Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Mati 2014

 TUMU PARAU MATAMUA

E nafea ia faaohipa maitai i to oe taime?

E nafea ia faaohipa maitai i to oe taime?

“Ahiri e taime to ’u!” Ua faahiti pinepine paha oe i tera parau? Te tahi mea tera i ore ai te feia mana e te taata tao‘a i taa ê i tei veve. Eita te hoê a‘e e nehenehe e haapue i te taime. Ia reva te reira, e ore roa e ho‘i faahou mai. Area te feia paari, e haafaufaa ïa ratou i te taime. E nafea? E hi‘o ana‘e e maha ravea tei tauturu e rave rahi ia faaohipa maitai i to ratou taime.

Ravea 1: A faanaho i ta oe ohipa

Na mua te mea faufaa. Teie te faaitoitoraa a te Bibilia: “Ia papu ia outou te mau mea i hau roa i te maitai.” (Philipi 1:10, Te Faufaa Api) A tapaopao i te mau ohipa faufaa aore ra ru e a haamana‘o noa i te mea faufaa a‘e. E ere paha i te hooraa mai i te maa no teie po i te mea ru, e mea faufaa râ. No oe, e mea ru paha ia mataitai i te hoho‘a o ta oe porotarama afata teata au roa ’‘e, e ere râ paha i te mea faufaa roa.

A faaineine na mua. Te na ô ra te Koheleta 10:10: “Te mania ra te auri, e aore i faaoihia te mata ra, ia rahi to te taata haapuai i reira: na te paari râ e faaite mai i te ravea.” Eaha te haapii mai? Mai te taata e faaoi na mua i ta ’na tipi hou a faaohipa ’i i te reira, a faaineine na mua i ta oe ohipa ia hoona to oe taime. A faaore aore ra a faataime i te ohipa faufaa ore mai te mau mea e mâu‘a ’i te taime e e rohirohi ai oe. Mai te peu e ua oti oioi te tahi ohipa, a rave i te tahi atu tei faanaho-a‘ena-hia. Ma te faaineine na mua, e rahi atu â te ohipa e ravehia e e riro ïa oe ei taata tei faaoi i ta ’na tipi.

Eiaha e faateimaha ia oe. Eiaha e taiâ i te patoi i te rave i te mau mea e mâu‘a rahi ai te taime. Mea rahi te ohipa e te mau farereiraa o te nehenehe e haapeapea ’tu e e faaiti i to oe oaoa.

 Ravea 2: Eiaha e haamâu‘a i to oe taime

Te peu e vaiiho no ananahi e te mana‘o papu ore. “O tei hi‘o i te mata‘i ra, e ore oia e ueue i te huero, e o tei haapao i te ata ra, e ore oia e ooti.” (Koheleta 11:4) Eaha te haapii mai? E mâu‘a to oe taime e iti te ohipa i ravehia no te mea te vaiiho noa ra oe i te reira no ananahi. Eita te taata faaapu e tiai i te mahana maitai roa ’‘e no te tanu i te huero maa aore ra no te ooti. E nehenehe atoa te papu ore o te oraraa e tapea mai ia rave i te ohipa. Aore ra e hinaaro paha tatou e haapue i te mau haamaramaramaraa atoa hou a rave ai i te tahi faaotiraa. Parau mau, mea maitai ia rave i te maimiraa e ia feruri no te rave i te faaotiraa faufaa. Te na ô ra hoi te Maseli 14:15: “Te hi‘o maitai ra râ te taata haapao ra i to ’na taahiraa.” Noa ’tu râ, e nehenehe iho â tei ore i mana‘ohia e tupu.—Koheleta 11:6.

Te hinaaro ia ravehia te mau mea atoa ma te tia. Te na ô ra te Iakobo 3:17: “Area te paari no nia maira [aore ra no ǒ mai i te Atua], e mea . . . mǎrû.” Mea au ia hinaaro ia rave maitai i te tahi ohipa! I te tahi râ taime, ua rahi atu ta tatou e titau i te nehenehe e rave. Ohie noa ïa tatou i te faahapa ia tatou e eita te ohipa e ravehia mai tei hinaarohia. Ia haapii te tahi taata i te reo ê, e mea tia ia farii oia e e hape iho â o ’na, e haapiiraa râ ta ’na e huti mai. No te taata e hinaaro ia ravehia te mau mea atoa ma te tia, e riri hanoa o ’na ia hape ta ’na parau. Ma te na reira, eita oia e aravihi mai. Mea au a‘e ia farii e e otia to te taata! Eiaha e haafaufaa roa ia tatou, te na ô ra hoi te Maseli 11:2: “Tei te feia haehaa râ te paari.” E ia hape ana‘e, eiaha e riri!

“Aita oe i aufau mau i te tao‘a e te moni. Ua aufau oe i te reira e to oe taime.”—What to Do Between Birth and Death

 Ravea 3: Ia tano noa te mana‘o e ia oaoa

A rave tano noa i te ohipa e a faafaaea. “Te vahi maâ iti ma te [faa]faaea, e hau ïa i te îraa o na rima e piti ma te rohirohi e te peapea o te manao.” (Koheleta 4:6, Te Bibilia Mo’a V.C.J.S., 1976) No te faaî “na rima e piti,” e pinepine eita vetahi e haapao faahou ia ratou. E rohirohi roa ratou i te rave noa i te ohipa. Area te taata hupehupe, e faaî oia i “na rima e piti” i te faafaaearaa a haamâu‘a noa ’i to ’na taime. Te faaitoito maira te Bibilia ia tano noa to tatou mana‘o: Ia itoito i te rave i te ohipa e ia oaoa i te maitai o te reira, “e horoaraa [aore ra ô] ïa no ô mai i te Atua.”—Koheleta 5:19, V.C.J.S.

A taoto maitai. Ua na ô te tahi taata papai Bibilia, “e tiraha vau i raro ma te ora, e e taoto.” (Salamo 4:8) E maitai mai to ratou tino, huru e feruriraa ia taoto te rahiraa taata paari hau atu e vau hora i te po. Mea hoona mau ïa ia taoto no te mea e tauturu mai te reira ia haapao maitai a rave ai i te tahi ohipa, ia haamana‘o maitai e ia haapii. Ia ore, e fifi tatou i te taa i te tahi haapiiraa e peneia‘e, e nehenehe tatou e hape, e riri e e faatupu i te hoê ati.

A oaoa noa i te noaa mai. “E mea maitai te rave i te mea i noaa ra, i te auau i te mau mea atoa i hinaarohia.” (Koheleta 6:9) Eaha te mana‘o faufaa? Eita te taata e faaite i te paari e vaiiho i te mau hinaaro ia faatere i to ’na oraraa. Hau roa ’tu â, e mea tano ore ana‘e te reira. Eita atoa o ’na e vare i te mau poroi faatianiani aore ra e tarahu hanoa. E oaoa noa râ o ’na i te noaa mai ia ’na.

 Ravea 4: A haapao maitai i ta oe e haafaufaa

A hi‘opoa i tei haapiihia ’tu. Ia au i tei haapiihia ’tu e faaoti ai te taata taitahi i te mea maitai, faufaa e hoona no ’na. Ia tano râ taua mau haapiiraa ra e maitai ai to oe oraraa. Na te reira hoi e tauturu atu ia faaoti eaha te haafaufaa a faaohipa maitai atu ai i to oe taime i tera e tera mahana. Ihea e itehia ’i tera mau haapiiraa maitatai? E rave rahi tei hi‘opoa i te Bibilia e tei farii i te paari hau ê e vai ra i roto.—Maseli 2:6, 7.

Te here te mea faufaa roa ’‘e. Ia au i te Kolosa 3:14, o te here te “tatua nehenehe roa.” Eita tatou e oaoa aore ana‘e e here, i roto iho â râ i te utuafare. E pinepine te taata o te ore e haapao i te reira i te tapi i te tao‘a aore ra i te toroa a ore atu ai e ite i te oaoa mau. No reira te Bibilia e faaite ai i te faufaa rahi o te here a faahiti ai i tera huru maitai tau hanere taime.—Korinetia 1, 13:1-3; Ioane 1, 4:8.

A faaherehere i te taime no te haapii o vai te Atua. Ei utuutu ma‘i, e ohipa aufau-maitai-hia, e hoa, e vahine î i te here e e piti tamarii ta Geoff. Noa ’tu râ, i ta ’na vahi raveraa ohipa, e ite noa o ’na i te taata e mauiui e e pohe. Ua uiui o ’na: “Mai tera noa anei te oraraa o te taata?” I te tahi mahana, ua taio oia i te tahi mau papai Bibilia piahia e te mau Ite no Iehova e ua ite i te pahonoraa papu i ta ’na mau uiraa.

Ua faataa Geoff i ta ’na i haapii i ta ’na vahine e tamarii. Ua ite te utuafare i te oaoa a haapii ai i te Bibilia e ua nehenehe atura e faaohipa maitai i to ratou taime. Maoti te haapiiraa Bibilia, te tiaturi atoa nei ratou e ora e a muri noa ’tu i roto i te hoê ao aore ohipa faufaa ore e e mauiui faahou.—Apokalupo 21:3, 4.

Te haamana‘o maira tei tupu no Geoff i ta Iesu Mesia mau parau a na ô ai: “O tei faaroo â e ua haapao i te parau a te Atua, o ratou tei maitai.” (Luka 11:28) E faaherehere anei oe i te taime no te haapii o vai te Atua? Mai te peu e e, ia papu ia oe aita ’tu ohipa e nehenehe e horoa ’tu i te paari e ite ai oe i te faaohipa maitai i te taime eiaha noa no te hoê mahana, no te toea râ o to oe oraraa.