Ekaarta yanaaveeli ya Timotiyu 2:1-26
2 Vanonto mwanaka, nvirelele okhalano owera mwaha wa oreera murima otokweene wa Muluku ori mwa Kristu Yesu.
2 Woohima sa itthu mwiiwalaanyu ni miyo ni seiyo sihelelinwe onamoona ni atthu antxipale, mwaaxuttihe asilopwana oororomeleya yaawo eneera ekhale oophwanelela weera yaaxuttihe itthu iya atthu akina-tho.
3 Ntoko nakhotto a ekhaikhai a Kristu Yesu, mwaakhuleleke ohaawa.
4 Nakhotto weera amusivelihe ole omulempe, khantthuneya wiivoleihera ekumi yoomweetta nakoso.*
5 Ni, enneereya etthu emoha-moharu mapuro ale empakiwa mpikisano,* khaavo mutthu ontthuveliwa ohentte mpikisano* moovarihana ni malamulo a mpikisano* owo.
6 Namalima onvara muteko moowiilipihera, ontthuneya weera akhaleke oopatxera otxa soowiima sa mmatta mwawe.
7 Muupuweleleke voohihiyerereya ela miyo kinhimaaka; Apwiya enimoovahani osuwela* mwa itthu sootheene.
8 Muupuweleke weera Yesu Kristu oovinyererihiwa mwa alipa ookhwa, ni owo aari osuulu wa Davidi moovarihana ni mitthenka sooreera miyo kinlaleyaaka.
9 Nto mwaha wa mitthenka sene seiyo, miyo kinhaawaaka ni kitthukinwaaka ntoko nakirime, menento masu a Muluku khetthukinwe.
10 Nto mwaha wa yeeyo, kinnavirelela ovilela itthu sootheene sinkiphwanya mwaha wa oothanliwa weera awo-tho ephwanye ovuluxiwa, ovuluwa weiwo onrweela wa Kristu Yesu ni ovuwa woohimala.
11 Masu ala teekhaikhai: Waari weera ninkhwa mwa Kristu, niroromeleke-tho weera nnookhalano ekumi mwa yoowo,
12 wakhala weera nnoovirelela ovilela, nnoolamulela-tho vamoha ni yoowo; wakhala weera nnoomukhootta, owo-tho onoonikhootta;
13 nakhala atthu oohiroromeleya, owo aneereke ovirelela okhala oororomeleya, woona weera owo khanwera opaka etthu moovirikana ni mukhalelo* awe.
14 Nvirelele owuupuxera itthu iya atthu awo, mwaavahaka miruku* ohoolo wa Muluku weera ehinyakulihaneke woohima sa masu, weiwo ohimphwanyiha etthu, woona weera onyakulihana iwo, onnaananariha ale eniiwa.
15 Makhalelo anyu a ekumi yoonihereke weera nyuwo murumeyi oowaakhuleliwa a Muluku, ntoko namuteko ohinuuliwa muru muxuttihaka ni mwiiwanyeihaka nnene sene masu a ekhaikhai.
16 Musepeke matthekulelo ehinvareleya muteko yaawo enanveeha Muluku, woona weera matthekulelo awo ennamweeriha mutthu ovirelela opaka itthu soonanara,
17 nave masu aya ennamwaramwareya ntoko nimmwaramwareyaaya nikhwatta mweerutthuni. Mwa atthu ene yaawo, ookhalamo Himeneyo ni Fileto.
18 Asilopwana ene yaala, aahiya weettela ekhaikhai ehimaka weera ovinyerera woheereya ni awo enniiva nroromelo na atthu akina.
19 Nnaamweera vareene hiiho, alserse* oolipa Muluku ompankaawe onnavirelela okhala ni ookhalano etthu enoonihera weera masu ala teekhaikhai, masu ene taala: “Yehova* ohaasuwela atthu awe” ni “atthu Ootheene ale enroromela* nsina na Yehova* ontthuneya weera ehiyeke opaka itthu soohixariya.”
20 Nyuwo moosuwela weera empa etokweene khasinkhala paahi itthu sa ewooru ni eparatha, nave-tho sinnakhala itthu sa etthaapwa ni sa oloko. Ikina sinvareliwa muteko nihiku noothanleya ni ikina sinvareliwa muteko nihiku piswa.
21 Wakhala weera mutthu onimwiivalaanya ni itthu iye sinvareliwa muteko nihiku piswa, owo onkela otteelihiwa ni onrowa okhala etthu envareliwa muteko nihiku noothanleya. Owo onootteelihiwa ni onrowa okhala etthu yooreera wa Apwiya awe ni onrowa okhala oolikaneene ovara muteko ori poothe wooreera.
22 Tivawonto, mutthaweke sootthuna sa emiravo, mene mwaaseke exariya,* nroromelo, nsivelo, murettele vamoha ni atthu ale enaaroromela* Apwiya ni murima wooreera.
23 Nave-tho, musepeke ovaanyihana woololo ni woohivareleya muteko woona weera moosuwela weera itthu iyo sinnakumihera ohiiwanana.
24 Kaporo Aapwiya khantthuneya onyakulihana, mene ontthuneya waareerela murima atthu ootheene, oolikaneene weera axuttihe ni oowera wiiwehaweha aavirihaka maxupo.
25 Ni akhaleke oomaala murima emaara yeeyo onaaxuttihaawe atthu ale ehintthuna wiiwelela ele enxuttihiwaaya. Apaale Muluku onooweeriha ottharuwa,* ottharuwa weiwo onrowa oweeriha osuwela ekhaikhai.
26 Hiiho, awosa yasuwela ekhaikhai, enimoonelela weera yaamorenle mmuraakhoni mwa Diabo, weera epakeke yootthuna awe, nto vano esuwenlaaya, enoovinyamo.
Footnotes
^ Naari: “ovara muteko mukina.”
^ Naari: “eneettiwa axooku.”
^ Naari: “ohimwentte xooku.”
^ Naari: “axooku.”
^ Naari: “wiiwamo.”
^ Naari: “omutthu.”
^ Naari: “onamoona woomalela.”
^ Naari: “mathipelo.”
^ Naari: “ale enromola.”
^ Nwehe masu oowiiwanyeihiwa.”
^ Naari: “enaaromola.”
^ Naari: “orukunuxa murima.”
