Kasi Ciuta Ndiyo Wakwambiska Masuzgo?

APO mwana mwanakazi wa Marion wakapwetekeka wongo, Marion wakacita cinthu ico taŵanandi tingacita. * Wakaromba kwa Ciuta kuti wamovwire. Marion wakuti: “Panyengo iyo, nkhahangayika comene kuluska nyengo zose.” Pamanyuma pake, mwana wake nthenda yikazganga, ndipo Marion wakamba kukayikira Ciuta. Wakafumba kuti: “Cifukwa wuli vinthu ivi vikucitika?” Wakapulikiska yayi ico Ciuta wacitemwa mweneuyo wakupwelelera ŵanthu wakamutayira.

Ni Marion pera yayi uyo vinthu vyantheura vikumuwira. Ŵanthu ŵanandi comene pa caru cose nyengo zinyake ŵakuwona ngati Ciuta waŵataya para ŵakusuzgika. Apo muzukuru wake wakakomeka, Lisa wakati: “Nicali kujifumba ‘ico CIUTA wakuzomelezgera kuti masuzgo ghacitikenge.’ Nicali na cipulikano mwa Ciuta, kweni nga umo cikaŵira kale yayi.” Mwakuyana waka, apo soka likawira kamwana kake kasepuka, mwanakazi munyake wakati: “Ciuta wakanipembuzga yayi pa ivyo vikacitika. Wandanilengere lusungu na pacoko wuwo.” Wakasazgirapo kuti: “Ningamugowokera yayi Ciuta.”

Ŵanyake ŵakwamba kumukwiyira Ciuta para ŵakuwona umo caru ciliri. Ŵakuwona kuti vyaru vili mu ukavu na njara yakofya, ŵanyake ŵakusoŵa cakucita cifukwa ca nkhondo, ŵana ŵanandi mbalanda cifukwa ca matenda gha Ezi (AIDS), ndipo ŵanthu ŵanandi ŵakusuzgika na matenda ghanyake. Pakuwona masuzgo agha na ghanyake agho ghalipo, ŵanandi ŵakuti Ciuta ndiyo wali na mulandu cifukwa wakucitapo kanthu yayi.

Kweni unenesko ngwakuti Ciuta walije mulandu pa masuzgo agho ghakuwira ŵanthu. Nakuti pali vifukwa vyakukwana ivyo tikukholwera kuti sonosono apa, Ciuta wamazgenge masuzgo agho ghakuwira ŵanthu. Tikumupemphani kuti muŵazge nkhani yakulondezgapo, ndipo muwonenge kuti Ciuta wakutighanaghanira nadi.

[Mazgu ghamusi]