Ŵawukirano Kasi Mukuya Pantazi Mwauzimu?

“NANGAULI nkarutanga ku maungano gha Cikristu, nkaŵavya khumbo la kuteŵetera Yehova,” wakayowoya nteura Hideo, uku wakukumbukira nyengo iyo wakambira waka sukulu ya sekondale. “Nkukumbukaso kuti nkaŵa wakumanyikwa comene na ŵantu awo nkasambiranga nawo sukulu cifukwa nkendanga mu msewu mwakujitemwa nga ni muntu wakuzirwa na cibwezi cane. Nkaŵavya vilato vyakufikapo nanga ni khumbo lakuti niye pantazi mwauzimu.” Nga ni Hideo, ŵawukirano ŵanandi ŵakuyingayinga waka, ŵalije khumbo lakuti ŵacite vintu vyakuzirwa panji kuya pantazi.

Usange ndimwe muwukirano, mukukondwa na maseŵero panji ivyo mukutemwa. Kweni pakuyowoya za vintu vyauzimu, mungakondwa navyo cara nga ni umo mukukondwera na maseŵero. Kasi ncamacitiko kukondwa na vintu vyauzimu? Aghanaghanirani mazgu agha gha wamasalmo: ‘Vikumbusko vya Yehova ni vyakukhora, muzereza vikumuzgora wamahara. . . . Langulo la Yehova ndakutowa, likungweruska maso.’ (Salmo 19:7, 8) Mazgu gha Ciuta ghangawovwira “muzereza” kuti wacitenge vintu mwamahara, ‘kungweruska maso ghake.’ Nadi pano, mungaŵa na cimwemwe cikuru na vintu vyauzimu. Kweni, kasi ncici ico cikukhumbikwa kuti mucitenge nteura? Kasi mungamba wuli?

Iŵani na Khumbo la Kuteŵetera Ciuta

Cakudanga, mukwenera kuŵa na khumbo. Ghanaghanani za Themba liwukirano la Yuda, Yosiya. Apo buku la marango gha Yehova likasangika mu tempele, Yosiya wakalangura kuti liŵazgike, ndipo wakati wapulika wakakhwaskika comene. Nga ncakufumapo cake, ‘Yosiya wakafumyamo unyankasi wose mu caru cose ca Israyeli.’ (2 Midauko 34:14-21, 33) Kuŵazgika kwa Mazgu gha Ciuta kukaciska Yosiya kucita vinandi na kurutiska pantazi kusopa kwaunenesko.

Namwe mungaŵa na khumbo la kuteŵetera Yehova usange mukuŵazga Baibolo na kuranguruka pa ivyo mwaŵazga nyengo zose. Ici ndico cikaciska Hideo. Wakamba kucezga comene na mupayiniya, muteŵeti wanyengo zose wa Ŵakaboni ŵa Yehova. Mupayiniya uyo wakaŵa musambiri wakulimbikira wa Baibolo ndipo wakagwiriskiranga ncito visambizgo vya Baibolo mu umoyo wake. Cifukwa ca kukhozgeka na ciyerezgero ciweme ca mupayiniya uyu, Hideo wakamba kucita vintu mwakuyana waka ndipo wakaŵa na khumbo likuru la kuteŵetera Ciuta na ŵanji. Kuya kwake pantazi mwauzimu kukapangiska kuti waŵe na umoyo uweme.

 Kuŵazga Baibolo nyengo zose kungaŵa kwakuciska kwa ŵawukirano. Takahiro wakuti: “Nyengo yiliyose para nkukhumba kugona ndipo nakumbuka kuti nindaŵazge Baibolo zuŵa ilo, nkawukanga na kuŵazga. Nga ncakufumapo cake, nkawonanga kuti Yehova wakunirongozga. Kuŵazga Baibolo zuŵa na zuŵa kwanovwira kuti niye pantazi mwauzimu. Nkati namara waka masambiro ghane ku sukulu ya sekondale, nkayezgayezga kuti niteŵetere Yehova ndipo nkamba upayiniya wanyengo zose. Sono nkusangwa comene na uteŵeti uwu.”

Kusazgirapo pa kuŵazga Baibolo, kasi ncici cinyake ico cingamovwirani kukhozga khumbo linu la kurumba Yehova? Tomohiro wakasambizgika unenesko na ŵamama ŵake. Iye wakuti: “Apo nkaŵa na virimika 19 nkaŵazga mwakupwererera buku la Life Does Have a Purpose, ndipo nkakhwaskika comene na citemwa ca Yehova na sembe ya Yesu. Citemwa ici cikaniciska kuti nicitenge vinandi mu uteŵeti wa Yehova.” (2 Ŵakorinte 5:14, 15) Nga ni Tomohiro, ŵawukirano ŵanandi ŵakuciskika kuti ŵaye pantazi mwauzimu mwakuŵa na sambiro la Baibolo lakukhazikika la iwoŵene.

Nanga vingaŵa ntena, wuli usange mulije khumbo la kuteŵetera Yehova? Kasi walipo uyo wangamovwirani? Mpostole Paulos wakalemba kuti: “Ciuta . . . wakucitira mwa imwe kuti mukhumbenge ndipo mucitenge.” (Ŵafilipi 2:13) Usange mukuromba covwiro kwa Yehova, wazamumupani mzimu wake utuŵa mwawanangwa, uwo uzamumovwirani kuti “mucitenge” pera yayi kweniso kuti “mukhumbenge.” Ici cikung’anamura kuti mzimu utuŵa wa Ciuta uzamukhozga khumbo linu la kucita uteŵeti wa Yehova na mtima wose na kumovwirani kukura mwauzimu. Mulimose umo vingaŵira, thembani nkongono za Yehova na kukhozga mtima winu!

Iŵani na Vilato

Para mwasimikizga kuti mukukhumba kuteŵetera Yehova mwakukwana, mukwenera kuŵa na vilato vyauzimu kuti muye pantazi. Mana, msungwana wa Cikristu wakayowoya kuti: “Kuŵa na vilato cikaŵa covwiro cikuru kwa ine. M’malo mwa kuwelera nyuma, nkayanga pantazi comene. Nkakumbukiranga vilato vyane ndipo nkaromba Yehova kuti wanirongozge, mwanteura cikaniŵira cipusu kuya pantazi kwambura vyakutimbanizga.

Mukwenera kuŵa na vilato ivyo mungakwaniska ndiposo vyamahara. Kuŵazga cipaturo cimoza ca Baibolo zuŵa lirilose cingaŵa cilato ciweme. Mungaŵaso ca cilato ca kucita kafukufuku. Tingarongosora ici na mabuku gha Cingelezi, mungaŵazga mikhaliro ya Yehova iyo yikusangika mu Watch Tower Publications Index, pa ka mutu kakuti “Qualities by Name,” ako kali pasi pa mutu wakuti “Jehovah.” Pakusangika mikhaliro pafupifupi 40 ndipo kucita kafukufuku kungapangiska kuti musenderere kwa Yehova na kuciskika kucita vinandi. Vilato vinyake ivyo mungakwaniska vikusazgapo kuzgorapo nanga nkamoza pera pa ungano uliwose uwo ukukhumbikwira kucita nteura, kumanya makora ŵabali awo mukuwungana nawo, na kuleka kuzomerezga kuti zuŵa linjire waka kwambura kuromba kwa Yehova na kuphalira ŵanji za iye.

Usange mundalembeske mu Sukulu ya Uteŵeti wa Ciuta, ici cingaŵa cilato ciweme kwa imwe. Kasi mukutoramo cigaŵa mu uteŵeti wa m’munda? Usange mundambepo, mungayezgayezga kuti muŵe mupharazgi wambura kubapatizika. Kughanaghanira mwakupwererera ubwezi winu na Yehova na kujipereka mwaŵene kwa iye cingaŵa cilato cakurondezgapo. Ŵawukirano ŵanandi ŵakucita vintu mwakuyana na kujipatulira kwawo mwakucita uteŵeti wanyengo zose.

Penepapo nciweme kuŵa na vilato mu umoyo  winu, cenjerani na mzimu wa kucita vintu nga nciphalizgano. Musangenge cimwemwe na ivyo mukucita usange mukuleka kujiyaniska na ŵanji.—Ŵagalatiya 5:26; 6:4.

Nyengo zinyake mungajiwona nga mukumanya vinandi yayi nakuti ncakusuzga kuti muŵe na vilato vyamahara. Rondezgani urongozgi wa Baibolo wakuti: “Tegherezga khutu, upulike mazgu gha ŵavinjeru.” (Zintharika 22:17) Gwiriskirani ncito covwiro ico ŵapapi ŵinu ŵakupereka panji Ŵakristu ŵanji ŵakukhwima. Ŵapapi na ŵanji ŵakwenera kucita vintu mwamahara ndiposo kuŵa ŵakuciska pa nkani iyi. Kuŵa ŵakutangwanika na kuyezgayezga kuti ŵacitenge vintu ivyo ŵanyawo ŵakuŵaphalira kungapangiska ŵawukirano kuti ŵaŵe ŵambura cimwemwe na kuwona vilato vyawo nga vilije candulo. Ici cikacitika kwa msungwana munyake uyo wakayowoya kuti: “Ŵapapi ŵane ŵakaniŵikira vilato vinandi, nga ni kulembeska mu Sukulu ya Uteŵeti wa Ciuta, kutoramo cigaŵa mu uteŵeti wa m’munda, kubapatizika, na kuŵa mupayiniya. Nkayezgayezga comene kuti nifiske cimoza ca vilato ivi. Apo nkafiska cimoza, ŵapapi ŵane ŵakaniwonga cara, kweni m’malo mwake ŵakasazgirako cinyake. Nga ncakufumapo cake, nkawonanga kuti nkucicizgika waka. Nkavuka comene ndipo nkawonanga nga palije ico nkucita.” Kasi ncici ico cikasuzga? Vintu vyose ivi vikaŵa viweme waka, kweni vikaŵa vyakusanka vyake yayi. Kuti muye pantazi, mukwenera kuciskika kuti mucitepo kantu mwekha mwakusanka vintu ivyo mukukhumba kuti mucite!

Aghanaghanirani za Yesu Kristu. Apo wakaŵa pa caru capasi, ŵakamanya vintu ivyo Adada ŵake, Yehova, wakakhumbanga kwa iye. Cilato cake cikaŵa ca kucita khumbo la Yehova pera cara, kweniso kulikwaniriska. Kasi Yesu wakawuwona wuli uteŵeti wake? Wakati: ‘Cakurya cane ncakuti ndicitenge khumbo la Uyo wakandituma, na kufiska mulimo wake.’ (Yohane 4:34) Yesu wakakondwa comene pa kucita khumbo la Yehova ndipo wakacita nga ni umo ŵakakhumbira Ŵadada ŵake. Uteŵeti ukaŵa nga ncakurya kwa Yesu, wakakondwanga na mulimo uwo wakapika na Yehova. (Ŵahebere 10:5-10) Namwe mungakondwa para muli ŵakukhumbisiska nadi kucita ivyo ŵapapi ŵinu ŵakumuciskani.

Mungalekanga Cara Kucita Ico Nciweme

Para muli na cintu cakuti mucite m’maghanoghano, limbikirani kuti mufiske. Lemba la Ŵagalatiya 6:9 likuyowoya kuti: ‘Tingavukanga cara pakucita uweme, cifukwa titi tivunenge mu nyengo yakwenerera, usange taleka kuvuka.’ Mungathembanga nkongono zinu cara panji luso. Ncakuwonekerathu kuti muzamukumana na masuzgo ndipo nyengo zinyake muzamutondeka kucita vintu vinyake. Kweni Baibolo likuticiska kuti: “Mu mendero ghako ghose umuzomere [Ciuta], ndipo tiwanyoroskenge ntowa zako.” (Zintharika 3:6) Yehova wazamumovwirani para mukulimbikira kuti mukwaniriske vilato vinu vyauzimu.

Nadi pano, mwakuŵa na khumbo la kuteŵetera Yehova na kuyezgayezga kukwaniriska vilato vyauzimu, ŵantu wose ŵazamumanya kuti mukuya pantazi. (1 Timote 4:15) Mwanteura muzamusangwa na umoyo cifukwa ca kuteŵetera Ciuta.

[Cithuzithuzi pa peji 31]

Kuŵazga Baibolo na kuranguruka pa ivyo mwasambira kuzamumuciskani kuteŵetera Yehova

[Cithuzithuzi pa peji 32]

Yesu wakakwaniriska vintu ivyo wakatumika na Awiske