Ekaarta yanaaveeli ya Timotiyu 3:1-17
3 Nto musuweleke weera mahiku oomalihera enkela okhala mahiku ooxupa ovilela ni oowoopiha.
2 Mweekhaikhai, atthu enrowa okhala oowiitthuna, oosiveliwa musurukhu, oowiittottopela, oowiisoona, onveeha Muluku, oohiwiiwelela asipapaya, oohixukurela, oohiroromeleya,
3 enkela okhala oohaasivela akhwaaya, khenrowa otthunaka wiiwanana, oowoothera akhwaaya, oohiihiiha, oowali, oohisiveliwa ni itthu sooreera,
4 enkela waapakelaka itthu soonanara akhwaaya, anamakaani, oowiisunnuwiha, enkela osiveliwaka ni itthu sinaasivela ohiya omusivela Muluku,
5 atthu enkela wooniheraka weera ennamukokhorela Muluku mene soopaka saya soovirikana niiyo. Atthu ntoko ala mwaasepeke.
6 Variyari va atthu ene ntoko yaala, enookhumelela asilopwana oowootha, awo ennaphiya mootxentxera vaate va asithiyana ehikhanleno nroromelo noolipa ni anamattheka ni enniiya mirima saya; asithiyana ala akaporo a sootthuna sa mirima saya,
7 asithiyana awo ennavirelela oxuttera, nto khenwera ophwanya osuwela weekhaikhai.
8 Hiihaale ntoko Iyane ni Jambre yaamurukunuwenlaaya Mose, asilopwana awo-tho ennavirelela ovaanyiha ekhaikhai. Ni muupuwelo aya woonanara nave Muluku khanwaakhulela mwaha wooweera khenkhala moovarihana ni nroromelo.
9 Mwa yeeyo, awo khenkela ottayi mwaha wooweera ololo aya onimooneya ohoolo wa atthu ootheene ntoko hiihaale weereñyaaya ni asilopwana ale eeli.
10 Menento nyuwo mootthara nnene sene sooxuttiha saka, mapakelo aka itthu mweekumini, yootthuna aka, nroromelo naka, opixa waka murima, nsivelo naka, ovilela waka,
11 ottharatthariwa waka ni oviriha waka maxupo, ntoko ale kivirinhaaka emaara kaaraaka wAntiyokiya, wIkoniyu ni oListra. Miyo koovilela ottharatthariwa wootheene nno, ni Apwiya aakivuluxa mwa maxupo ootheene ala.
12 Mweekhaikhai, ootheene ale eneera ethanle onvarela muteko Muluku moowiiraana ni Kristu Yesu, enoottharatthariwa-tho.
13 Menento atthu oonanara murima ni oowoka eneereke otepa waatxeerereya yaawokaka atthu ni awo-tho ewokiwaka ni atthu akina.
14 Mene, nyuwo nvireleleke otthara ele muxuttihinwaanyu, seiyo nyuwo muroromenlaanyu. Nyuwo moosuwela taani ooxuttinheni itthu iyo,
15 nave ovinya enamwane anyu nyuwo moosuwela soolepa sootteela seiyo sikhanle soowookhaviherani okhala mutthu oosuwela weera nvuluxiwe mwaha woomuroromela wanyu Kristu Yesu.
16 Soolempwa sootheene suupuxerinwe ni Muluku ni sinnavareleya muteko weera saaxuttiheke atthu, weera siwoonihereke itthu soonanara, owookolola weera yeetteleke ephiro ya exariya.
17 Ni yootthuna weera ole ommukokhorela Muluku awereke ni akhaleke ookwaneleene weera avare miteko sootheene sooreera.
