Ekaarta yanaaveeli ya Timotiyu 4:1-22
4 Kinnawoopererani nnene, ohoolo wa Muluku ni wa Kristu Yesu, yoowo onkela waathoriha atthu akumi ni atthu ookhwa, etempu onkelaawe wooniheriwa vamoha ni Omwene awe.
2 Mulaleye masu a Muluku, mpakeke eyo moowaakuveya, etempu yooreera ni etempu yooxupa. Nwoonihereke atthu etthenkaayavo, mwaahiihaka nnene, nwooperereke mwaapixeraka murima vantxipale ni mwaaxuttiheke nnene.
3 Enoophiya etempu atthu enkelaaya okhootta sooxuttiha sooreera, awosa enkela ottharaka sootthuna sa murima aya ni enimwiisaasera anamaxuttiha yaawo enkela ohimaka itthu awo entthunaaya wiiwa.
4 Awo khenkela wiiwelelaka ekhaikhai ni enkela oreyaka maaru soohimmwa soowootha.
5 Nto nyuwo muupuweleke nnene mwa itthu sootheene, nivileleke maxupo, nvareke muteko woolaleya mitthenka sooreera ni munvareleke muteko Muluku moomalela.
6 Kiri ntoko yoovaha ya eviinyu eñyeeheriwa valtaareni, etempu ya ovuluxiwa waka yohaattamela.
7 Koowana ekhotto yooreera, ni kootthimaka mpaka okhwipi ni kookhala moovarihana ni nroromelo na ekristu.
8 Ovinya viinaano mpaka muhoolo, Pwiya onthoriha mwa exariya ori oolikaneene weera akivahe nampurutxi.* Nampurutxi yoowo* envahiwa ale eri anaxariya, owo onookivaha eyo ntoko nlivo nihiku nene nenno. Owo khaiyene onkela okivaha yoomiru paahi, mene onimwaavaha atthu ootheene ale enweherera wooniheriwa wawe.
9 Mpake ele munweraanyu weera nwe mukixekure moohipisa.
10 Dema ookitthawa mwaha wooweera annasiveliwa ni itthu sa elapo ela* owo okenle oTesalonika, Kresente okenle wa Agalata ni Titu okenle oDalmasiya.
11 Miyo kihanle paahi ni Luka. Mwaawaaka vale, nwe vamoha ni Marku, mwaha wooweera owo onnavareleya muteko wa miyo mmutekoni mwa Muluku.
12 Koomurumiha Tikhiko orowa wEfeso.
13 Mwaawaaka vale mukiwiihere ekasako aka kihiñyaaka oTrowade owannyawe Karpo, nave-tho muhittiwale okuxa iroolu, otepaxa wene iroolu sa exapala.
14 Alexandre namahana a ekoopre, ootepa okihasula vantxipale, mene Yehova* onoomuliva moovarihana ni miteko sawe.
15 Nto wa nyuwo, kinnooleelani weera mwiikosoope ni mulopwana ene yoola, woona weera owo onnavaanyiha moowiilipihera mitthenka ninlaleyaahu.
16 Ekwaha yoopatxera kiisaakihaaka ohoolo wa anamalamulela, khaavo aakikhavihenre, mene atthu ootheene yaakihiya. Nto Muluku aalevelele atthu awo mwaha wa etthu eyo.
17 Nto Apwiya yaari ni miyo ni yaakilipiha weera moorweela mwa miyo silaleiwe mitthenka sooreera moomalela, ni weera atthu a maloko ootheene yiiwe mitthenka iyo ni kaavuluxiwa mmwaano mwa kharamu.
18 Apwiya enookaakiha mwa itthu sootheene soonanara ni enookivuluxa ekiroihaka Moomweneni mwaya wiirimu. Apwiya evuwihiwe wa mahiku ootheene. Amem.
19 Munvaherere isalaamu saka Priska ni Akila, ni emusi ya Onesiforo.
20 Erasto ohanle oKorinto, mene Trofimo kimuhiñye ovoreiwaka oMileto.
21 Mpake ele munweraanyu weera mphiye nno kiraakawo ehinaaye ophiya eyiita.
Eubulo nave-tho Pudente, Linu, Klaudia ni asinna ootheene ennoovahani isalaamu.
22 Mukhalelo anyu wooreera munooniheraanyu, oreelihiwe. Oreera murima otokweene wa Apwiya Yesu Kristu okhale ni nyuwo.
