Silempwale ni Luka 6:1-49
-
Yesu, “Mwaneene esaabadu” (1-5)
-
Mulopwana mmoha ooraka ntata onnalamihiwa (6-11)
-
Arummwa 12 (12-16)
-
Yesu onnaxuttiha ni onnalamiha (17-19)
-
Ohakalala ni otakhaliwa (20-26)
-
Waasivela amwiittani (27-36)
-
Muhiye waathoriha atthu akina (37-42)
-
Enkela osuweliwa ni soowiima saya (43-45)
-
Empa yoopakiwa nnene; empa yoohikhala alserse oohilipa (46-49)
6 Yaaheereya weera nihiku na esaabadu, Yesu aavira imatta saalinwe tiriku, vano, atthareli awe yaapatxera ovurula makala a tiriku, ettikitthaka ni matata aya ni yannatxa.
2 Nto mwaha wa yeeyo, afarisi akina yaaheera: “Mwaha wa heeni nyuwosa mumpakaanyu etthu ehinaakhuleliwa opaka nihiku na esaabadu?”
3 Yesu aawaakhula aakohaka: “Neereke nyuwo khamusomme ele Davidi ni anakhotto awe yaapankaaya evoliwakaru etala?
4 Owo aavolowa mpaani mwa Muluku ni aavahiwa ipaawu sooveleeliwa,* aahootxa ni aahaavaha-tho anakhotto awe, nnaamweera ipaawu iyo ahaakhuleliwa otxa mutthu mukina, mene yaakhuleliwa otxa paahi anamakeya?”
5 Ni aahaatxeerera eeraka: “Mwaana a Mutthu tori Mwaneene esaabadu.”
6 Esaabadu ekina, Yesu aavolowa musinakooka ni anapatxera oxuttiha. Musinakooka mmwe, aakhalamo mulopwana mmoha aarakanle ntata noolopwana.
7 Ni yootthuna weera emphwanyeno nthowa noomoothera, alipa oolepa ni afarisi, yannanwehexexa Yesu weera emoone waari weera ammulamiha mutthu nihiku na esaabadu.
8 Mene Yesu aasuwela etthu yuupuwelaaya, nto aamweerela mulopwana ole oorakala ntata: “Nvinye, nwe mweemele variyari va.” Ni owo, aavinya aneemela.
9 Nto Yesu aaweerela: “Kookoheeni: Onnaakhuleliwa opaka itthu sooreera naari soonanara, ovuluxa ekumi naari wiiva nihiku na esaabadu?”
10 Yesu aawehakaru atthu yaamurukurenre, aamweerela mulopwana ole aarino ntata noorakala: “Mookole ntata.” Nto owo aahookola ntata, ni ntata nne naalama.
11 Ni awo yaanyoonyiwa ni yaapatxera wuuluma yaaworu woohima sa etthu yeeraaya emutekele Yesu.
12 Mahiku ene yaale, owo aawela omwaako weera avekele, ni aaviriha ohiyu wootheene anvekelaka Muluku.
13 Vaxaakaru, aawiitthana atthareli ni aahaathanla 12 a yaawo, ni aahaavaha nsina na arummwa.
14 Masina aya taala: Simoni, yoowo anvanhaawe nsina na Pedru, Andreya munnawe, Yokobe, Yohani, Filipe, Bartolomewu,
15 Matewus, Tome, Yakobe, mwaana Alfewu, Simoni, yoowo iitthaniwa Nanthiti,
16 Yuda, mwaana a Yakobe, ni Yuda Iskarioti, yoowo muhoolo mwaya anvarinhe Yesu.
17 Yesu aakhuruwa vamwaako vamoha naawo ni aaheemela nipuro noowaataleleya; nipuro nne, yaakhalavo atthareli awe antxipale ni muloko mutokotoko wa atthu waakhuma oYudeya, oYerusalemu, oTiro, oSidoni ni mittetthe sa ophareya yaawo yaawenle omwiiwa Yesu ni olamihiwa iretta saya.
18 Mpaka yaale yaahooxiwa ni minepa soonanara, yannalamihiwa.
19 Ni muloko wootheene wa atthu wannaasa omutava Yesu, mwaha wooweera mwa yoowo wannakhuma owera woowaalamiha atthu antxipale.
20 Vano Yesu aahaaweha atthareli awe anaweerela:
“Oohakalala ti nyuwo oohaawa, woona weera Omwene wa Muluku ti wawinyu.
21 “Oohakalala ti nyuwo munvoliwa etala vano, mwaha wooweera munoovonihiwa.
“Oohakalala ti nyuwo muninla vano, mwaha wooweera munrowa otheya.
22 “Muhakalaleke emaara yootheene muneeraanyu mwiittiweke, okhoottiwa, ni onyoholiwa nsina nanyu ntoko nsina noonanara mwaha wa Mwaana a Mutthu.
23 Muhakalaleke yaaweereelakani eyo, ni mutthapeke ni otteeliwa murima mwaha wooweera nlivo nanyu ntokotoko wiirimu, tthiri itthu sene ti seiya makholo aya yaapakelaaya maprofeta.
24 “Mootakhaliwa nyuwo anamuhakhu, mwaha wooweera mohaakhela itthu sootheene mweeraanyu mwaakhele.
25 “Mootakhaliwa nyuwo nvonne, mwaha wooweera munoovoliwa etala.
“Mootakhaliwa nyuwo muntheya mwaha wooweera munimwiikhupanyera ni munimwinla.
26 “Mootakhaliwa nyuwo vaavo muneeraanyu muttottopeliweke etempu yootheene ni atthu, woona weera ti yeeyo makholo aya yaaweerenlaaya maprofeta oowootha.
27 “Menento kinnooleelani ootheene nyuwo munkiiwa: Nvirelele waasivela amwiittani anyu, mwaapakele itthu sooreera ale enwiittani,
28 mwaareeliheke ale enoolaphani* ni mwaavekeleleke ale enooruwanani.
29 Ole oneera oomaneeni nrama noolopwana, mmuhiyere-tho nrama noothiyana weera oomaneeni, ole onrowa owaakhani maleya anyu muhimukhoottihere okuxa, mmuhiyere-tho maleya mphitaanyalaanyu.*
30 Ootheene ale enoovekeleni etthu, muhaakhoottihere, mutthu awaakhani etthu anyu muhinvekele wootthikiherani.
31 “Nave-tho, itthu sootheene sinoosivelani opakeliwa ni atthu, nyuwo-tho mwaapakeleke awo.
32 “Mwaasivela paahi ale enoosivelani, munkela ophwanya eheeni? Anamattheka-tho ennaasivela ale enaasivela.
33 Ni mwaapakela sooreera ale enoopakelani sooreera, munkela ophwanya eheeni? Mpaka anamattheka ennapaka etthu emoha-moharu.
34 Vamoha-moharu, munkela ophwanya eheeni mwaawoolihaka* itthu sanyu atthu ale munroromelaanyu weera enimootthikiherani? Mpaka anamattheka ennawooliha anamattheka akhwaaya ewehereraka waakhela.
35 Moovirikana ni eyo, nvireleleke waasivela amwiittani anyu, mwaapakelaka itthu sooreera muhiwehereraka waakhela etthu, nto nlivo nanyu ninrowa okhala ntokweene ni munrowa okhala anamwane a Muluku Mutokweene, woona weera owo onnaareerela murima atthu oohixukurela ni oonanara murima.
36 Muhihiye waamorela ikharari atthu, ntoko hiihaale Atiithi anyu enaamorelaaya ikharari.
37 “Opwaha mwa yeeyo, muhiye waathoriha atthu akina weera muhithorihiwe, ni muhiye oweerela atthu akina weera munnaphwanela ottaruxiwa, weera Muluku ahoottaruxeni. Nvirelele olevelela weera nyuwo-tho muleveleliwe.
38 Mukhale oovaha weera nvahiweke. Awo enkela woorinkelani ni mphimo wooreera, wookhitteleya, wooxekexeya mpaka oyeeheya. Woona weera murinko munvarelaanyu muteko weera mwaarinkeleno atthu akina, onkela ovareliwa muteko yooweene-tho, weera murinkeliweno yoowo.”
39 Nto, aahima-tho niphwanaphwaniho nikina eeraka: “Neereke mutthu oohoona pooti omweettiha mutthu mukina ohinoona? Khemorela mulittini ooweeli aya?
40 Naskola* khanaapwaha aprusoore awe, mene ootheene ale eneera esomihiwe nnene, eneereke olikana ni prusoore aya.
41 Mwaha wa heeni munwehaanyu ekokhola eri mmaithoni mwa munninyu, mene muhinwera oweha weera mookhalano ekhukulu mmaithoni mwanyu?
42 Vanonto, munwera hayi omweerela munninyu: ‘Hootti kookumiheni ekokhola mmaithoni mwanyu’, nyuwo mwaneenaanyu mureeneno ekhukulu mmaithoni mwanyu? Namootha! Mpatxere toko okumiha ekhukulwaanyu eyo mmaithoni mwanyu mmo, avinyaka munoowera woona moota wookumiha ekokhola mmaithoni mwa munnanyu.
43 “Khawaavo mwiri wooreera oniimiha soowiima soonanara, naari mwiri woonanara khoniimiha soowiima sooreera.
44 Woona weera yoole ori mwiri, onsuweliwa ni soowiima saya. Mwa ntakihero, khavanwereya orukula ifiiku vamwirini wamiiwa, naari orukula iwuuva vamwirini wamiiwa.
45 Mutthu ooreera murima onuuluma itthu sooreera, woona weera vamurimani vawe sirivo itthu sooreera, mene mutthu oonanara murima, onuuluma itthu soonanara, woona weera eyano awe enuuluma ele esareñye vamurimani.
46 “Vanonto, mwaha wa heeni munkiitthanaanyu: ‘Apwiya! Apwiya!’, menento muhipakaka ele kinhimaaka?
47 Woohima sa mutthu ole onwa wa miyo oniiwa masu aka ni anavarela muteko, miyo kinimooleelani taani onlikanaaweno mutthu owo:
48 Owo onoolikana ni mulopwana yoowo emaara yeeyo aapakaawe* empaawe, aathipa malitti oowiixa, ampaka alserse* vamwala. Vano epula erupakaru, mooloko waasara ni maahi ale yaamana empa ele mene khayaawenre omoroxa mwaha wooweera yaalipihiwa.
49 Mene ole oniiwa masu aka ohinvarela muteko, onoolikana ni mulopwana opanke empaawe veehaavani woohikhala alserse,* vano maahi a mooloko yaasara enamana empa ele, ni empa eyo yaamora moowaakuveya ni omora waya yaamonre yootheene.”
