Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! NOVEMA 2013

 UIUIRAA MANA‘O | CÉLINE GRANOLLERAS

Te faataa ra te hoê taote no te mape i to ’na faaroo

Te faataa ra te hoê taote no te mape i to ’na faaroo

E taote no te ma‘i mape Céline Granolleras i Farani. E 20 matahiti i muri a‘e i to ’na riroraa mai ei taote, ua farii oia e te vai ra te hoê Atua Poiete o te haapao ra ia tatou. Ua ui to te A ara mai na! ia ’na no nia i ta ’na ohipa e to ’na faaroo.

A faatia mai na i to oe tamariiriiraa.

E iva matahiti to ’u a faarue ai to ’u utuafare i Paniora no te haere i Farani. Noa ’tu e Katolika to ’u na metua, ua faaea vau i te tiaturi i te Atua i te 16raa o to ’u matahiti. No ’u, mea ê roa ta te haapaoraa i parau i te tupu ra na te ao. Ia ui mai te tahi, mea nafea tatou i poietehia ’i mai te peu e aita te Atua? E pahono na ïa vau, “Aitâ i tia i te mau aivanaa ia faataa, i te hoê râ mahana, e nehenehe ta ratou.”

Na te aha i turai ia oe ia maiti i te tuhaa o te hi‘opoaraa o te ma‘i mape?

Ua haere au i te tahi fare haapiiraa no te riro ei taote i Montpellier, Farani. Ua faaitoito mai te hoê orometua ia maiti i te tuhaa o te hi‘opoaraa o te mau mape. E ravehia na ïa te mau maimiraa a haapao atoa ’i i te feia ma‘i. Tera iho â ta ’u i hinaaro. I 1990, ua apiti au i te tahi maimiraa no nia i te hoê raau parauhia érythropoïétine (EPO) recombinante. E faaohipahia na te reira ia hamani te mau tao‘a tahi ora o to tatou mau ivi i te mau toropuru ura. I tera mau tau, e maimiraa apî ïa.

No te aha oe i haamata ’i i te feruri i te vai-mau-raa o te Atua?

I 1979, ua haamata Floréal, ta ’u tane, i te haapii i te Bibilia e te mau Ite no Iehova. O vau râ aita roa ïa i anaanatae. Mai to ’u tamariiriiraa, ua fiu roa vau i te haapaoraa. Noa ’tu  râ, ua riro ta ’u tane e na tamarii e toru ei Ite no Iehova e aita i maoro, e mau hoa Ite no Iehova ana‘e to mâua. Ua parau mai Patricia, te tahi hoa Ite, ia tamata i te pure. Ua na ô mai oia, “Aita e peapea e aita te Atua i te ra‘i, mai te peu râ te vai mau ra o ’na, e ite iho â ïa oe i ta ’na e rave.” Tau matahiti i muri a‘e, ua feruri au i te tumu mau o te oraraa. Haamana‘o a‘era vau i ta Patricia i parau mai e ua haamata i te pure.

No te aha oe i feruri ai i te tumu o te oraraa?

A totoahia ’i na fare tahua World Trade Center i New York, ua feruri vau, no te aha te ino i rahi roa ’i? Ua mana‘o atura: ‘Te haafifi nei te mau taata etaeta o te tahi haapaoraa i to tatou ananahi. O vau nei, ua haaatihia e te mau Ite no Iehova e faatupu ra i te hau. E ere ratou i te feia iino, te haapao ra hoi i te Parau a te Atua. Ua mana‘o atura, e mea maitai a‘e paha ia hi‘opoa roa vau i te Bibilia.’ Ua haamata a‘era vau i te taio i te reira o vau ana‘e.

Ei taote, e mea fifi anei no oe ia tiaturi i te hoê Atua Poiete?

Aita. Ua farii na iho â vau e mea faahiahia mau te hamaniraa o to tatou tino. I maere noa na hoi au i te faanahoraa o na mape o te nehenehe e faito i te hamaniraa o te mau toropuru ura i roto i te toto.

No te aha oe i maere ai i te reira?

Ua farii au e na te hoê ana‘e Atua i poiete i tera faanahoraa faahiahia

Na te mau toropuru ura e faahaere i te mata‘i ora i roto i te tino. Ia tahe rahi te toto aore ra ia haere oe i te vahi teitei roa, e iti mai te mata‘i ora i roto i te tino. Ia tupu te reira, e hamani na mape i te EPO. E nehenehe te faito o te EPO e maraa e tausani taime. E tia ïa i te ivi ia hamani atu â i te mau toropuru ura ia rahi atu â te mata‘i ora no te tino. Mea faahiahia mau, e ere anei? Te mea maere râ, i muri a‘e noa ahuru matahiti i to ’u hi‘opoaraa i tera faanahoraa i farii ai au e na te hoê ana‘e Atua i poiete i tera faanahoraa taa ê.

Eaha to oe mana‘o i te Bibilia?

Mea rahi te mau buka tuatapaparaa e tuiroo ta ’u i taio, ua taa oioi râ vau e e mea taa ê te Bibilia. I te mea e e mau parau tano ana‘e to roto, e ere iho â ïa te reira no ǒ mai i te taata. Ua faahiahia roa vau i to Iesu huru. Ua itea ia ’u e e taata mau o ’na. E oto e e oaoa na oia e te vai ra ’toa hoi to ’na mau hoa. I te mea e aita vau i hinaaro e rave i te mau papai a te mau Ite no Iehova, ua faaohipa vau i te tahi atu mau buka no te ite i te pahonoraa i ta ’u mau uiraa.

Eaha ta oe i ite?

Ua faaohipa vau i te mau buka tuatapaparaa . . . Ua farii au e ua tupu mau tera parau tohu i te taime tano

Ua maere roa râ vau a tohu ai te Bibilia i te matahiti o te bapetizoraa o Iesu. Ua faaite-roa-hia hoi ehia maororaa mai te 20raa o te matahiti a faatere ai te arii no Peresia Aretehasaseta e tae atu i te taime e riro ai Iesu ei Mesia. * No ta ’u ohipa, ua matau iho â vau i te rave i te maimiraa. Ua faaohipa vau i te mau buka tuatapaparaa o te haapapu mai i te matahiti i faatere ai Aretehasaseta e te tau o te taviniraa a Iesu. Ua farii au e ua tupu mau tera parau tohu i te taime tano e mea faaurua te Bibilia e te Atua.

^ par. 19 A hi‘o i te tumu parau “E nafea te parau tohu a Daniela e faaite atea ’i i te taeraa mai o te Mesia” i te api 197-199 i roto i te buka Eaha ta te Bibilia e haapii mau ra? piahia e te mau Ite no Iehova.