Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! NOVEMA 2013

Ia ite oe i te aha no nia i te hopii?

Ia ite oe i te aha no nia i te hopii?

NO TOPA noa ’tu ra te tahi taata e moe a‘era to ’na hiroa. Te haamata ra oia i te iriti, ua etaeta roa oia, te tairiiri ra te upoo e te tahi atu vahi o to ’na tino. Mai te peu e ua ite oe e e ma‘i hopii to ’na, e nehenehe oe e haapao atu a tiai ai ia tae atu te tauturu. E hi‘opoa ana‘e te tahi mau tuhaa o teie ma‘i taa-ore-hia e te rahiraa.

Eaha te hopii? E ma‘i te reira i roto i te roro o te tupu taue noa mai. E nehenehe te taata hopii e iriti e pae minuti te maoro. E pinepine e tupu te reira mai tei faataahia ’tu na i te omuaraa o teie tumu parau.

Na te aha e faatupu i te hopii? No te feia hi‘opoa, e tupu te reira ia rahi roa te uira i rotopu i te mau tao‘a tahi ora o te roro. Aita râ i taa-papu-hia ’tura te tumu e tupu ai te reira.

Ia ite au i te taata hopii ia iriti, eaha te rave? Te na ô ra te hoê buka, “E mea maitai a‘e ia tiai ia faaea oia i te iriti e eiaha e haafifi atu. A hi‘o atoa eiaha te tahi mea e haapepe ia ’na e te huti maitai ra anei oia i to ’na aho.” Te parau atoa ra râ tera buka: “E mea tia ia taniuniu i te hoê pereoo ma‘i ia tamau te taata hopii i te iriti hau atu e pae minuti, ia iriti faahou o ’na i muri iho, aore ra ia ore to ’na hiroa e ho‘i mai tau minuti i muri a‘e i te iritiraa hopea.”—The Encyclopedia of the Brain and Brain Disorders.

Ia iriti te taata hopii, e nafea ia tauturu atu? A tuu i te tahi tauihaa mǎrû i raro a‘e i to ’na upoo e a faaatea i te mea oeoe. Ia faaea oia i te iriti, a huri ia ’na i te pae aoao mai ta te hoho‘a i te api 15 e faaite ra.

Ia ho‘i mai te hiroa o te taata hopii, eaha te rave? Na mua, a paraparau atu ia ore oia e haapeapea. I muri iho, a tauturu ia ’na ia tia a aratai atu ai i te tahi vahi no te tamǎrû ia ’na. E huru ê e e taoto te rahiraa i muri a‘e; no te tahi atu, mea ohie roa no ratou ia haa faahou mai na mua ’tu i te taime iritiraa.

E iriti anei te mau taata hopii atoa? Aita. No vetahi taata ma‘i, e moe noa to ratou hiroa no te hoê taime poto ma te ore e topa i raro. No te tahi atu, e maoro rii te reira a naea ’tu ai tau minuti. E hahaere noa paha ïa oia i roto i te piha, e hutihuti i  to ’na ahu a huru ê atu ai to ’na haerea. I muri a‘e, e rohirohi roa ïa oia.

Mai te aha te oraraa o te taata hopii? Parau mau, e rave rahi te haapeapea a mana‘ona‘o ai afea e ihea te tahi iriti e tupu taue noa mai ai. Ia ore ratou e haama, eita paha vetahi e haere i te vahi taata.

E nafea ia tauturu i te taata hopii? A faaitoito ia ’na ia faaite atu i to ’na mana‘o e huru. A faaroo maite atu. A ani atoa ’tu eaha ta ’na e hinaaro ia rave oe ia tupu taue noa te hopii. I te mea e eita te rahiraa e faahoro i te pereoo, peneia‘e e nehenehe oe e haere e tii ia ’na aore ra e hoo mai i ta ’na e hinaaro.

E nafea ia ore te hopii ia tupu pinepine? Ia hepohepo e ia ore te taoto e mâha, e pinepine te hopii i te tupu. Te faaitoito nei ïa te feia hi‘opoa i te taata hopii ia faaetaeta tamau i te tino e ia taoto maitai. No vetahi, eita te hopii e tupu taue noa mai ia rave noa ratou i te mau raau mai ta te taote i faaue.