“NE MANAVASE au ki te vau ki konei,” ko muna a Allen. * “Ne seki iloa ne au me ka isi ne oku taugasoa io me fia fai taugasoa mai a tino ki a au.” Ko fakamasani faka‵lei atu a Allen ki se fakapotopotoga fou telā kāti toeitiiti ko 900 maila te ‵mao (sili atu i te 1,400 km) te ‵mao mai tena fa‵kai.

Kafai ko oti ne fanatu koe ki se isi fakapotopotoga, e mafai foki o manavase koe. Se a te mea e mafai o fesoasoani atu ke fakamasani faka‵lei koe ki ei? Ne a au mea e mafai o fai māfai ko gasolo aka o faigata te ‵fuliga i lō te mea ne fakamoemoe koe ki ei? I te suā feitu, kafai e se fanatu koe ki se isi koga, e fakafaigofie aka pefea ne koe a te ‵fuliga mō tino ‵fou?

Mafaufau ki te fakaakoakoga tenei: Kafai e toe fakama‵siki a lakau ki se isi koga, e masani o faigata ki a latou. I te taimi e unu ei se lakau mai te laukele, e masani o ‵motu a te ukega o ana aka ko te mea ke faigofie o avatu ki te suā koga. I te taimi e toe ‵toki ei, e ‵tau o kamata fakavave o ‵somo aka ana aka ‵fou. E penā foki loa, a te fanatu ki se isi fakapotopotoga e mafai o faigata ki a koe. I tau fakapotopotoga mua, kāti ne kamata o ‵somo aka ou “aka” i te taimi ne ati aka ei ne koe a va fakataugasoa ‵gali kae kamata o fai a fakatokaga masani i te feitu faka-te-agaga. Nei la, ko ‵tau o ‵somo a aka ‵fou ko te mea ke olaola ‵lei i se fakanofonofoga fou. Se a te mea ka fesoasoani atu ke fai koe penā? Ko te fakagalue aka o akoakoga fakavae i te Tusi Tapu. Ke na mafau‵fau tatou ki nisi mea.

A te tino telā e faitau faeloa ki te Muna a te Atua “e pelā mo ne lakau e ola i tafa o se vaitafe, e ‵fua mai i taimi tonu o te taukai, e se mage‵mage olotou lau. E manuia foki i mea katoa e fai ne latou.”—Sala. 1:1-3.

E pelā eiloa mo se lakau telā e ‵tau o fakasiusiu faeloa ki vai ke tumau i te ola ‵lei, e ‵tau o kai faeloa se Kelisiano ki te Muna a te Atua ko te mea ke tumau i te malosi i te feitu faka-te-agaga. Tela la, ke tumau i te faitau ki te Tusi Tapu i aso katoa kae ke ‵kau atu faeloa ki fakatasiga a te fakapotopotoga. Fakatumau au faifaiga ‵lei ki te tapuakiga a kāiga mo sukesukega totino. So se mea ne manakogina ne koe i te feitu faka-te-agaga i te koga muamua ne nofo koe i ei, ka manakogina foki ne koe i tou koga fou tenei.

“Fesoasoani atu ki nisi tino, kae ka fesoasoani mai foki a tino ki a koe.”—Faata. 11:25.

Ka maua te malosi kae masani vave māfai e kau katoatoa atu koe ki te galuega talai. “A te mea ne fesoasoani malosi mai ki a māua mo taku avaga ko te paenia lagolago i te taimi eiloa ne oko atu māua ki te ma fakapotopotoga fou,” ko muna a Kevin, se toeaina Kelisiano. “Ne iloa fakavave ei ne māua a taina, paenia, mo te koga talai.” A Roger, telā ne fanatu ki se koga e sili atu i te 1,000 maila (silia atu i te 1,600 km) te ‵mao mai te koga ne nofo ei a ia, ne fai mai: “A te ‵toe auala ‵lei ke fakamasani ki se fakapotopotoga fou ko te fanatu ‵soko i te galuega talai. Ke fakailoa atu foki ki toeaina me e mafai o fesoasoani atu koe i so se auala, kāti i te ‵fuluga o te Fale Tapuaki, tou toka o fai se tōfiga mō se tino, io me ofo atu ke ave ne koe se tino ki fakatasiga. Kafai e lavea ne taina mo tuagane se tino fou mo se uiga loto fia fesoasoani, ka faigofie atu ke fai taugasoa mo latou.”

“E ‵tau mo koutou o ‵tala aka otou loto ke ma‵tala ‵lei.”—2 Koli. 6:13.

‵Tala atu tou loto ke fakaasi atu te alofa fakataina. Mai tua o te oloatuga o Melissa mo tena kāiga ki se fakapotopotoga fou, ne ‵saga malosi atu latou ki te faiga o taugasoa ‵fou. “Ne sau‵tala matou mo taina i te Fale Tapuaki mai mua kae mai tua foki o fakatasiga,” ko  muna a tou fafine. “Ne maua ei ne au te taimi ke sau‵tala faka‵lei i lō te fakatalofa atu fua.” Ne fesoasoani atu foki te mea tenei ki te kāiga ke iloa fakavave ne latou a igoa ‵fou. E se gata i ei, ne fakalauefa atu olotou loto mai te fakaasi atu o te uiga talimalo, telā ne fakamalosi aka ei a fesokotakiga ‵fou fakataugasoa. “Ne fakatau fesuiaki omotou napa telefoni,” ne toe fai mai tou fafine, “ko te mea ke mafai o fesokotaki sāle kae ke aofia foki i mea faka-te-agaga mo nisi fakatokaga.”

Kafai ko to faigata ki a koe a te manatu ke fetaui mo tino ‵fou, e mafai o kamata malielie koe i nai tamā auala. E pelā mo te fakamisikata atu—faitalia me e se manako koe o fai penā i te kamataga. Ka tosina atu a nisi tino ki a koe e auala i se fakamisikata. A te ‵tonuga loa, “a tino mata kata‵kata e fai ne ia koe ke fiafia.” (Faata. 15:30) “Au se tino ma ‵ki,” ko muna a Rachel, telā ne fanatu ki se koga ‵mao ‵ki mai te koga ne tupu aka ei tou fafine. “I nisi taimi ne ‵tau o faimalo ne au a au eiloa ke faipati atu ki taina mo tuagane i taku fakapotopotoga fou. E onoono au ki se tino e sagasaga ki lalo i te Fale Tapuaki, kae e se faipati ki so se tino. E mafai eiloa o mata ma te tino e pelā mo au.” Kaia e se fai ei se fakamoemoega ke sau‵tala mo se tino fou mai mua kae mai tua ifo foki o fakatasiga katoa?

I te suā feitu, e mafai o fiafia koe ke fetaui mo tino ‵fou i nai vaiaso muamua. Kae e mafai o galo atu te “fou” tenā māfai ko tai leva koe i ei. I te tulaga tenā, e ‵tau eiloa o taumafai malosi koe ke fakatumau te faiga o taugasoa ‵fou.

E leva atu te taimi mō nisi lakau ke ‵mautakitaki olotou aka i se koga fou. E penā foki loa, e se ‵pau a te vave mō tino katoa ke fakamasani faka‵lei ki se koga fou. Kafai ko tai leva te taimi ne fanatu koe ki se koga fou kae koi faigata eiloa ke fakamasani faka‵lei, a te fakagalue aka o akoakoga fakavae konei i te Tusi Tapu e mafai o fesoasoani:

“Ke mo a ma ‵fiu tatou i te faiga o mea ‵lei, me ka tau eiloa ne tatou a mea ‵lei i te taimi tonu māfai e se ‵fiu tatou.”—Kala. 6:9.

Ke fakaaoga a taimi e uke atu ke fakamasani faka‵lei i lō te mea ne fakamoemoe muamua koe ki ei. E pelā mo misionale kolā ne akoakogina i Kiliata ke ‵nofo i olotou tōfiga i nisi fenua mō nai tausaga a koi tuai o ‵foki atu latou o asi ki olotou fenua ‵tonu. A te faiga penā e fesoasoani atu ke maua ne latou se fesokotakiga pili mo taina i te fenua fou kae ke fakamasani faka‵lei ki se tuu ‵kese.

A Alejandro, telā ne fanatu sāle ki koga kese‵kese i nai taimi, e iloa ne ia me e se ‵tau o fakavave te fakamasani faka‵lei ki se koga fou. E fai mai tou tagata: “Mai tua o te ‵toe taimi ne olo atu ei māua ki se isi koga, ne fai mai taku avaga, ‘Oku taugasoa katoa ko ‵nofo atu loa i te fakapotopotoga mua!’” Ne fakamasaua atu tou tagata ki tou fafine me konā foki loa ana pati i se lua tausaga mai mua atu—te taimi fakamuli ne olo atu ei lāua ki se isi koga. Kae i tausaga e lua konā, ne saga malosi atu tou fafine ki nisi tino mo tino ‵fou kae ne fai latou mo ana taugasoa ‵pili.

“Sa ti fesili sāle penei, ‘Ai a e ‵lei atu ei te olaga i aso mua i lō aso nei?’ A te mea tenā sē se fesili a se tagata poto.”—Fai. 7:10.

Ke mo a ma fakatusatusa ne koe tau fakapotopotoga fou ki tau fakapotopotoga mua. E pelā mo taina i tau fakapotopotoga fou e mafai o se ti gutu fai‵pati io me gutu fai‵pati atu i lō te mea ne masani mua koe ki ei. Saga tonu atu ki olotou uiga ‵lei, e pelā eiloa mo te mea e manako koe ke ‵saga tonu mai foki latou ki ou uiga ‵lei. Ne iloa ne nisi tino ‵fou mo te ōfo me i te olo atu ki se isi koga ne faimalo ei latou ke fesili ifo penei, ‘E mata, e fiafia tonu au “ki te kautaina kātoa”?’—1 Pe. 2:17.

 “Ke tumau i te fakamolemole atu, kae ka tuku mai ki a koutou.”—Luka 11:9.

Tumau i te ‵talo atu mō se fesoasoani. “Sa fa‵ki tokotasi fua ne koe,” ko muna a David, telā se toeaina. “E uke ‵ki a mea e mafai fua ne tatou o fai fakatasi mo te fesoasoani o Ieova. ‵Talo atu e uiga ki ei!” A Rachel, telā ne taku atu muamua, ne lotomalie eiloa ki te manatu tenā. “Kafai e mafau‵fau māua mo taku avaga me e seai se lagonaga pili ki te fakapotopotoga,” ko muna a tou fafine, “e ‵talo fakapito atu eiloa māua ki a Ieova, ‘Fakamolemole fakailoa mai māfai e isi se mea ne fai ne māua telā e faigata ki tino ke fakapili‵pili mai ki a māua.’ Ko taumafai ei māua o fakamāumāu taimi mo taina mo tuagane.”

Mātua, kafai e faigata ki otou tama‵liki ke fakamasani faka‵lei, fakaaoga a taimi ke ‵talo fakatasi mo latou e uiga ki te mataupu tenei. Fesoasoani ki a latou ke fai a taugasoa ‵fou mai te fakatokaga o avanoaga mō maopoopoga fakamalosi loto.

Ne a mea e mafai o fai ne koe ke fesoasoani atu ki tino ‵fou kolā ko ‵kau atu ki tau fakapotopotoga? Taumafai ke fai mo taugasoa tonu ki a latou mai te kamataga. Ke fai penā, taumafai ke fakaataata i tou mafaufau a mea e manako koe ki ei māfai koe se tino fou kae ke fai atu ki a koe a mea konā. (Mata. 7:12) E mata, e mafai o ‵kau atu a tino ‵fou ki a koutou i tapuakiga a kāiga io me mō te polokalame i masina katoa ko te Leo Fakasalalau o te JW? E mafai o ‵kami ne koe latou ke ga‵lue tasi koutou i te galuega talai? Kafai e ‵kai fakatasi koutou, ka masaua eiloa ne latou tou uiga talimalo. Ne a nisi mea aoga e mafai o fesoasoani atu ei koe ki tino ‵fou?

“I te motou okoatuga ki te motou fakapotopotoga fou,” ko muna a Carlos, “ne tuku mai ne se tuagane se fakasologa o sitoa kolā e tai ‵togi mā‵ma a mea i ei. Ne fesoasoani malosi mai te mea tenā.” A latou kolā e o‵mai mai i se koga telā e ‵kese a te ‵tau i ei, e mafai o fia‵fia ke iloa a te auala ke fai a gatu i te otou tau ‵vela, tau ‵moko, io me ‵to vaiua. E mafai foki o fesoasoani atu koe ke momea aka te lotou ma‵goi i te lotou galuega talai mai te fai atu o tala mua o te fa‵kai io me mai te fakamatala atu o talitonuga fakalotu i konā.

A Allen, telā ne taku atu i te kamataga, ko nofo ki se tausaga tupu tena leva i tena fakapotopotoga fou. Ne fai mai a ia: “Ne ‵tau o faimalo ne au a au eiloa i te kamataga ke iloa ‵lei ne au a taina mo tuagane. Kae nei la, ko silia atu foki latou i te fai pelā me se kāiga, kae ko fiafia foki au.” Ne iloa ne Allen me mai te fanatu ki se isi koga e se ‵galo atu ei so se taugasoa o ia. I lō te fai penā, ne maua ne ia a taugasoa ‵fou, kolā ka fai eiloa mo taugasoa tumau i te olaga.