БО ЧАШ төл кым-дыр, билир сен бе? Ийе — ол Иисус-тур. Ол чаа-ла кажаага төрүттүнүп келген. Кажаа дээрге мал-маган тудуп азыраар тускай чер-дир. Мария Иисусту элчигеннерге база өске дириг-амытаннарга чем шыгжаар хааржак иштинге чыттырып каан. А чүге Мария биле Иосиф мында мал-маган аразында турар улус боор? Чаш төл төрүттүнеринге таарымчалыг чер бе бо?

Чок болбайн канчаар. А мында олар бо дээш. Римниң чагырыкчызы Це́зарь А́вгуст хоойлу үндүрген, ол хоойлу ёзугаар кижи бүрүзү төрүттүнген хоорайынга баргаш, ат-сывын чизе номунга бижидер ужурлуг турган. А Иосиф маңаа — Вифлее́мге төрүттүнген. Ынчалза-даа кажан олар Мария-биле хоорайга чедип кээрге, оларга кайда-даа турар чер чок болган. Ынчангаш олар бээр, мал-маган тудуп турар черже, келир ужурга таварышкан. Ол-ла хүн Мария Иисусту божупкан! Ынчалза-даа көрүп тур сен, ооң-биле шупту чүве эки.

Иисусту көөр дээш келген кадарчыларны көрүп тур сен бе? Олар дүне шөлге хойларын кадарып турда, хенертен оларны чырык чылчырыктапкан. Ол дээрниң төлээзи болган! Кадарчылар хөлчок корткан. Ынчалза-даа дээрниң төлээзи оларны дораан оожургаткан: ‘Кортпаңар! Менде силерге эки медээ бар. Бо хүн Вифлее́мге Дээрги Иисус төрүттүнген. Ол кижилерни камгалаар! Силер ону чөргекте шарып каан база хааржак иштинде чыттырып каан кылдыр көрүп каар силер’. Хенертен Бурганны алдаржыдып турар, дыка хөй дээрниң төлээлери көстүп келген. Кадарчылар Иисусту ол-ла дораан дилеп чоруткаш, моон тып алган.

Иисустуң чүзү ындыг онзагай бооп турар, билир сен бе? Херек кырында кымыл ол? Сактып келем, бо номда бирги чугаадан, Бурганның бирги Оглунуң дугайында билип алган бис. Ол Иегова-биле кады дээрни, черни база арткан шупту чүүлдү чаяап тургускан. Ам билип тур боор сен — Иисус деп кымыл!

Ийе, Иегова Оглунуң чуртталгазын дээрден алгаш, Марияның иштинче көжүрүпкен. Марияның иштинге төл дораан өзүп эгелээн, аваларының иштинде өске төлдер өзүп турары ышкаш. Ынчалза-даа бо төл Бурганның Оглу болган. Ам-на Иисус Вифлее́мге, бо кажаага төрүттүнүп келген. Ам билип тур сен бе, чүге дээрниң төлээлери ындыг өөрүшкү-биле кижилерге Иисус төрүттүнген деп дыңнаткан-дыр?