NO TE FEIA APÎ
11: Itoito i te rave i te ohipa
EAHA TE AURAA?
Eita te taata mea itoito i te rave i te ohipa e ape i te ohipa. Mea au râ na ratou ia rave i te ohipa no ratou iho e no te tauturu ia vetahi ê, noa ˈtu e ere i te hoê ohipa faahiahia.
NO TE AHA MEA FAUFAA?
Aita e ravea, e tia iho â ia amo i te hopoia i roto i te oraraa. No te mea e rave rahi taata o te ore e au i te rave i te ohipa, area no te feia mea itoito i te rave i te ohipa, e riro ïa ei maitai no ratou. —Koheleta 3:13.
“Ua haapii au e ia faaitoito oe i te rave i te ohipa, e haapeu e e oaoa oe ia oe iho. No te mea ua oaoa vau ia ˈu iho, ua au roa ˈtura ïa vau i te rave i te ohipa. Ia haapao maitai oe i ta oe ohipa, e roo maitai ïa to oe.”—Reyon.
ARATAIRAA BIBILIA: “E faufaa noa te noaa ia ravehia te mau huru ohipa rohirohi atoa.”—Maseli 14:23.
EAHA TE NEHENEHE E RAVE?
A faatano i ta outou huru hiˈoraa i te ohipa ma te pee i teie mau aratairaa.
A haapii i te rave maitai i te hoê ohipa. Te rave ra anei outou i ta outou ohipa i te fare, ohipa haapiiraa aore ra toroa, a horoa i to outou puai atoa i roto i te ohipa ta outou e rave ra. Ua roaa anaˈe ia outou ia rave maitai i te tahi ohipa, a imi i te ravea ia haamaitai atu â ma te vitiviti aˈe. Rahi atu â oe i te aravihi, rahi atu â oe i te au i ta oe ohipa.
ARATAIRAA BIBILIA: “Ua ite anei oe i te hoê taata aravihi i ta ˈna ohipa? E tia oia i mua i te mau arii. Eita oia e tia i mua i te taata riirii.”—Maseli 22:29.
Eiaha e manaˈo ia oe noa. Pinepine, ia haapao maitai outou i ta outou hopoia, e faufaahia vetahi ê. Ei hiˈoraa, ia itoito outou i te rave i ta outou ohipa i te fare, e mâmâ mai ïa no te tahi atu mau mero o to outou utuafare.
ARATAIRAA BIBILIA: “E rahi aˈe te oaoa ia horoa ˈtu i te horoahia mai.”—Ohipa 20:35.
A rave hau atu â. Eiaha e rave i tei ani-noa-hia mai ia outou, a tamata râ i te rave hau atu â. Ia na reira outou, na outou e faatere i to outou oraraa. E rave hau atu â outou, eiaha no te mea ua faahepohia outou, no te mea râ na outou i maiti.—Mataio 5:41.
ARATAIRAA BIBILIA: “Ia rave oe i ta ˈu e ani atu eiaha ma te faahepohia, ma te aau tae râ.”—Philemona 14.
Ei feruriraa au noa to outou. E ere te taata itoito i te rave i te ohipa i te mea hupehupe, e ere atoa râ i te hoê taata e rave noa to ˈna rima i te ohipa aita e faaearaa. E feruriraa au noa râ to ratou, mea au hoi na ratou e rave i te ohipa e e faafaaea atoa râ.
ARATAIRAA BIBILIA: “Mea au aˈe hoê apu rima î i te faafaaearaa i e piti apu rima î i te ohipa rohirohi e te aˈuaˈuraa mataˈi.”—Koheleta 4:6.
E au atoa outou . . .
A ARA MAI NA!
E nafea ia faaohipa maitai i to oe taime?
No te faaohipa maitai i to oe taime, a hiˈopoa i to oe oraraa ma te feruri i nia e piti manaˈo. Eaha ïa te reira?
