O Betania ya kala okambo kamue katito ka kala ocinãla ci soka 3 kolokilometulu lo Yerusalãi. (Yoano 11:18) Osimbu kua kambele olosemana vimue eci handi Yesu ka file, kua pita ocilunga cimue. Lasaru, ekamba lia Yesu wa vela calua kuenje, wa fa.

Eci Yesu a yeva esapulo liaco wa sapuila olondonge viaye hati, Lasaru wa pekela, pole ngenda ho pasula kotulo. (Yoano 11:11) Omo okuti olondonge ka via kuatele elomboloko liaco, Yesu wa vi sapuila hati: “Lasaru wa fa.”—Yoano 11:14.

Noke yoloneke vikuãla tunde eci a kendiwa, Yesu wa pitĩla ko Betania kuenje wa lembeleka Marta, manji a Lasaru. Marta wa popia hati: “A ñala, nda wa kaile kulo, nda mume wange ka file.” (Yoano 11:17, 21) Yesu wa popia laye hati: “Ame ndipinduko haime ndimuenyo. U o ñolela, ndaño o fa, haimo o kala vali lomuenyo.”—Yoano 11:25.

Yesu poku lekisa okuti ohuminyo yaye yocili, wamẽla keyambo kuenje wa vilikiya lolukandi hati: “A Lasaru, tundamo!” (Yoano 11:43) Omanu va kalapo va komoha eci va limbuka okuti omunu wa file wa pinduka.

Yesu osimbu ka pinduile Lasaru, wa lingile ale ovikomo vivali vioku pindula ava va fa. Ocikomo catete wa pindula omõla ufeko, wa Yairo. Osimbu handi ko pinduile, wa popelevo hati, wa pekela kotulo.—Luka 8:52.

Kũlĩhĩsa okuti Yesu poku vangula catiamẽla kolofa via Lasaru kuenda viomõla ufeko a Yairo, wa sokisa olofa lotulo. Oku sokisa kuaco kua sunguluka. Momo lie? Omunu wosi wa pekela kotulo ka yevi evalo kuenda ka tali ohali. (Ukundi 9:5; Tanga vokakasia losapi hati,  “Olofa vi Kasi  Ndotulo.”) Noke olondonge via Yesu via kuata elomboloko liasuapo liatiamẽla kekalo liomanu va fa. Elivulu limue li tukuiwa hati, Enciclopédia de Religião e Ética li lombolola okuti, “olondonge via Yesu via tendele olofa ndoku pekela otulo, kuenda eyambo ocitumãlo cimue cepuyuko komanu vana va fila vekolelo.” *

Oku kũlĩha okuti ava va fa va pekela veyambo kuenda ka va kasi oku tala ohali, ci tu lembeleka. Omo okuti tua kũlĩha eci ci pita letu poku fa, ka tu kuete vali usumba.

Ndaño okuti tu sanjukila oku pekela ciwa luteke, pole, helie o yongola oku amamako oku pekela otembo ka yi pui? Elavoko lipi tu kuete liokuti, ava va fa va ka kala vali lomuenyo ndeci ca pita la Lasaru kuenda omõla ufeko a Yairo?

Yovi ulume umue ukuekolelo wa linga epulilo liaco eci a simĩle okuti o panda kolofa. Eye wa pula ndoco: “Omunu nda o fa o kala vali lomuenyo?”—Yovi 14:14.

Poku tiamisila epulilo liaco ku Suku Ukuonene Wosi, Yovi wa li tambulula eye muẽle hati: “Nda wa mbilikiya, lame nda nda ku kumbulula. Nda oco, ove nda wa kuatela upange wovaka ove ongeva.” (Yovi 14:15) Yovi wa kuatele ekolelo liokuti Yehova o kasi oku talamẽla epuluvi lioku pindula afendeli Vaye vakuekolelo. Anga hẽ Yovi wa kala oku lavoka ocina cimue ka ci tẽliwa oku lingiwa? Sio, hacoko.

Apinduko a lingiwa la Yesu a eca uvangi wokuti, Suku wa ecele ku Yesu unene woku pindula ava va fa. Embimbiliya li popia okuti cilo Yesu o kuete ‘olosapi violofa.’ (Esituluilo 1:18) Omo liaco, ndeci Yesu a kuatele unene woku pindula Lasaru, o kuetevo unene woku ka pindula ava va fa.

Embimbiliya li lombolola olonjanja vialua ohuminyo yepinduko liava va fa. Ungelo umue wa lembelekele uprofeto Daniele hati: “O ka puyuka, kuenje o ka talama vocipiñalo cove kesulilo lioloneke.” (Daniele 12:13) Yesu wa sapuilile va Sadukeo asongui va va Yudea vana ka va tavaile kohuminyo yepinduko hati: “Wa lueyi omo ka wa kũlĩhili ovisonehua, ndaño unene wa Suku.” (Mateo 22:23, 29) Upostolo Paulu wa popia hati: “Ñuete elavoko ku Suku . . . okuti kuli epinduko lia vakuesunga lava havakuesungako.”—Ovilinga 24:15.

Otembo yipi ku keya epinduko lia vakuesunga lava havakuesungako? Ungelo wa sapuila Daniele okuti o ka pinduiwa “koloneke via sulako.” Marta wa kolelelevo okuti manjaye Lasaru, “o ka pinduka keteke lia sulako.”—Yoano 11:24.

Embimbiliya li tokekisa “oloneke via sulako” luviali wa Kristu. Paulu wa soneha ndoco: “Momo Kristu o viala toke [Suku] a kapa ovanyali vaye vosi vemehi liolomãi viaye. Unyali o sulako oku imũha Kufa.” (1 Va Korindo 15:25, 26) Eli olio esunga lieci tu sukila oku likutilila okuti Usoma wa Suku wiye, kuenda ocipango ca Suku ci lingiwe palo posi. *

Ndomo Yovi a ci kũlĩhile, Suku o ka pindula ava va fa. Eci eteke liaco liya, olofa vi ka imũha. Kuenje, lalimue eteke umue a ka pula hati: ‘Olofa esulilo liovina Viosi?’