Silempwale ni Luka 20:1-47
20 Mahiku ene yaale, Yesu aaxuttihaka atthu mutemplu ni aalaleeraka mitthenka sooreera, yaahoowa asitokweene aanamakeya, alipa oolepa ni asitokweene aayuda
2 ni yaamweerela: “Munleele, ni ikuru heeni munweraanyu opaka itthu iya? Ni taani oovanheni ikuru sene seiya?”
3 Yesu aawaakhula: “Miyo-tho, kinimookohani etthu emoha, ni nyuwosa mukaakhule:
4 Opatiso wa Yohani, waari wa Muluku naari wa atthu?”*
5 Yaaphwanya waakhula yaaworu yeeraka: “Waakhula neera: ‘Waakhuma wa Muluku’,* owo onkela oneerela: ‘Mwaha wa heeni nto, muhimwaakhulenlaanyu?’
6 Mene, neera vale: ‘Waakhuma wa atthu’, muloko wootheene onrowa onivonya maluku, mwaha wooweera onnaroromela weera Yohani aari profeta.”
7 Nto mwaha wa yeeyo, yaahaakhula yeeraka, khanisuwenle okhummaayawo.
8 Yesu aaweerela: “Miyo-tho nkinooleelani ikuru heeni sinkikhavihera owera ovara itthu* iya.”
9 Nto moottharelana, Yesu aapatxera waaleela atthu niphwanaphwaniho nna: “Mulopwana mmoha, aarino ematta ya ewuuva ni aahaahiyera anamalima ematta ele, ni aaheetta ekwaha arowaka elapo ekina, ni aaviriha etempu yintxipale areene weiwo.
10 Iwuuva siitthwakaru, owo aamurumiha kaporo awe wa anamalima ale, weera akuxe soowiima sawe. Nto anamalima ale emmanakaru yaamoomola matataru.*
11 Mene owo aahaarumihelasa kaporo mukina. Owo-tho yammana, yaamuulihiha muru ni yaamoomola matataru.*
12 Mene owo, aamuruma anaararu, mene anamalima ale yanvulaliha ni yaamoomola.
13 Nto mwaha wa yeeyo, mwaneene ematta ya ewuuva aaheera: ‘Kinkela opaka eheeni? Kinoomurumiha mwanaka, yoowo kimmusivelaaka. Woonaru enoomuttittimihasa owo.’
14 Anamalima emoonakaru mwaana ole, yaahuuluma yaaworu yeeraka: ‘Ola tonrowa ohiyeriwa ematta ela. Vanonto nrowe nimwiive weera nihaleno yoohiyeriwaawe.’
15 Nto awosa, yaamukumihera vaate va ematta enamwiiva. Vanonto mwaneene ematta awa vale onkela waapakela eheeni anamalima ale?
16 Owo onootthika ni onoowiiva anamalima ale, ni onimwaavaherera ematta ele ya ewuuva anamalima akina.”
Yiiwakaru niphwanaphwaniho nna, awosa yaaheera: “Etthu eyo, ehiwe yeereye!”
17 Mene Yesu aahaawehexexa atthu anaakoha: “Vano, entaphulela eheeni yoolepa eneera: ‘Nluku anamateka yaakhonttaaya, naakhalihiwa nluku noolipiha empa’?
18 Ootheene ole onkela omorela nluku nno onimwinteya. Ni ole onkela omoreliwa ni nluku nno, onoonyaanyeya.”
19 Menento etempu ene yeele, alipa oolepa ni asitokweene aanamakeya, yannaasaasa onvara, mwaha wooweera awo yaahoonelela weera owo aapaka niphwanaphwaniho nna aahimaka yaawo. Menento yannoova muloko wa atthu.
20 Ni enwehexexakaru Yesu moomaaleleya, awo yaahaaruma asilopwana yaathummaaya weephiini weera yootherere okhala anaxariya weera envare ni masu awe, weera envaherere wa kuvernu ni mmatatani mwa anamalamulela.
21 Ni yaamweerela: “Muhusiha, hiyo noosuwela weera nyuwo munuuluma ekhaikhai ni munnaxuttiha nnene sene ni khamwaanoono nthalu, mene munxuttiha iphiro sa Muluku moovarihana ni ekhaikhai:
22 Onnareerela omuliva mpostu* Sesare, naari hooye?”
23 Mene owo aahoonelela miruku saya ni aaweerela:
24 “Mukoonihere etenaariyu.* Ekhove ni yoolepa ela eri va, ti yawani?” Yaamwaakhula: “Ti ya Sesare.”
25 Mene owo aaweerela: “Moohihovela, munvaheke Sesare eri ya Sesare, ni ya Muluku eri ya Muluku.”
26 Nto, khayaawenre onvara ni masu ale owo aahimmaawe ohoolo wa atthu. Nto, etikhiniheñyeene ni moota aakhunlaawe yaamaala.
27 Vano, asaduki akina yaawo enhima weera khawaavo ovinyerera, yaamwaattamela enamukoha:
28 “Muhusiha, Mose oonilepela eeraka: ‘Mulopwana akhwa vale ahimuyanre mwaana, munnawe aatheleke akunyaata* awe weera amuyarele mwaana munnawe.’
29 Nto yaakhala alopwana seete, yaawo yaari asinna. Oopatxera aamuthela muthiyana, mene aakhwiiye ahinaaye omuyara mwaana,
30 anaaveeli-tho, yaamweerela etthu emoha-moharu
31 ni anaararu aahaathela akunyaata* awe. Ni yaaheereya etthu emoha-moharu ni ootheene ale seete; yaahookhwasa ehimuyanre mwaana.
32 Omamaliheroni, muthiyana ole-tho aahookhwa.
33 Vanonto, woovinyererihiwani wa alipa ookhwa, muthiyana ola anaakhale mwaara awani? Noonaka weera asinna ale seete yaamuthela.”
34 Yesu aaweerela: “Anamwane a elapo ela,* ennathela ni ennatheliwa,
35 mene ale ephwanenle waakhela elapo enwa ni moovinyererihiwani mwa alipa ookhwa, khenthela naari khentheliwa.
36 Mweekhaikhai, awo khenkhwa-tho, mwaha wooweera enlikana ni malaika ni anamwane a Muluku mwaha woovinyererihiwa.
37 Woohima sa ovinyererihiwa wa alipa ookhwa, mpaka Mose aahima eyo va yooweereya ya mwiri wamiiwa, vaavo ommwiitthanaawe Yehova* ‘okhala Muluku a Abrahamu, Muluku a Isaki ni Muluku a Yakobe.’
38 Owo Muluku aatthu akumi, khaiyene Muluku aatthu ookhwa. Woona weera atthu ootheene awo, vamaithoni vawe akumi.”
39 Yeeraka omwaakhula, alipa oolepa akina yaamweerela: “Muhusiha, mohuuluma nnene.”
40 Ni khaavo a yaawo eerera omukoha etthu ekina.
41 Moottharelana, aahaakoha: “Vanonto, moota heeni enhimmwaaya weera: Kristu mwaana a Davidi?
42 Mwaha wooweera Davidi mwaneene oohima va eliivuru ya Nsalmu eeraka: ‘Yehova* ooweerela Apwiya aka: “Mukilaathi moono aka woolopwana,
43 mpaka miyo waavonyera vathi vamanaani anyu, amwittani anyu.’”
44 Vano, Davidi aamwiitthanaka okhala Apwiya, moota heeni onkelaawe okhala mwanawe?”
45 Ni muloko wa atthu omwiiwelelaka hiihaale, owo aaweerela atthareli awe:
46 “Mwiikosoope ni alipa oolepa, onaasivela weetta ewanreene mikwansu soorakama, wuulumihiwa mapuro oowaattiwa atthu, okilaathela ikatera soopatxera* sa musinakookani, ni okilaathela mapuro oottittimiheya a nfeestani,
47 ennawiiyera itthu asinaamukhweli, ni ennapaka mavekelo oorakama weera yooniwe ni atthu. Awo enoothorihiwa wootepaxa.”
