Элээди апаргаш, Иеговадан ырап эгелээн мен. Сактырымга, чаңгысклассчыларым дыка хостуг, а мен хамык чүведен чыдып калган ышкаш болган мен. Ада-иемниң негелделери болгаш библейжи дүрүмнер меңээ дыка шыңгыы кылдыр сагындырган, ынчангаш Иеговага бараалгал аар чүък дег апарган. Иегова бар дээрзинге черле чигзинмес турган мен, ынчалза-даа Ооң-биле найыралым чоорту кошкай берген.

Мени шуут-ла суртаалдавайн барган деп болбас, анаа-ла карак чаап чоруп турган мен. Суртаалга черле белеткенмес болгаш, улус-биле чугааны эгелеп алыры база ону улаштырары меңээ дыка берге турган. Ынчаар мээң өөрүшкүм чидип, суртаалга сонуургалым өжүп эгелээн. «Канчап неделя-неделязы-биле, ай-айы-биле суртаалдаар боор чүвел?» деп боданыр апарган мен.

17 харлыымда хостуг чурттаксай бергеш, Австралияже чорупкан мен. Чоруур дээримге, ада-ием мен дээш сагышсырап, өске черге Иеговага улаштыр бараалгаар ирги бе деп идегеп артып калган.

 Австралияга Бурган-биле хамаарылгам дам баксырап калган. Чыыштарже баар-барбас турган мен. А эдержир аныяктарым, мен ышкаш, хүндүс чыыш баар, а кежээ арагалап, танцылаар дээш, дүнеки клубтар кезиир турган. Ам бодап орарымга, ол үеде бир будум-биле алыс шынга, а өске будум-биле бо делегейге чоруп турган мен. Ынчалза-даа бодумну каяа-даа херек кылдыр миннивейн чораан мен.

Ийи хире чыл эрткенде, бир угбай-биле таныжып алган мен. Ол боду безин билбейн, чуртталгаже көрүжүмнү өскертипкен. Мен чыыштан дөрт аныяк уруг-биле чурттап турган мен. Бир катап кожуун хайгааракчызы кээрге, ону кадайы Тамара-биле бажыңывыска бир неделя ишти чурттаар кылдыр, чалап алган бис. Тамараның ашаа чыыштың ажыл-херектерин кылып чоруптарга, ол бистиң-биле артып калгаш, үени хөглүг эрттирер турган. Дыка амырап турдум! Тамара көңгүс бөдүүн, чазык кижи болган. Бурган-биле найыралы быжыг кижи хөглеп билир боор-дур аа деп кайгап турган мен.

Тамара омак-сергек кижи, ооң алыс шынга болгаш суртаалга ынакшылын кижи көргеш, ала чайгаар өттүнүксей бээр! Ол Иеговага эң-не экини берип турган болгаш, аас-кежиктиг турган. А мен карак чаап, бараалгап чораан болгаш, аас-кежик чок турган мен. Тамараның эки хөөнү болгаш өөрүшкүзү меңээ дыка улуг салдарны чедирген. Иегова бисти өөрүшкүлүг бараалгаарын күзеп турар деп чугула чүүлдү билип каан мен (Ыд. ыр. 99:2).

Тамара ышкаш өөрүшкүлүг болур дизимзе, хөй чүвени өскертир апаар мен деп билдим. Оон салган сорулгамны чедип алыр дээш, кызып эгелээн мен. Баштай суртаалга белеткенип эгелээн мен база, үе-үе болгаш-ла, дузаламчы эгелекчи кылдыр бараалгап турдум. Ооң ачызында суртаалга эмин эрттир дүвүревейн, дидимнени берген мен. Удатпаанда ай санында  дузаламчы эгелекчи кылдыр бараалгай берген мен.

Алыс шынга ынак, Иеговага ак сеткилинден бараалгап турган аңгы-аңгы назы харлыг акы-угбалар-биле эдеришкеш, чуртталгада сорулгаларымны өскертип, Библияны хүннүң-не номчуп эгелээн мен. Суртаал ажылындан ёзулуг өөрүшкүнү ап эгелээш, доктаамал эгелекчи апарган мен. Сөөлгү чылдар дургузунда бир дугаар аас-кежиктиг апарып, чыышка бодумну хостуг кылдыр миннинген мен.

Бир чыл эрткенде, Иеговага болгаш суртаалга ынак, чымчак сеткилдиг Алекс дээр оол-биле таныжып алган мен. Ол үеде Алекс хуралдың дузалакчызы турган, ол ышкаш алды чыл ишти доктаамал эгелекчи кылдыр бараалгап чораан. Оон ыңай ол каш ай ишти суртаалчылар херек черге, Малавиге, бараалгап тургаш, миссионерлер-биле таныжып алган. Олар Алексти Бурганның Чагыргазын бирги черге салыры эргежок чугула деп өөредип каан.

2003 чылда өгленип алгаш, амгы үеге чедир долу бараалгап чоруур бис. Бо чылдар дургузунда дыка хөй чүүлге өөренип, Иегованың элбек йөрээлдерин бодувуска көрген бис.

2009 чылда биске Малай архипелагтың бир ортулуунда Чөөн Тиморга бараалгаарын сүмелээрге, дыка өөрээн бис. Ынчалза-даа иштивисте дүвүреп, коргуп турган бис. Беш ай эрткенде, чурттуң найысылалы Дили хоорайга чедип келген бис.

Чөөн Тимор көңгүс өске делегей ышкаш болган. Аңаа бистер чаа культурага, оларның аъжы-чеминге, дылынга өөренир ужурлуг турган бис. Суртаал үезинде болганчок үжүк-бижик билбес, ядыы-түреңги болгаш базындырыышкындан хилинчектенип чоруур улуска бо-ла таваржыр  турган бис. Кижилер дайын үезинде сагыш сеткилинге-даа, мага-бодунга-даа улуг кемдээшкиннерни алган *.

Чөөн Тиморга бараалгалывыс уттундурбас солун болган! Бир катап 13 харлыг Мария * дээр муңгаргай уругга ужуражы берген мен. Каш чыл бурунгаар ооң авазы чок апарган, а ачазы аңаа ховар ужуражыр турган. Улаштыр канчаар чурттаарын ол билбейн турган. Бир хүн Мария мээң-биле сагыш-сеткилин үлежип тургаш, ыглап эгелээн. Дылын эки билбес болгаш, ооң чүнү чугаалап турарын таптыг билбээн мен. Ынчангаш Марияны деткииринге меңээ Иегова дузалаар кылдыр, мөргээн мен. Оон аңаа Библиядан оожургалдыг шүлүктерни көргүстүм. Элээн каш чыл дургузунда алыс шын Марияның аажы-чаңын, даштыкы овур-хевирин болгаш чуртталгазын канчаар өскертипкенин эскерген мен. Мария ам сугга суктуруп алган, ынчангаш боду библейжи кичээлдерни эрттирип турар. Ам ол хөй ха-дуңмалыг апарган, олар аңаа дыка ынак.

Чөөн Тиморда суртаал ажылын Иегова йөрээп турар. Суртаалчыларның хөй кезии сөөлгү он чылдың дургузунда сугга суктуруп алган-даа болза, амгы үеде олар эгелекчилер, хуралдың удуртукчулары, дузалакчылары бооп бараалгап чоруур. А чамдыктары тус черниң дылынче ном-дептерлерни очулдуруп турар. Оларның Бурган-биле найыралын эскерип, чыыштар үезинде ырлажып турарын дыңнааш, арыннарында хүлүмзүрүгнүң чайынналып турарын көргеш, хей-аъдым көдүрлүр-дүр!

Чөөн Тиморда суртаал ажылы Австралиядан ылгалып турган-даа болза, ол бистиң сеткиливиске аажок кирген. Чамдыкта бичии автобустарга тырлып алгаш, чоруур турган бис. Ооң кадында улус базаардан садып алган ногаа аймаан, кургаткан балык дээн ышкаш чүү-хөөнү ап аар турган. А библейжи кичээлдерни чамдыкта дыка бичии изиг бажыңга эрттирер турган бис, а ооң иштинде дагаалар аай-дедир халчыр турган. Чеже-даа берге болза: «Маңаа турарга, аяныын!» дээш, бо-ла бодаар турган мен.

Мени Иегованың хоойлу-дүрүмнеринге өөредип база элээди үемде деткип чорааны дээш ада-иемге өөрүп четтирер-дир мен. Чугаалар 22:6-да сөстерниң ылап шынныын чуртталгамда көрген мен. Бис Алекс-биле Иеговага бараалгап чоруур боорувуска, авам-ачам бис дээш чоргаарланыр. 2016 чылдан тура бис австралазий салбырның харыылап турар девискээрлерин эргий кезип турар бис.

Ооң мурнунда суртаал ажылын аар чүък деп санап чораанымны ам бодап келгеш, кайгаар-дыр мен. Бурганга бараалгал чокта, чуртталгам ужур-утка чок! Кижи ёзулуг өөрүшкүнү чүгле Иеговага бараалгап тургаш, алыр деп билип каан мен. Алекс-биле 18 чыл кады аас-кежиктиг Иеговага бараалгап чоруур бис. Иегованың дугайында Давидтиң чугаалаан сөстериниң утказын ам-на билип каан мен: «А Сенден хоргадал алыр бүгү улус өөрүп-хөглээр, кезээ мөңгеде байырлаар... Сээң адыңга ынак улус Сеңээ чоргаарланыр» (Ыд. ыр. 5:12).