Te Tusi a Luka 11:1-54

  • Te auala ke ‵talo atu (1-13)

    • Te ‵talo fakaakoako (2-4)

  • Ne afuli a temoni e auala i te matikao lima o te Atua (14-23)

  • Ko foki mai te agaga masei (24-26)

  • Te fiafia tonu (27, 28)

  • Te fakailoga o Iona (29-32)

  • Moli o te foitino (33-36)

  • Kalofa eiloa i tino lotu ‵loi (37-54)

11  Ne nofo a Iesu i se koga o ‵talo, kae i tena otiga, ne fai atu tena soko e tokotasi ki a ia: “Te Aliki, akoako mai ki a matou te faiga o te ‵talo, e pelā eiloa mo te akoakoga ne Ioane o ana soko.”  Tenā ne fai atu ei a ia ki a latou: “I so se taimi e ‵talo ei koutou, fai atu penei: ‘Te Tamana, ke tapu tou igoa.+ Ke oko mai tou Malo.+  Tuku mai omotou meakai i aso takitasi e ‵tusa mo mea e manakogina i aso takitasi.+  Kae fakamagalo mai omotou agasala,+ me e fakamagalo foki ne matou a tino katoa kolā e agasala* mai ki a matou;+ kae sa takitakigina matou ki se tofotofoga.’”+  Tenā ne fai atu ei a ia ki a latou: “Kāti e isi se tino i a koutou e isi sena taugasoa kae e fanatu koe ki a ia i te valuapo kae fai atu ki ei, ‘Taugasoa, ke kaitalafu aka ne au ne falaoa e tolu,  me isi soku taugasoa ne fatoa oko mai i se malaga ‵mao kae e seai ne aku mea ke tuku atu ki a ia.’  Kae ne tali atu te tino i loto i te fale, ‘Sa fakalavelave mai ki a au. Ko oti ne ‵loka te mataloa, kae ko ‵moe matou mo aku tama‵liki fo‵liki. E se mafai ne au o tu ki luga o tuku atu ki a koe se mea.’  Au e fai atu ki a koutou, e tiga eiloa e se tu a ia ki luga o tuku atu se mea ki a ia ona ko lāua e taugasoa, kae ona ko tena loto toa o kinau atu faeloa+ ka tu eiloa a te tagata tenā ki luga o tuku atu a mea e manako a ia ki ei.  Au e fai atu ki a koutou, tumau i te fakamolemole atu,+ kae ka tuku mai ki a koutou; tumau i te salasala atu, kae ka maua ne koutou; tumau i te tukituki atu, kae ka ‵tala mai ki a koutou.+ 10  Me i so se tino e fakamolemole atu ka tuku atu ki a ia,+ kae ko so se tino e salasala atu, ka maua ne ia, kae ko so se tino e tukituki atu, ka ‵tala atu ki a ia. 11  E tonu, ko oi te tamana i a koutou e fakamolemole atu tena tama ki se ika, kae tuku atu ki a ia se gata i lō te ika?+ 12  Io me e fakamolemole atu foki ki se fuamoa, kae tuku atu ki ei se akalava? 13  Tela la, kafai a koutou ne tino ma‵sei, kae e iloa ne koutou o tuku atu a meaalofa ‵lei ki otou tama‵liki, e sili fakafia atu la te fia tuku atu ne te Tamana telā i te lagi a te agaga tapu ki tino kolā e fakamolemole atu ki a ia!”+ 14  Fakamuli ifo, ne afuli kea‵tea ne ia se temoni gūgū.+ I te fanoga kea‵tea o te temoni, faipati ei te tagata gūgū, kae ne ofo i ei te vaitino.+ 15  Kae ne fai mai a nisi tino o latou: “E afuli kea‵tea ne ia a temoni e auala i a Pelesepulo,* te pule o temoni.”+ 16  Kae ko nisi tino, ne tofotofo ne latou a ia mai i te ‵sala atu ki se fakailoga+ ke fai ne ia mai te lagi. 17  Ne iloa ne ia olotou mafaufauga,+ fai atu ei ki a latou: “So se malo e ‵nofo mavae‵vae e se mafai o tumau, kae ko te kāiga telā e ‵nofo mavae‵vae e malepelepe. 18  I se auala tai ‵pau, kafai e mavaevae foki a Satani i a ia eiloa, e mafai la pefea o tumau tena malo? Me e fai mai koutou me e afuli ne au a temoni e auala i a Pelesepulo. 19  Kafai e afuli kea‵tea ne au a temoni e auala i a Pelesepulo, i o oi la te malosi e afuli ei kea‵tea ne otou tama a temoni? Tenei te pogai ka fai ei latou mo fai otou famasino. 20  Kae kafai e afuli ne au a temoni e auala i te matikao lima o te Atua,+ ko tena uiga ko oti ne oko mai te Malo o te Atua ki a koutou.+ 21  Kafai e puipui ne se tagata mafi telā e toka ‵lei ana meatau, a tena palesi, ka se mafai eiloa o ‵galo ana mea. 22  Kae kafai e taua atu se tagata telā e mafi atu i a ia kae fakatakavale ne ia a ia, e puke ne te tagata tenā ana meatau katoa kolā e faka‵na a ia ki ei, kae tufatufa atu ne ia a kope kolā ne puke ne ia mai i a ia. 23  So se tino e se kau mai ki a au e ‵teke mai ki a au, kae ko so se tino e se ga‵lue fakatasi māua o fakamaopoopo mai a tino e faka‵kalo ne ia a tino.+ 24  “Kafai e fano ki tua se agaga masei mai se tagata, e ui atu a ia i loto i koga e seai ne vai i ei o salasala se koga mo ana malōlō, kae kafai e se maua, ko fai aka ei a ia penei, ‘Au ka toe foki ki toku fale telā ne vau au i ei.’+ 25  Kae i tena okoatuga ki ei ne maua atu ne ia me ko ‵ma kae ne teu fakagaligali. 26  Tenā ne toe fano ei a ia kae puke mai a nisi agaga e tokofitu kolā e ma‵sei atu i a ia, kae i te lotou uluatuga ki loto i te fale, ‵nofo ei latou i konā. Ka sili atu la te masei o te ikuga o te tagata tenā i lō te taimi muamua.” 27  Kae koi fai atu ne ia a pati konei ne kalaga mai se fafine mai te vaitino kae fai atu ki a ia: “E fiafia te moegatama telā ne tauave ne ia koe mo ū kolā ne faū ei koe!”+ 28  Kae ne fai atu a Iesu: “Ikai, e se penā, kae e fia‵fia a latou kolā e lagona ne latou te muna a te Atua kae tausi ki ei!”+ 29  I te taimi ne mumu fakatasi ei te vaitino, fai atu ei a ia: “A te kautama tenei se kautama matagā; me e ‵sala faeloa latou ki se fakailoga, kae ka seai eiloa se fakailoga e tuku atu ki a latou kae na ko te fakailoga o Iona.+ 30  E pelā mo Iona+ ne fai mo fakailoga ki tino Nineva, ka penā foki te Tama a te tagata ka fai mo fakailoga ki te kautama tenei. 31  Ka toe fakatu aka te tupu fafine mai saute+ i te fakamasinoga fakatasi mo tino o te kautama tenei kae ka taku fakamasei i ei a latou, me ne vau a ia mai koga ‵mao o te lalolagi ke lagona ne ia te poto o Solomona. Kae kiloke! e isi se tino i konei e sili atu i a Solomona.+ 32  Ka toe faka‵tu aka a tino Nineva i te fakamasinoga fakatasi mo te kautama tenei kae ka taku fakamasei i ei a latou, me ne sala‵mo latou i te talaiga a Iona.+ Kae kiloke! e isi se tino i konei e sili atu i a Iona. 33  Kafai e oti ne faka‵ka ne se tino se moli, e se tuku ne ia i se koga sē lavea io me mai lalo i se kete,* kae e tuku atu ki luga i te tugamoli,+ ko te mea ke lavea ne tino kolā e ulu mai ki loto a te mainaga. 34  A te moli o te foitino ko ou mata. Kafai e ‵saga tonu atu* ou mata, ka maina* foki tou foitino kātoa, kae kafai e kaisanosano,* e pouli foki tou foitino.+ 35  Tela la, ke matapulapula koe, ko te mea ke se pouli a te mainaga telā i loto i a koe. 36  Kafai e maina tou foitino kātoa kae e seai se vaega i ei e pouli, ka maina atu eiloa e pelā me se moli telā e maina atu ki a koe.” 37  I te otiga o ana pati konei, ‵kami ei a ia ne se Falesaio ke ‵kai fakatasi lāua. Tenā ne fano ei a ia ki loto kae sagasaga i te taipola. 38  Ne ofo te Falesaio i te laveaga ne ia me ne seki ‵fulu muamua ana lima mai mua o te ‵kaiga.+ 39  Kae ne fai atu te Aliki ki a ia: “A koutou e Falesaio, e ‵fulu ne koutou te tua o te ipu mo te tifa, kae i loto i a koutou e ‵fonu i te kaimanako mo mea ma‵sei.+ 40  Tino va‵lea! A te tino telā ne faite ne ia te tua o te ipu ne faite foki ne ia te koga i loto, e tonu au? 41  Kae tuku atu a mea i otou loto mo fai otou meaalofa,* kae kiloke! ka ‵ma foki a mea katoa e uiga ki a koutou. 42  Kae kalofa eiloa i a koutou e Falesaio, me e tuku atu ne koutou te tasi-vae-sefulu o fuaga o te mili mo te pekano mo laulakau kaina* katoa i te fatoaga,+ kae e manatu mā‵ma koutou ki te fai mea tonu mo te alofa o te Atua! E ‵tau eiloa mo koutou o fai a mea konei, kae ke mo a ma tiakina ne koutou a nisi mea konā.+ 43  Kalofa eiloa i a koutou e Falesaio, me e fia saga‵saga koutou i nofoga tafa ki mua i sunako kae ke fakatalofa atu a tino ki a koutou i fale maketi!+ 44  Kalofa eiloa i a koutou, me i a koutou e ‵pau eiloa mo tanuga kolā e se mafai o lavea faka‵lei,+ e sa‵sale a tino i luga i ei e aunoa mo te iloa ne latou!” 45  Ne tali atu se tagata e poto i te Tulafono kae fai atu ki a ia: “Te Faiakoga, ko fakalogo‵mae foki ne koe matou i au pati konā.” 46  Fai atu ei a Iesu ki a ia: “Kalofa foki eiloa i a koutou kolā e ‵poto i te Tulafono, me e fakaeke ne koutou ki luga i tino a amoga kolā e faigata o amo, kae e se fakapatele atu eiloa se matikao e tasi o koutou ki amoga konā!+ 47  “Kalofa eiloa i a koutou, me e faite ne koutou a tanuga o pelofeta, kolā ne tamate ne otou tupuga!+ 48  A koutou ko molimau ki mea kolā ne fai ne otou tupuga kae ne talia foki ne koutou, me ne tamate ne latou a pelofeta+ kae e faite ne koutou olotou tanuga. 49  Tenā foki te pogai ne fai mai ei te Atua i tena poto: ‘Ka uga atu ne au a pelofeta mo apositolo ki a latou, kae ka fakasaua kae tamate ne latou a nisi tino o latou, 50  ko te mea ko toto o pelofeta katoa kolā ne ma‵ligi talu mai te taimi ne fakavae* ei te lalolagi, ke i luga i te kautama tenei,+ 51  mai i te toto o Apelu+ ki te toto o Sakalia telā ne tamate i te va o te fatafaitaulaga mo te faletapu.+ E tonu, au e fai atu ki a koutou, ko i luga i te kautama tenei olotou toto. 52  “Kalofa eiloa i a koutou kolā e ‵poto i te Tulafono, me ne ave kea‵tea ne koutou te kī o te malamalama. E se ulu atu koutou ki loto, kae e taofi foki ne koutou a latou kolā e ulu ki loto i ei!”+ 53  Tela la, i tena fanoga ki tua mai konā, kamata ei o fakalavelave malosi atu ki a ia a failautusi mo Falesaio kae fai atu olotou fesili e uke e uiga ki nisi mea, 54  ko te mea ke lamalama ne latou a ia i ana pati e fai.+

Fakamatalaga mai lalo

Eleni, “kaitalafu.”
Se igoa e fakasino atu ki a Satani.
Io me “se kete e fua ki ei a mea.”
Io me “manino.” Eleni, “faigofie.”
Io me “‵fonu i te mainaga.”
Eleni, “masei; matagā.”
Io me “meaalofa ki tino ma‵tiva.” Onoono ki te FP.
Io me “nisi vesiapolo.”
A te mea tenei e fakasino ki tama‵liki a Atamu mo Eva.