Ekaarta yanaaveeli ya Timotiyu 1:1-18
1 Miyo Paulo, murummwa a Kristu Yesu kithanlinwe moovarihana ni yootthuna ya Muluku, kithanlinwe ni yootthuna weera kilaleere yooweherera yookhalano ekumi moorweela mwa Kristu Yesu,
2 kinoolepelani nyuwo Timotiyu mwanaka oosiveleya:
Oreera murima otokweene wa Muluku, omoriwa ikharari ni murettele onkhuma wa Muluku, Tiithi ni wa Kristu Yesu, Pwiya ahu okhale ni nyuwo.
3 Kinnamuxukurela Muluku yoowo kinanvarelaaka muteko ntoko hiihaale yanvarelaaya makholo aka ni yoosuweliha ya murima yooreera. Nave, othana ni ohiyu nkinhiya owuupuwelani nyuwo emaara kimmutxonttelaaka Muluku.*
4 Emaara kinuupuwelaaka maithori anyu, kinnatthuna owoonani ni yootthuna weera mukihakalalihe vantxipale.
5 Miyo kinnuupuwela nroromelo nanyu noohootha, nenno yaapatxenraaya okhalano annaanyu* a Loide ni ameyanyu Eunice, miyo-tho kinnaroromela weera nyuwo mookhalano nroromelo nimoharu ntoko naawo.
6 Nto mwaha wa yeeyo, kintthuna weera mutetheereleke ntoko mooro yoovaha ya Muluku mwaakhenlaanyu mwaha wa miyo owiiyaatherani matata aka.
7 Woona weera munepa wootteela Muluku onivanhaawe khonkumihera wa hiyo woova, mene onkumihera owera, nsivelo ni wuupuwela nnene.
8 Hiiho, muhuuliweke muru olaleya woohima sa Apwiya ahu naari woohima sa miyo kitthukinwe mwaha wa yaawo, nto nvirihe maxupo muneeraanyu mukhaleno weera nwere olaleya mitthenka sooreera. Mmuroromeleke Muluku weera onimoovahani owera weera nwere oviriha maxupo.
9 Owo oonivuluxa ni ooniitthana weera nikhale ootteela, khaiyene mwaha wa miteko sahu, mene mwaha wa yootthuna awe ni oreera wawe murima otokweene. Muluku onivanhe eyo khalayi moorweela mwa Kristu Yesu.
10 Mene vano, oreera murima iwo otokweene wohooneya nnene mwaha woowooniheriwa nvuluxa ahu Kristu Yesu yoowo omalinhe okhwa ni onoonihenre avarelaka muteko mitthenka sooreera ni moota wookhalano ekumi ni erutthu ehinuntta.
11 Miyo koothanliwa weera kikhale murummwa ni muhusiha ni namalaleera a mitthenka sene seiyo.
12 Tivanto, kinnaviriha maxupo mwaha woovara muteko ola, mene nkinuuleliwa muru. Woona weera koomusuwela ole kimmuroromelaaka, ni kinnaroromela weera owo onookosoopa itthu sootheene kimuhiyenraaka weera akosoope mpaka nihiku nno onkelaawe owa.*
13 Nvirelele otthara ntakihero na masu a ekhaikhai* koolenlaakani ni nvirelele woonihera nroromelo nanyu ni nsivelo ntoko mutthu ori oowiiraana ni Kristu Yesu.
14 Mukhaviheriwaka ni munepa wootteela, mwiiyaathi nnene itthu sootthuneya nyuwo mwaakhenlaanyu.
15 Nyuwo moosuwela weera atthu ootheene a eprovinsiya ya wAsia aakihiya omuhela mpuwa Fijelo ni Hermojene.
16 Apwiya yaamorele ikharari amusi a Onesiforo, woona weera ikwaha sintxipale owo ookilipiha ni khuuliwa muru mwaha wa miyo otthukiwa.
17 Mwaha woohoona wawe wuuliha muru, emaara aaraawe oRoma, aakaasaasa mwa nthiti ni aakiphwanya.
18 Apwiya Yehova* emmorele ikharari owo nihiku noothoriha. Ni nyuwo, munnasuwela nnene sene itthu sootheene okipakenlaawe wEfeso.
