Silempwale ni Luka 23:1-56
23 Vano, muloko wootheene wa atthu waavinya onamuroiha Yesu wa Pilatu.
2 Nto, yaapatxera omoothera yeeraka: “Nomphwanya mulopwana ola athweelelihaka nloko nahu, akhoottihaka oliviwa mpostu* Sesare, ni iiseerelaka weera owo Kristu mwene.”
3 Vano, Pilatu aamukoha: “Nyuwo Mwene aayuda?” Yesu waakhula enre: “Ti nyuwo munhima.”
4 Woottharelana, Pilatu aaweerela asitokweene aanamakeya ni muloko mutokotoko wa atthu: “Nkimphwanya nthowa noomuthorihela mulopwana ola.”
5 Mene awo yaanyesera yeeraka: “Owo onnaathweeleliha atthu ni sooxuttiha sawe oYudeya wootheene, ovinyera oGalileya, mpaka nno.”
6 Iiwakaru eyo, Pilatu aakoha waari weera Yesu aari a oGalileya.
7 Asuwelakaru weera Yesu aari a muttetthe waalamuleliwa ni Herodi, aamurumiha wa Herodi, yoowo-tho mahiku ene yaale aari oYerusalemu.
8 Vano, Herodi amoonakaru Yesu, aahakalala vantxipale, mwaha wooweera ovinya khalayi owo annatthuna omoona Yesu, mwaha wooweera aahiiwa itthu sintxipale* woohima sa yoowo ni aaweherera woona mwiiriira woopakiwa ni Yesu.
9 Vano, Herodi aapatxera omukoha itthu sintxipale, mene Yesu khaamwaakhunle etthu.
10 Vanonto, asitokweene aanamakeya ni alipa oolepa, yanneemela enamoothera itthu sootepa Yesu.
11 Nto, Herodi vamoha ni anakhotto awe, yaamuramusa Yesu ni yanveeha, enwarihaka ekuwo yooreera, ni avinyaka, yaamutthikihera wa Pilatu.
12 Nihiku nene nenne Herodi ni Pilatu, yaawo yiittanne, yaakhala asinthamwene.
13 Pilatu aahaathukumanya asitokweene aanamakeya, ahooleli ni atthu,
14 owo aaweerela: “Mukiwiihenre mulopwana ola, ntoko mutthu onaahapuxa atthu. Miyo koomuthoriha mulopwana ola ohoolo wanyu, mene nkiphwannye nthowa na mulattu mummootheraanyu.
15 Mweekhaikhai, naari Herodi yoowo, khaphwannye nthowa, tivanto onitthikihenraawe hiyo. Ntoko munoonaanyu, owo khapanke etthu yoophwanela wiiviwa.
16 Vano, kinoomuttaruxa ni kinoomutaphula.”
17 * ——
18 Vanonto, muloko wootheene wa atthu waakhuwela: “Mmwiive* mulopwana owo, ni mmutaphule Barraba!”
19 (Mulopwana ola aatthukinwe okateya mwaha wa onyakulihana waakhumelenle mmuttettheni, ni mwaha wa omwiiva mutthu.)
20 Pilatu aatthikela wuuluma naawo, mwaha wooweera aatthuna omutaphula Yesu.
21 Nto awo yaapatxera okhuwela yeeraka: “Akhomeliwe* vamwirini! Akhomeliwe vamwirini!”
22 Owo aahaakoha-tho ekwaha yanaararu: “Mwaha wa heeni? Etthu heeni yoonanara opankaawe mulopwana ola? Nkiphwannye nthowa nneeriha mulopwana ola ophwanela wiiviwa. Vanonto, kinoomuttaruxa ni omutaphula.”
23 Opwaha mwa yeeyo, yaapatxera okhuwela moonyesera, weera owo akhomeliwe* ni okhuwela waya waavirelela mpaka
24 Pilatu, olakela waakhulela yoovekelaaya.
25 Pilatu aamutaphula mulopwana yanvekenlaaya weera ataphuliwe, yoowo aatthukinwe mwaha wa onyakulihana ni wiiva. Ni aawinnyerera Yesu, moovarihana ni yootthunaaya.
26 Yeeraka omukuxa hiihaale, yanvara mulopwana mmoha a oKirene, eeriwa Simoni, aakhuma omatta, ni yaamuteexiha mwiri* weera amutthariheke ottuli wawe.
27 Atthu antxipale yannamutthara, waahela mpuwa athiyana yiimana vakakasani mwaha wooriipiwa murima ni yannamwinlela Yesu.
28 Yesu aarukunuwa anaaweha asithiyana ale ni aaweerela: “Nyuwo asithiyana a oYerusalemu, muhikinlele miyo. Menento, mwiisinlele nyuwo ni anamwane anyu;
29 nto musuwele weera enoophiya mahiku atthu eneeraaya yeereke: ‘Oohakalala athiyana oohiyara, ehinaaye oyara ni mapele ehinaaye omwaamwiha mwaana!’
30 Vano, atthu enoopatxera weerela minyaako: ‘Munimorele!’ Ni mattumuxa: ‘Munikhuneele!’
31 Waareene weera awo ennapaka eyo mwiri oreene mukithi, enkela opaka eheeni wuuma vale?”
32 Asilopwana eeli, anakirime, yeera ekuxiwaka-tho weera yiiviwe vamoha ni Yesu.
33 Ni ephiyakaru nipuro niitthaniwa Ekarakasa, yaamukhomela Yesu vamwirini vamoha ni anakirime eeli, mmoha moono woolopwana ni mukina woothiyana.
34 Vano Yesu anneera: “Tiithi, mwaalevelele, woona weera awo khensuwela etthu empakaaya.” Opwaha mwa yeeyo, yaahaasaasera eparakha weera ekawane soowara sawe.
35 Atthu yaaheemela enwehaka. Mene ahooleli yannamutheya yeeraka: “Ola oowera waavuluxa atthu akina; vano, aareene Kristu oothanliwa ni Muluku, iivuluxe mwaneene.”
36 Mpaka ni anakhotto ene yannanveeha, emwaattamelaka ni envahaka eviinyu yoowaawa,
37 ni yeeraka: “Waareene weera nyuwo Mwene aayuda, mwiivuluxe mwaneene anyu.”
38 Yaahiikaathiwa* yoolepa emoha vasulu vawe yeera: “Ola Mwene aayuda.”
39 Vano, mmoha aanakirime ale yaakhomelinwe aapatxera onveeha eeraka: “Nyuwo khaiyene Kristu? Nto mwiivuluxe mwaneene anyu ni hiyo-tho!”
40 Nakirime mukina aamwaakhula amuximwelaka eeraka: “Nyuwo khamummoova Muluku, nttaruxo mwaakhenlaanyu nnoolikana nuuwo?
41 Mene nttaruxo hiyo naakhenlaahu ti naxariya, mwaha wooweera hiyo ninttaruxiwa moovarihana ni ele nipankaahu. Mene mulopwana ola khapanke etthu yoonanara.”
42 Vano, owo aaheera: “Yesu, mukuupuwele mwavolowa Moomweneni mwanyu.”
43 Ni owo aamweerela: “Kinnooleelani ekhaikhai olelo: Munaakhale Oparayiisu ni miyo.”
44 Yaari ewoora ya 12 yaapatxenraaya epiphi elapo ele yootheene, mpaka ewoora ya 15,
45 mwaha wooweera nsuwa naahiya waara. Nto, ekortiina ya mutemplu yaapereya variyari.
46 Ni Yesu aakhuwela ni nsu noowiiwanyeya ni aaheera: “Tiithi, kinnahiya ekumi aka mmatatani mwanyu.” Ahimakaru masu ala, aahookhwa.
47 Mutokweene aanakhotto onnaawe itthu iye seereya, aapatxera onvuwiha Muluku, eeraka: “Mweekhaikhai, mulopwana ola aari naxariya.”
48 Ni muloko wootheene wa atthu waari* vale wonne itthu iye seereyaka; waatthikela mmawannyaya, wiimanaka vakakasani.
49 Nto atthu ootheene ale yaamusuwenle, yeemenle ottayi wene. Opwaha mwa yeeyo, asithiyana yaawo yaamutthara Yesu okhuma oGalileya, yaari nipuro nene nenne, ni yaahoona itthu iya seereyaka.
50 Aakhala mulopwana mmoha iitthaniwa Yosefe, yoowo eerela eparte Esineetriyu, owo aari mulopwana ooreera murima ni axariya.
51 (Mulopwana ola khaakhulenle ni khaamukhavihenre palano aya oomwiiva Yesu.) Owo aari a elapo ya wArimatheya, muttetthe mmoha wa oYudeya, yoowo-tho aaweherera owa wa Omwene wa Muluku.
52 Mulopwana ola aarowa wuuluma ni Pilatu ni aavekela murutthu wa Yesu.
53 Vano, owo aakumiha murutthu wa Yesu vamwirini, ni aavitikelela ni ekuwo ya eliinyu ni anvitha mmahiyeni nenno naathipinwe vamwala, nihiye nene nenno nahaatonko ovithiwamo mutthu.
54 Naari nihiku naarehereriwaaya nihiku na esaabadu, ni nihiku na esaabadu naahanle opatxera.
55 Vano, asithiyana aawiiyaaweno oGalileya, yaarowa-tho ni yaahoona nihiye ni moota waavithinwaaya murutthu wa Yesu;
56 ni yaatthikela owaani weera yareherere makhura oowinkhela. Menento, ntoko yookhovelela, yaahiitthuuwa nihiku na esaabadu moovarihana ni nlamulo.
