni Marko 11:1-33
11 Vano, emaara yaattamelaaya ophiya oYerusalemu wa oBetefage ni wa oBetania, vamwaako sa Oliveira, Yesu aahaarumiha atthareli awe eeli
2 ni aawereela: “Murowe muttetthe ole onooneya, ni mwaphiya vale, munomphwanya puuru mwaaxaana atthukelelinweene, yoowo ohintale oweliwa ni mutthu. Mwamutaphule ni mukiwiihere.
3 Ni wakhala weera mutthu onimookohani: ‘Mwaha wa heeni mummutaphulaanyu?’ Mmweerele weera: ‘Apwiya enoomuhaawela, avinyaka enoomutthikiha.’”
4 Awo yaarowa enamphwanya mwaaxaana a puuru, atthukelelinweene ohoolo wa mulako wa empa yaari waattamela omuseweni, ni awo yaamutaphula.
5 Nto atthu akina yaari vale, yaahaakoha yeeraka: “Nyuwosa mumpaka eheeni, mummutaphulela heeni mwaaxaana ola a puuru?”
6 Yaakhunle hiihaale ntoko Yesu aalenlaawe, ni atthu ale yaahaahiya omukuxa.
7 Nto awosa yanwiihera Yesu mwaaxaana ole a puuru, ni yaahaatala ikuwo saya vasulu va puuru owo ni Yesu anwela.
8 Ni atthu antxipale yaahaatala ikuwo saya mmuseweni, ni akina yannathikila makukhu a miri enaatala mmuseweni.
9 Ni atthu yaari ohoolo wawe ni ale yaamutthara, yannakhuwela yeeraka: “Ntxontte Muluku, ninnoovekelani munvuluxe! Ooreeriwa ti yoole onwa mwa nsina na Yehova!*
10 Wooreeriwa Omwene oneera owe mwa Tiithi ahu Davidi! Munvuluxe, txontte Muluku ninnoovekelani nyuwo munkhala wiirimu!”
11 Yesu aphiyakaru oYerusalemu, aavolowa mutemplu ni aawehexexa itthu sootheene saari mutemplu, mene woona weera waaxekuwa, aakhuma ni arummwa 12 anarowa oBetania.
12 Nihiku naattharelana vaavo aakhumaawe oBetania, Yesu aavoliwa etala.
13 Eettaka ottayi wene, Yesu aahoona mwiri wa efiiku waarino makukhu ni aarowa woona waari weera sookhalamo soowiima. Aphiyakaru vakhiviru vamwiri ole, khaaphwannye etthu ehikhanle makukhu, woona weera khaiyene yaari etempu siimaaya ifiiku.
14 Vano, owo aaheerela mwiri ole: “Ahikhale-tho mutthu aneera atxe soowiima sa mwiri anyu.” Nto atthareli yanniiwa masu ale.
15 Vano, awo yaaphiya oYerusalemu. Avinyaka, Yesu aavolowa mutemplu, ni aapatxera owoomola atthu yaatumiha ni yaathuma itthu mutemplu ni aakunttula imeesa sa atthu yaatxentxiha musurukhu, ni ikatera sa atthu yaatumiha ipompa,
16 Yesu khaakhulenle weera mutthu avireke mutemplu akunxeene etthu.
17 Owo annaaxuttiha aweerelaka: “Khelempwale weera: ‘Empa aka enrowa osuweliwa okhala empa ya mavekelo ya atthu a maloko ootheene’? Mene nyuwo mpanke nipuro naanamwiiya.”
18 Asitokweene aanamakeya ni alipa oolepa, yaahiiwa etthu eyo, ni yaapatxera waasaasa moota yaakelaaya omwiiva, nto, yaamoova mwaha wooweera muloko wootheene wa atthu, wannatikhiniheya ni moota owo aaxuttihaawe.
19 Wiilakaaru, Yesu vamoha ni atthareli awe, yaakhuma osidade.
20 Mene oxeexelo eviraka mphironi waaraayavo mwiri ole wa efiiku, yaahoona weera wohuuma mpaka ni mikakaari sene.
21 Pedru aahuupuwelela ni anamweerela Yesu: “Rabi,* nkoonani! Mwiri wa efiiku muulumenlaanyu wohuuma.”
22 Yesu omwaakhula enre: “Mmuroromeleke Muluku.
23 Miyo kinnooleelani ekhaikhai weera: Ole onkela weerela mwaako ola: ‘Opheleye va ni wiivonyere mphareya’, ahihovelaka mmurimani mwawe, aroromelaka weera ele onuulumaawe enimweereya, tthiri etthu eyo enimweereya.
24 Tivanto kinooleelaakani weera: Itthu sootheene muneeraanyu nvekele mmavekeloni mwanyu, muroromeleke weera mohaakhela ni munookhalano.
25 Mwaavekelaka vale, mmulevelele mutthu ole orino mulattu ni nyuwo, weera Tiithi anyu ori wiirimu olevelele-tho soottheka sanyu.”
26 * ——
27 Yaaphiya-tho oYerusalemu. Yesu eettaka mutemplu, asitokweene aanamakeya ni alipa oolepa ni asitokweene aayuda, yaahoowa
28 ni yaamukoha: “Ni ikuru heeni munweraanyu opaka itthu iya? Ni taani oovanheni ikuru sene seiya?”
29 Yesu owaakhula enre: “Miyo-tho kinimookohani etthu emoha. Mukaakhule ni miyo-tho, kinimooleelani ikuru heeni sinkikhavihera owera opaka itthu iya.
30 Opatiso wa Yohani, waari wa Muluku naari wa atthu? Mukaakhule.”
31 Vano awosa, yaapatxera wuuluma yaaworu yeeraka: “Waakhula neera: ‘Waakhuma wa Muluku’, owo onrowa oneerela: ‘Mwaha wa heeni nto, muhimwaakhulenlaanyu?’
32 Mene niheerere waakhula weera: ‘Waakhuma wa atthu’.” Awo yannoova muloko mutokotoko wa atthu, mwaha wooweera atthu, yaamoona Yohani ntoko profeta.
33 Nto mwaha wa yeeyo, omwaakhula Yesu yenre: “Khanisuwenle.” Yesu aaweerela: “Miyo-tho, nkinooleelani ikuru heeni sinkikhavihera owera ovara itthu iya.”
