Silempwale ni Luka 7:1-50
7 Yesu amalihakaru ohima itthu aatthunaawe waaleela atthu, aaphiya oKafarnawu.
2 Vano, namuteko mmoha a muhooleli aanakhotto, yoowo owo aamusivelaawexa aavoreiwa vantxipale mpaka ohalela okhwa.
3 Mutokweene aanakhotto iiwakaru woohima sa Yesu, owo aahaarumiha asitokweene aayuda akina onvekela Yesu weera awe amulamihe kaporo awe.
4 Awosa yaarowa okumana ni Yesu, ni yaapatxera omutxonttela moohihiyerereya yeeraka: “Mulopwana owo onnaphwanela okhaviheriwa ni nyuwo Apwiya,
5 mwaha wooweera owo onnasiveliwa ni nloko nahu, ni ti yoowo opanke esinakooka ahu.”
6 Yesu aavinya naawo. Mene ahalelaka ophiya owannyawe, mutokweene aanakhotto aahaarumiha asinthamwene awe weera yamweerele: “Apwiya, muhiixupe, miyo nkiphwanenle owaakhelani owannyaka.
7 Mene ti yeeyo yaakeerinhe ohirowa okumana ni nyuwo. Muhime paahi masu, kaporo aka onoolama.
8 Miyo-tho mutthu kinlamuliwa, nave-tho kookhalano anakhotto kinaalamulaaka, ni kamweerela mmoha: ‘Orowe!’ owo onnarowa, ni kamweerela mukina: ‘Owe!’ owo onnawa, ni kamweerela kaporo aka: ‘Opake ela!’ owo onnapaka.”
9 Yesu iiwakaru masu a mulopwana ole, aatikhiniheya nuuwo, arukunuwaka, aaweha muloko mutokotoko wa atthu waamutthara ni aaheera: “Miyo kinnooleelani ekhaikhai: wIsraeli wootheene nkimphwannye mutthu orinono nroromelo ntokotoko ompwaha mulopwana ola.”
10 Vano ale yaarummwale etthikelaka owaani, yamphwannye kaporo ole alammeene.
11 Avinyakaru vaavale, Yesu aarowa esidade yiitthaniwa Nayimi, ni atthareli awe ni muloko mutokotoko wa atthu waari vamoha nuuwo.
12 Emaara aattamelaawe vamulako wa esidade, eera ateexinweene mutthu mmoha ookhwa akumiheriwaka vaate, mwaana mmoha ene anaamukhweli. Ni muloko mutokotoko wa atthu wa esidade ele, wannamuhoola naamukhweli ole.
13 Apwiya emoonakaru naamukhweli ole, yammorela ikharari ni yaamweerela: “Mmaale winla.”
14 Avinyaka, Yesu aahaattamela maaka* anavara ni alipa yaatenxe maaka,* yaaheemela. Nto Yesu aamweerela: “Mmiravo, kinnooleela: Ovinye!”
15 Ni mmiravo ole aakhwiiye aakilaathi ni anapatxera wuuluma, ni Yesu anveleela wa ameyawe.
16 Atthu ootheene yaahoova vantxipale ni yaapatxera onvuwiha Muluku yeeraka: “Oonikhumelela profeta mutokweene variyari vahu”, ni: “Muluku oomorela ikharari muloko awe.”
17 Ni mutthenka ola woohima sa yoowo, waamwaramwareya oYudeya wootheene ni mittetthe sootheene soowaattamela.
18 Nto, atthareli a Yohani, yaamuleela itthu sootheene iya.
19 Ni Yohani, aawiitthana atthareli awe eeli ni aahaarumiha wa Apwiya weera yaakohe: “Nyuwo muri Mesiya aalaiherinwe weera aamoowa elapo ya vathi, naari ninweherereke mutthu mukina aneera akhale Mesiya?”
20 Asilopwana ale emwaattamelakaru Yesu, yaamweerela: “Yohani Mpatisa orooniruma wa nyuwo weera nookoheeni: ‘Nyuwo muri Mesiya aalaiherinwe weera aamoowa elapo ya vathi, naari ninweherereke mutthu mukina aneera akhale Mesiya?’”
21 Emaara ene yeele, Yesu aalamiha ikwerere sa atthu antxipale, iretta ni aahoomola minepa soonanara, nave aahaalamiha alipa oohoona.
22 Yesu owaakhula enre: “Murowe, mwamuleele Yohani ele monnaanyu ni mwiiwalaanyu: alipa oohoona vano ennoona, alipa oorakala vano enneetta, anamakokho ennalamihiwa, ni alipa oohiiwa vano enniiwa, alipa ookhwa ennavinyererihiwa, ni mitthenka sooreera ennalaleeriwa alipa oohaawa.
23 Oohakalala tuule ohimphwanya wa miyo etthu yoomukwattuliha.”
24 Atthareli a Yohani epwahakaru, Yesu aapatxera wuuluma ni atthu woohima sa Yohani, aakohaka: “Eheeni mwaakenlaanyu woona onikareni? Neereke mwaakenle woona mutathi ottikinyiwaka ni epheyo?
25 Nto taani mwaakenlaanyu omoona? Mulopwana owanre ikuwo sooreera? Atthu enwara ikuwo sooreera enkilaathi impa sa mamwene.
26 Vano, mwaakenle woona eheeni onikareni? Profeta? Aani, miyo kinnooleelani weera owo ompwaha profeta.
27 Owo mwaakenlaanyu omoona ti yoowo Soolempwa saahimmaaya seeraka: ‘Nkawehani! Kinoomurumiha namitthenka ohoolo wanyu, yoowo aneera areherere ephiro anyu!’
28 Miyo kinnooleelani ekhaikhai weera: Wa atthu ootheene eyarinwe ni muthiyana, khakhanle mutthu mutokweene ompwaha Yohani Mpatisa; mene ole ori ooyeva Moomweneni wa Muluku, onnampwaha Yohani.”
29 (Yiiwakaru eyo, atthu ootheene ni anamaliviha mpostu* yaahima weera Muluku naxariya, mwaha wooweera awo yaapatisinwe ni Yohani.
30 Mene afarisi ni alipa oosuwela Nlamulo, khayaapwattha yootthuna ya* Muluku wa yaawo, mwaha wooweera khayaapatisinwe ni Yohani.)
31 “Kinaalikanxere nnaani atthu ala, ni enlikana nnaani?
32 Alasa enlikana ni anamwane ekilanthi omerkaatu,* enaakhuwelela asinkhwaaya: ‘Hiyo nohoorumihelani eflauta nyuwo mootxenle wiina; hiyo wanriipa murima mene nyuwo mootxenle okhupanyera.’
33 Vamoha-moharu, Yohani Mpatisa annamutthuka ramasaani veeli-veeli ni khaawura eviinyu, menento nyuwo ohima muneera: ‘Owo ookhalano munepa woonanara.’
34 Menento Mwaana a Mutthu, onnatxa ni onnawura eviinyu, menento nyuwo ohima muneera: ‘Nkanwehani vale! Namatxa ni namawura eviinyu, asinthamwene awe alipa ooliviha mpostu,* ni anamatxa!’
35 Nto, miruku sa mutthu sinooneya weera ti seekhaikhai ni miteko saya.”
36 Vano, nfarisi mmoha annanvekela voohihiyerereya weera arowe atxe vamoha owannyawe. Owo aarowa owannyawe nfarisi ole ni aakilaathi ahaamela emeesa.
37 Muthiyana mmoha a esidade ele aasuwelinwe okhala namattheka, asuwelakaru weera Yesu eera atxaaka vate va nfarisi, aakuxa ekarafa ya alabastru* yaarimo makhura oowinkhelaxa.
38 Aaheemela ottuli wa Yesu, mmanaanini mwawe ni aahinla, ni aapatxera onaaniha manaani a Yesu ni maithori awe, ni aapuputtha ni maihi awe. Ni annapexari manaani a Yesu voohihiyerereya ni annayeehera makhura oowinkhela.
39 Nfarisi ole anwompe Yesu oonakaru ele, aahuupuwela vamurimani vawe: “Mulopwana ola aari profeta eekhaikhai, aamusuwela muthiyana heeni ola onanvara, weera namattheka.”
40 Nto mwaha wa yeeyo, Yesu aamweerela: “Simoni, kookhalano etthu kintthunaaka wooleelani.” Simoni waakhula enre: “Muhimeke Muhusiha!”
41 “Mulipa mmoha ookophiha musurukhu, aakhalano atthu eeli yaamukophenle. Mmoha aakomphe itenaariyu* 500, mukina aakomphe 50.
42 Woona weera khayaawera omuliva, owo aahaalevelela ooweeli. Vanonto, wa atthu ala eeli, taani aneera amusivelekexa namakophiha musurukhu?”
43 Simoni omwaakhula enre: “Ole omulevelenlaawexa.” Yesu aamweerela: “Mohaakhula nnene sene.”
44 Nto Yesu, aarukunuwa ananweha muthiyana ole ni aamweerela Simoni: “Moomoona muthiyana ola? Koophiya owannyinyu, nyuwo khamukivanhe maahi oorapiha manaani aka. Mene muthiyana ola, oonaaniha manaani aka ni maithori awe, ni oopuputta ni maihi awe.
45 Nyuwo khamukivanheru epeexu, menento muthiyana ola khahiyerenre opexari manaani aka.
46 Nyuwo khamuyeehenre makhura mmuruni mwaka, menento muthiyana ola, oyeehenre makhura oowinkhela mmanaanini mwaka.
47 Tivawonto kinooleelaakani: soottheka sawe nnaamweera sireene itokotoko,* sooleveleliwa, mwaha wooweera oosivela vantxipale. Mene ole onleveleliwa vakhaaniini, onsivela vakhaaniini.”
48 Vano, Yesu aamweerela muthiyana ole: “Soottheka sanyu, sooleveleliwa.”
49 Atthu yaari nuuwo vameesa, yaapatxera wuuluma yaaworu yeeraka: “Mutthu heeni yoola, onwera olevelela mpaka soottheka?”
50 Ni Yesu aamweerela muthiyana ole: “Murooke ni murettele. Nroromelo nanyu nohoovuluxani.”
